Yohanes 11

Lazarus dapa kas hidup kembali

11:1-44

1-2Ada laki-laki satu yang de pu nama Lazarus. De tinggal di kampung Betania, satu kampung deng de pu sodara prempuan dua, Maria deng Marta. Maria ni, prempuan yang perna gosok minyak wangi di Yesus pu kaki, baru de lap deng de pu rambut. Satu kali begini Lazarus de sakit kras, 3jadi de pu sodara prempuan dua ni, dong dua kas kabar ke Yesus begini, “Tuhan, Tuhan pu teman yang Tuhan sayang tu, de sakit.”

4Waktu Yesus dengar kabar itu, De bilang, “De pu sakit tu, trakan bikin de mati, tapi Allah mo kas tunjuk De pu kuasa yang besar, trus dari sakit itu Allah pu Anak nanti dapa puji kas tinggi.” 5Yesus De memang sayang Marta, Maria deng Lazarus. 6Tapi, De sengaja tinggal dua hari lagi di tempat yang De ada tinggal skarang. 7Habis itu Yesus bilang ke De pu murid-murid, “Mari tong kembali lagi ke daera Yudea.”

8Trus De pu murid-murid dong bilang ke Dia, “Guru, knapa Guru mo kesana? Padahal, baru-baru ini, pemimpin Yahudi disana ada coba lempar Guru deng batu baru!”

9Yesus De jawab, “Satu hari tu, ada 12 jam to? Jadi sapa yang jalan waktu masi siang, de pu kaki trakan tagate, karna de liat trang. 10Tapi kalo orang yang jalan waktu su malam, de pu kaki nanti tagate, karna trada trang di dia.”

11Itu suda yang Yesus bilang, trus De bilang lagi, “Kitong pu teman Lazarus tu su tatidur, jadi Sa mo pigi kas bangun dia.”

12Trus De pu murid-murid dong bilang ke Dia, “Tuhan, kalo de tidur, de pasti sembu mo.” 13Padahal, yang Yesus pu maksud tu, Lazarus su mati, tapi De pu murid-murid kira de tidur biasa-biasa saja.

14Itu yang Yesus bilang langsung, “Lazarus su mati, 15tapi Sa snang Sa tra datang waktu itu, karna itu lebi baik untuk kam, supaya kam bisa percaya. Mari suda, tong pigi ke Lazarus skarang.”

16Trus Tomas yang dong panggil juga Didimus ni, de bilang ke Yesus pu murid-murid yang lain, “Mari tong ikut De kesana, supaya tong juga mati sama-sama deng Dia.”

17Waktu Yesus dong tiba di kampung Betania, De dapa kastau kalo Lazarus su mati empat hari baru de pu mayat ada dalam kubur. 18Kampung Betania ni, tra jau dari Yerusalem. De pu jarak kira-kira tiga kilometer. 19Jadi ada banyak orang Yahudi yang datang ke Maria deng Marta untuk hibur dong dua, karna dong pu sodara Lazarus su mati. 20Waktu Marta de dengar kalo Yesus ada datang, de langsung pigi ke Yesus. Tapi Maria de di ruma saja. 21Trus Marta bilang ke Yesus, “Tuhan, kalo waktu itu Ko ada disini, pasti sa pu sodara Lazarus de tra mati. 22Tapi skarang, biar begitu sa tau kalo apa yang Bapa minta dari Allah, pasti De kasi.”

23Trus Yesus bilang ke Marta, “Ko pu sodara de nanti hidup kembali.”

24Marta bilang ke Dia, “Sa tau, kalo de nanti hidup waktu orang-orang yang su mati tu dong hidup kembali, waktu hari trakir.”

25Tapi Yesus jawab,

“Sa ini suda yang kas hidup kembali orang mati trus kasi dong hidup yang trada akir. Sapa yang percaya sama Saya, de nanti hidup biar de su mati. 26Trus tiap orang yang hidup deng percaya sama Saya, de trakan mati sampe trada akir. Ko percaya itu?”

27Trus Marta de jawab, “Iyo Tuhan, sa percaya kalo Ko itu Raja Yang Allah Pili, trus Ko juga Allah pu Anak, De yang su lama orang Yahudi tunggu untuk datang ke dalam dunia.” 28Habis bicara, Marta de pigi panggil de pu sodara Maria diam-diam, “Guru ada disana, De ada panggil ko.” 29Waktu Maria dengar itu, de langsung bediri trus pigi ke Yesus.

30Tapi waktu itu Yesus blum sampe di kampung itu. De masi ada di tempat yang De ketemu deng Marta. 31Orang-orang Yahudi yang datang hibur Maria di de ruma tu, dong liat kalo Maria bediri trus jalan cepat-cepat kluar, jadi dong ikut de kluar. Dong pikir de ke Lazarus pu kubur untuk mnangis disana. 32Waktu Maria de tiba di tempat yang Yesus ada, trus liat Dia, de langsung tunduk jatu depan Yesus pu kaki baru bilang, “Tuhan, waktu itu kalo Ko ada disini, pasti sa pu sodara Lazarus de tra mati.”

33Waktu Yesus liat Maria deng orang-orang Yahudi yang datang sama-sama de tu ada mnangis, Yesus pu hati hancur deng sedi skali, trus De bilang, 34“Kam kubur de dimana?”

Dong jawab, “Mari Tuhan, tong pigi liat!” 35Trus Yesus mnangis. 36Jadi, orang-orang Yahudi itu dong baku bicara, “Liat, De sayang skali sama Lazarus.” 37Tapi ada brapa orang yang bilang, “De itu yang kas sembu orang buta to, knapa De tra bikin apa begitu ka, supaya Lazarus de tra mati?”

38Yesus pu hati tamba sedi lagi, trus De pigi ke kubur itu. Kubur itu sperti goa satu yang dong tutup deng batu besar. 39Jadi Yesus bilang, “Kas pinda batu itu!”

Tapi Marta, orang yang mati ni pu sodara prempuan ni bilang, “Adu Tuhan, Lazarus de su mati empat hari, pasti su bau busuk skali.”

40Yesus jawab, “Sa su bilang ko tadi to, ‘Kalo ko percaya, ko nanti liat Allah pu kuasa yang luar biasa?’ ” 41Jadi dong kas pinda batu itu. Trus Yesus De liat ke atas baru De bilang,

“Bapa, Sa doa bilang trima kasi ke Bapa, karna Bapa su dengar Saya. 42Sa tau kalo Bapa slalu dengar Saya, tapi Sa bilang begini supaya orang banyak yang bediri kliling Sa disini, dong smua percaya kalo Bapa yang su utus Saya.” 43Habis De bilang begitu, De batariak deng suara besar, “Lazarus, ko kluar!”

44Langsung Lazarus yang su mati tu de kluar, de pu kaki deng tangan dua-dua masi taikat deng kain puti,#11:44 kain puti ini kain untuk bungkus mayat, sama deng ʻkain kafanʼ. baru de pu muka juga masi taikat deng kain. Jadi Yesus bilang ke dorang, “Buka kain-kain yang ada ikat de tu, trus kas biar de pigi.”

Rencana untuk mo bunu Yesus

11:45-57

(Mat 26:1-5; Mrk 14:1-2; Luk 22:1-2)

45Waktu orang-orang Yahudi yang datang hibur Maria tu, dong liat yang Yesus su bikin, banyak dari dong yang jadi percaya sama Yesus. 46Tapi ada brapa orang dari dong yang pigi lapor sama orang-orang Farisi, tentang apa yang Yesus su bikin. 47Trus imam-imam kepala deng orang-orang Farisi panggil Sidang Agama dong untuk kumpul. Dong bilang, “Kitong harus bikin apa? Karna Orang itu De su bikin tanda heran banyak skali. 48Kalo tong kas tinggal Dia, nanti smua orang percaya sama Dia, trus orang Roma nanti dong datang kas hancur tong pu Ruma Allah lapis deng tong pu bangsa.”

49Tapi satu dari dong de pu nama Kayafas, de ini Pemimpin Imam taun itu, de bilang ke dong begini, “Kam tra tau apapa! 50Juga kam tra sadar kalo lebi baik kalo satu orang mati untuk smua bangsa daripada tong pu bangsa ini hilang.” 51Apa yang Kayafas de bilang tu, itu bukan dari de pu pikiran sendiri. Tapi karna de Pemimpin Imam taun itu, de kastau Allah pu pesan lebi dulu, kalo Yesus nanti mati untuk bangsa Yahudi. 52Yesus mati bukan untuk bangsa Yahudi saja, tapi supaya Allah pu anana yang ada dimana-mana tu, dong smua dapa kumpul jadi satu. 53Jadi dari hari itu dong rencana untuk mo bunu Yesus.

54Itu yang, Yesus su tra muncul lagi di depan orang Yahudi dorang. De pigi dari situ ke daera dekat tempat sepi yang kring, ke kota satu yang pu nama Efraim, disitu Yesus deng De pu murid-murid dong tinggal.

55Pas waktu itu orang Yahudi dong pu hari besar Paska su dekat, jadi banyak orang Yahudi dari kampung-kampung di daera itu yang datang ke Kota Yerusalem untuk kas bersi diri seblum Paska. 56Waktu dong datang di Ruma Allah, dong cari Yesus, trus dong baku bilang, “Ko pikir bagemana? Mungkin nanti Yesus De tra bisa datang di hari besar ini ka?” 57Dong bilang begitu karna imam-imam kepala deng orang-orang Farisi dong mo tangkap Yesus. Trus dong su kas kluar printa, supaya tiap orang yang tau Yesus ada dimana, harus kastau dorang.

Currently Selected:

Yohanes 11: MPapua

Highlight

Copy

Compare