Bɔfoi 10

Nyɔŋmɔ jie ehe kpo etsɔ̃ɔ Kornelio

1 # Mat 8.5 Shi nuu ko yɛ Kaisarea ni atsɛɔ lɛ Kornelio ni ji asraafoiohaatsɛ yɛ asraafoi akuu ni atsɛɔ lɛ Italia kuu lɛ mli. 2Nyɔŋmɔ jalɔ ni, ni ekɛ ewe lɛ fɛɛ sheɔ Nyɔŋmɔ gbeyei, ni efeɔ maŋbii lɛ ejurɔ pii, ni ekpaa Nyɔŋmɔ fai daa. 3Aaafee gbɛkɛ ŋmɛji etɛ̃ mli lɛ, ena yɛ ninaa mli faŋŋ akɛ Nyɔŋmɔ bɔfo ko ba eŋɔɔ bakɛɛ lɛ akɛ, “Kornelio!” 4Ni ekwɛ lɛ gãa ni eshe gbeyei ni ekɛɛ; “Mɛni, Nuŋtsɔ?” Ni ekɛɛ lɛ akɛ, “Osɔlemɔi kɛ onijuji ni ofeɔ lɛ eshɛ ŋwɛi ni efee kaimɔnɔ yɛ Nyɔŋmɔ hiɛ. 5Ni agbɛnɛ lɛ tsu mɛi kɛya Yopa ni ayakpee Simon mɔ ni atsɛɔ lɛ Petro hu lɛ kɛba; 6#Bɔf 9.43 eyato Simon, wolokpoolɔ ko ni shĩa yɔɔ ŋshɔ lɛ naa lɛ ŋɔɔ.” 7Be ni bɔfo ni kɛ lɛ bawie lɛ etee lɛ, etsɛ ewebii lɛ ateŋ mɛi enyɔ kɛ asraafonyo ko ni sheɔ Nyɔŋmɔ gbeyei ni ji mɛi ni sɔ̃mɔɔ lɛ lɛ ateŋ mɔ kome, 8ni egba amɛ nibii nɛɛ fɛɛ, ni etsu amɛ Yopa.

Petro na ninaa ko

9Enɔ jetsɛremɔ, be ni amɛnyiɛ gbɛ lɛ nɔ ni amɛbɛŋkɛ maŋ lɛ, Petro tee sɔlemɔ yɛ tsu yiteŋ aaafee shwane ŋmɛlɛ nyɔŋma kɛ enyɔ mli. 10Ni hɔmɔ ye lɛ naakpa, ni eetao nɔ ko eye. Shi be ni afeɔ niyenii lɛ, efee tamɔ nɔ enyɔ enɔ, 11#Bɔf 11.5-17 ni ena akɛ ŋwɛi egbele, ni nɔ ko miikpeleke shi ni tamɔ mama kpeteŋkple, ni ahiɛ ekoji ejwɛ lɛ mli aashi kɛmiiba shikpɔŋ; 12ni shikpɔŋ nɔ kooloi naji ejwɛjwɛɛjwɛ kɛ waamɔnii kɛ ŋwɛi loofɔji srɔtoi lɛ fɛɛ eko yɛ mli. 13Ni gbee ko kɛɛ lɛ akɛ, “Petro, tee shi, gbee ni oye.” 14#Eze 4.14 Shi Petro kɛɛ, “Dabida, Nuŋtsɔ, ejaakɛ miyeko nɔ ko ni buleɔ mɔ loo nɔ ko ni he tseee dã.” 15#Mat 15.11 Ni gbee lɛ saa kɛɛ lɛ nɔ ni ji shii enyɔ akɛ, “Nɔ ni Nyɔŋmɔ etsuu he lɛ, kaabu lɛ akɛ bulemɔnɔ.” 16Shi afee nakai shii etɛ̃; ni awo nɔ lɛ kɛtee ŋwɛi ekoŋŋ.

17Be ni Petro efee yaa akɛ te nii ni ena nɛɛ shishiŋ lɛ, hii lɛ ni Kornelio tsu lɛ miibibii Simon we lɛ gbɛ; ni amɛbadamɔ agbo lɛ naa 18amɛtsɛ ni amɛbi akɛ, “Ani biɛ Simon ni atsɛɔ lɛ Petro hu lɛ bato lɛ?” 19Shi be ni Petro jwɛŋɔ ninaa lɛ he lɛ, Mumɔ lɛ kɛɛ lɛ akɛ, “Naa, hii etɛ̃ komɛi miitao bo; 20no hewɔ lɛ, tee shi ni okpeleke shi okɛ amɛ aya, ni okaje ŋwane ko, ejaakɛ mi mitsu amɛ.” 21Kɛkɛ ni Petro kpeleke shi, ni eyakɛɛ hii lɛ akɛ, “Naa, mi ji mɔ ni nyɛtaoɔ lɛ; mɛɛ sane hewɔ nyɛba?” 22Ni amɛkɛɛ, “Asraafoiohaatsɛ Kornelio, ni ji nuu jalɔ kɛ Nyɔŋmɔ gbeyeishelɔ ni Yudafoi amaŋ muu lɛ fɛɛ yeɔ ehe odase lɛ, lɛ ŋwɛi bɔfo krɔŋkrɔŋ ko kɛɛ lɛ akɛ etsu ni abakpee bo kɛba ewe lɛ, koni ebo onaa toi.” 23Kɛkɛ ni etsɛ amɛ kɛba shĩa lɛ ni ebafee amɛ gbɔ. Ni enɔ jetsɛremɔ lɛ ekɛ amɛ yiŋ kɛtee ni nyɛmimɛi ni yɔɔ Yopa lɛ ateŋ mɛi komɛi fata ehe kɛtee.

Petro yɛ Kornelio we lɛ

24Ni enɔ jetsɛremɔ ekoŋŋ lɛ amɛyashɛ Kaisarea. Shi Kornelio miikwɛ amɛ gbɛ, ni etsɛ ewekumɛi kɛ enanemɛi juji kɛkpe. 25Ni be ni Petro boteɔ shĩa lɛ, Kornelio kɛ lɛ bakpe, ni eho egbee enaji anaa ni eja lɛ. 26#Bɔf 14.15; Kpoj 19.10 Shi Petro wo enɔ, ni ekɛɛ, “Tee shi, shi mi diɛŋtsɛ hu gbɔmɔ ji mi.” 27Ni ekɛ lɛ hiɛ sanegbaa kɛbote shĩa lɛ, ni eyana mɛi pii ni ebabua amɛhe naa lɛ. 28Ni ekɛɛ amɛ akɛ, “Nyɛ diɛŋtsɛ nyɛle bɔ ni Yudanyo bɛ hegbɛ akɛ ekɛ mɔ ko ni ji maŋ kroko nɔ nyo bɔɔ aloo ebaa eŋɔɔ; shi mi lɛ Nyɔŋmɔ etsɔ̃ɔ mi akɛ mikatsɛ mɔ ko mɔ ni he tseee loo mɔ ni buleɔ mɔ. 29No hewɔ hu ni be ni atsu abatsɛ mi lɛ, mijieee naa ni miba nɛɛ. Ni agbɛnɛ miibi nyɛ, ‘Mɛɛ sane hewɔ nyɛbakpee mi nɛɛ?’ ”

30 # Bɔf 10.3 Ni Kornelio kɛɛ akɛ, “Ŋmɛnɛ ji gbii ejwɛ aaafee ŋmɛji etɛ̃ mli nɛkɛ pɛ, miisɔle yɛ mishĩa nɛɛ; ni naa, nuu ko ni wo atade kaŋkaŋ badamɔ mihiɛ, 31ni ekɛɛ, ‘Kornelio, abo osɔlemɔ lɛ toi, ni onijuji ni ofeɔ lɛ hu Nyɔŋmɔ ena. 32No hewɔ lɛ, tsu kɛya Yopa, ni ayatsɛ Simon ni atsɛɔ lɛ Petro hu lɛ kɛba; eyato Simon wolokpoolɔ lɛ ni shĩa kã ŋshɔ naa lɛ ŋɔɔ.’ 33Kɛkɛ ni amrɔ lɛ nɔŋŋ mitsu oŋɔɔ, ni ofee jogbaŋŋ akɛ oba. No hewɔ lɛ, agbɛnɛ wɔ fɛɛ wɔyɛ biɛ yɛ Nyɔŋmɔ hiɛ koni wɔbo nibii fɛɛ ni Nyɔŋmɔ efã bo akɛ okɛɛ lɛ toi.”

Petro shiɛ etsɔ̃ɔ Kornelio kɛ eshĩabii lɛ

34 # 1 Sam 16.7; Rom 2.11 Kɛkɛ ni Petro gbele enaa ni ekɛɛ, “Lɛɛlɛŋ, miyoo akɛ Nyɔŋmɔ jeee mɛiahĩɛiaŋkwɛlɔ; 35#Yoh 10.16 Shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛnii lɛ, lɛ ji mɔ ni saa ehiɛ. 36#Mat 28.16 Nyɔŋmɔ tsu akɛ wiemɔ lɛ yahã Israelbii ni etsɔ̃ Yesu Kristo nɔ ejaje hejɔlɛ Sanekpakpa etsɔ̃ɔ amɛ. Yesu nɛɛ ji mɛi fɛɛ aNuŋtsɔ. 37#Mat 4.12-17 Nyɛ diɛŋtsɛ nyɛle sane lɛ ni ba Yudea ni eje shishi kɛjɛ Galilea, yɛ baptisimɔ ni Yohane shiɛ lɛ sɛɛ lɛ, 38#Yes 61.1; Mat 3.16 bɔ ni Nyɔŋmɔ kɛ Mumɔ Krɔŋkrɔŋ kɛ hewalɛ fɔ Yesu ni jɛ Nazaret lɛ mu, ni ekpaa shi efeɔ ekpakpa ni etsaa mɛi fɛɛ ni abonsam haoɔ amɛ lɛ, ejaakɛ Nyɔŋmɔ kɛ lɛ yɛ. 39Ni wɔji nibii fɛɛ ni efee yɛ Yudafoi ashikpɔŋ lɛ nɔ kɛ Yerusalɛm lɛ he odasefoi. Amɛsɛŋ lɛ yɛ tso nɔ ni amɛgbe lɛ. 40#1 Kor 15.4-7 Shi Nyɔŋmɔ tee lɛ shi gbi ni ji etɛ̃ lɛ, ni ehã ejie ehe kpo etsɔ̃ɔ faŋŋ; 41#Yoh 14.22; 15.27 jeee mɛi lɛ fɛɛ ejie ehe kpo etsɔ̃ɔ, shi moŋ odasefoi ni Nyɔŋmɔ ehala eto momo lɛ, ni ji wɔ mɛi ni wɔkɛ lɛ ye nii ni wɔkɛ lɛ nu, be ni ete shi kɛjɛ gbohii ateŋ lɛ sɛɛ lɛ. 42#Bɔf 17.31; Rom 14.10 Ni ewo wɔ kitã akɛ wɔshiɛ wɔtsɔ̃ɔ maŋ lɛ ni wɔye odase akɛ lɛ ji mɔ ni Nyɔŋmɔ efã akɛ hiɛkãalɔi kɛ gbohii fɛɛ akojolɔ lɛ. 43#Yes 53.5-6; Yer 31.34; Eze 34.16; Dan 9.24 Lɛ ehe odase gbalɔi lɛ fɛɛ yeɔ, akɛ mɔ fɛɛ mɔ ni heɔ enɔ yeɔ lɛ aaana ehe eshai faa yɛ egbɛi lɛ hewɔ.”

Jeŋmajiaŋbii ni asɔle klɛŋklɛŋ

44Be ni Petro wieɔ nɛkɛ wiemɔi nɛɛ lolo lɛ, Mumɔ Krɔŋkrɔŋ lɛ ba mɛi fɛɛ ni nu wiemɔ lɛ anɔ. 45Ni heyelɔi abɔ ni jɛ ketiafolɔi ateŋ ni kɛ Petro ba lɛ anaa kpɛ amɛhe akɛ afɔse Mumɔ Krɔŋkrɔŋ nɔkeenɔ lɛ ashwie jeŋmajiaŋbii hu anɔ, 46#Bɔf 2.4; Mar 16.17 ejaakɛ amɛnu akɛ amɛmiiwie wiemɔi srɔtoi ni amɛmiijaje Nyɔŋmɔ agbojee lɛ. Kɛkɛ ni Petro here nɔ akɛ, 47“Ani mɔ ko aaanyɛ nu naa atsi, ni akabaptisi mɛnɛɛmɛi ni na Mumɔ Krɔŋkrɔŋ lɛ tamɔ wɔ nɔŋŋ lɛ?” 48#Yoh 4.40 Ni efã akɛ abaptisi amɛ yɛ Yesu Kristo gbɛi lɛ mli. Kɛkɛ ni amɛkpa lɛ fai akɛ ekɛ amɛ ahi shi gbii fioo ko.

Currently Selected:

Bɔfoi 10: NEGAB

Highlight

Copy