Bɔfoi 24

Yudafoi lɛ folɔ Paulo naa

1 # Bɔf 23.2, 5 No sɛɛ gbii enumɔ lɛ, osɔfonukpa, Anania kɛ maŋ onukpai lɛ ekomɛi kɛ mlalelɔ ko ni atsɛɔ lɛ Tertulo lɛ ba jɛi, ni amɛbajaje Paulo he sane amɛtsɔ̃ɔ amralo lɛ. 2Ayatsɛ Paulo kɛba, ni Tertulo bɔ̃i enaaflɔmɔ ni ekɛɛ, “Lumɔ Felike, oyinɔ nɛɛ wɔtoiŋ ejɔ wɔ babaoo, ni asaŋ oshɔŋŋ ninamɔ naa lɛ, nibii pii eba hiŋmɛi nɔ yɛ nɛkɛ shikpɔŋ nɛɛ nɔ. 3Wɔheɔ enɛ fɛɛ kɛ shidaa pii yɛ gbɛ fɛɛ gbɛ nɔ yɛ he fɛɛ he. 4Shi bɔ ni afee ni misane sɛɛ akajɛkɛ tuutu ko hewɔ lɛ, miikpa bo fai ni obo wɔ toi fioo yɛ omlihilɛ naa. 5#Bɔf 17.6 Wɔna nuu nɛɛ akɛ mɔ ko ni fiteɔ mɛi ayiŋ ni emuɔ atuatsemɔ mumɔ ewoɔ Yudafoi fɛɛ ni yɔɔ jeŋ muu lɛ fɛɛ mli, ni asaŋ eji Nazaremɛi akuu lɛ naa kpãa. 6#Bɔf 21.28 Eka Sɔlemɔ we lɛ bulemɔ, ni wɔmɔ lɛ, [ni kulɛ wɔmiitao wɔkojo lɛ yɛ wɔMla lɛ naa. 7Shi asafoiatsɛnukpa Lisia ba ni ebashɔ̃ lɛ yɛ wɔdɛŋ ekãa naa, ni ekɛ lɛ tee, 8#Bɔf 23.30 ni efã enaaflɔlɔi lɛ akɛ amɛba oŋɔɔ], ni kɛji bo diɛŋtsɛ obi enaa sane lɛ, ooona saji ni wɔfolɔɔ enaa yɛ hewɔ lɛ fɛɛ.” 9Ni Yudafoi lɛ hu ká mli wao ni amɛkɛɛ akɛ saji nɛɛ yɛ mli nakai.

Paulo naajiemɔ

10Kɛkɛ ni amralo lɛ fɔ̃ Paulo nine akɛ ewie, ni ewo enaa nɔ ni ekɛɛ, “Akɛni mile akɛ ojɛ oye shikpɔŋ nɛɛ nɔ amralo etsɛ hewɔ lɛ, mina tsuijurɔ ni mikɛaajie minaa. 11#Bɔf 21.17 Kɛ obi mli lɛ, ooona akɛ gbii nyɔŋma kɛ enyɔ pɛ nɛ ni mibaho Yerusalɛm akɛ miyaja Nyɔŋmɔ. 12Ni asaŋ amɛnako mi dã akɛ mikɛ mɛi miitaa naa aloo miibú mɛi yɛ Sɔlemɔ we lɛ, loo kpeehei lɛ, loo maŋ lɛ mli, 13ni asaŋ saji ni amɛkɛshwieɔ minɔ nɛɛ, amɛnyɛŋ naa amɛtsɔ̃ɔ. 14#Bɔf 24.5 Shi nɔ ni migbaa mli faŋŋ mikɛɔ bo ji enɛ akɛ, tsɔ̃ɔmɔ ni amɛtsɛɔ lɛ akɛ amaletsɔ̃ɔmɔ lɛ, no nɔŋŋ naa mijaa wɔtsɛmɛi aNyɔŋmɔ lɛ yɛ, miheɔ nibii fɛɛ ni aŋma yɛ Mla lɛ kɛ gbalɔi lɛ amli lɛ miyeɔ, 15#Dan 12.2; Yoh 5.28, 29 ni miyɛ Nyɔŋmɔ nɔ hiɛnɔkãmɔ ni mɛnɛɛmɛi hu kwɛɔ gbɛ akɛ gbohiiashitee baaba lɛ, ni jalɔi kɛ mɛi ni ejaaa fɛɛ baate shi. 16#Bɔf 23.1 Enɛ hewɔ mikɛ mihe efɔ̃ɔɔ shi lɛ, bɔ ni afee ni mana henilee ni sɔ̃ ko wulaaa lɛ yɛ Nyɔŋmɔ kɛ gbɔmɛi ahiɛ yɛ nibii fɛɛ amli.

17 # Rom 15.25, 26; Gal 2.10 “Shi afii pii asɛɛ lɛ miba ni mikɛ nikeenii abahã mimaŋ lɛ ni mashã afɔle hu. 18#Bɔf 21.27 Enɛ feemɔ mli amɛna mi yɛ Sɔlemɔ we lɛ akɛ mitsuu mihe, shi amɛnaaa mi kɛ asafo ko lɛ, amɛnaaa mi kɛ hoofeemɔ ko hu. 19Shi Yudafoi komɛi ni jɛ Asia lɛ yɛ jɛi, ni sa akɛ kulɛ amɛba ohiɛ, ni kɛ amɛyɛ mihe sane ko lɛ ni amɛbajaje. 20Aloo mɛnɛɛmɛi diɛŋtsɛ po kɛ amɛna sane ko ni ejaaa yɛ mihe be ni midãmɔ akwaashɔŋ lɛ hiɛ lɛ, amɛkɛɛ; 21#Bɔf 23.6 akɛ ja nɛkɛ wiemɔ kome ni be ni midamɔ amɛteŋ ni mibo akɛ, ‘Gbohiiashitee hewɔ nyɛkojoɔ mi ŋmɛnɛ gbi nɛɛ’ lɛ kɛkɛ.”

22 # Bɔf 23.26 Shi akɛni Felike le nɛkɛ tsɔ̃ɔmɔ nɛɛ he sane pɛpɛɛpɛ hewɔ lɛ, etsi amɛ eto, ni ekɛɛ, “Kɛji asafoiatsɛnukpa Lisia ba lɛ, makwɛ nyɛsane lɛ maye.” 23#Bɔf 27.3 Ni efã asafoiatsɛ lɛ akɛ ekɛ Paulo ayato, ni ehã ena hejɔlɛ, ni kɛ ehe gbɔmɛi miiba lɛ sɔ̃ɔmɔ loo saramɔ lɛ ekatsi amɛ gbɛ.

Paulo yɛ Felike kɛ Drusila hiɛ

24Gbii kplaŋŋ sɛɛ lɛ, Felike kɛ eŋa Drusila ni ji Yudayoo lɛ ba, ni ehã ayatsɛ Paulo kɛba, ni ebo Kristo nɔhemɔkɛyeli sane lɛ toi be ni Paulo wieɔ he lɛ. 25Shi be ni ewieɔ jalɛ kɛ henɔkwɛmɔ kɛ kojomɔ ni baaba lɛ he lɛ, Felike she gbeyei pam, ni ekɛɛ lɛ akɛ, “Agbɛnɛ yaa fɛɛ da; shi kɛ mina mihe dekã jiŋŋ, matsɛ bo ekoŋŋ.” 26Shi asaŋ ehiɛ kã nɔ akɛ Paulo aaahã lɛ shika ni eŋmɛɛ ehe; no hewɔ lɛ, etsɛɔ lɛ kpitiokpitio ni ekɛ lɛ bagbaa sane. 27Shi afii enyɔ sɛɛ lɛ, Porkio Festo ba baye Felike najiaŋ; ni akɛni Felike miisumɔ akɛ efee nɔ ni sa Yudafoi lɛ ahiɛ hewɔ lɛ, eshi Paulo yɛ tsu lɛ mli.

Currently Selected:

Bɔfoi 24: NEGAB

Highlight

Copy