1 Korintus 15
15
Kristus benar-benar hidup kembali
15:1-11
1Sodara-sodara, skarang sa mo kas ingat kam tentang Brita Baik yang sa su kastau sama kam. Kam su trima deng masi pegang Brita Baik itu kuat-kuat. 2Brita Baik itu yang kas slamat kam, asal kam tetap percaya sunggu-sunggu sama Brita Baik yang sa su kastau itu. Karna kalo tidak, percuma saja kam percaya.
3Karna sa su kastau sama kam apa yang paling penting, itu yang sa su trima sendiri, itu tu Kristus su mati karna tong pu dosa-dosa, sperti yang tatulis di Kitab Suci. 4De su dapa kubur, trus De su dapa kas hidup kembali di hari yang ketiga, sperti yang tatulis di Kitab Suci. 5Juga De su kas tunjuk diri ke Kefas, trus habis itu ke De pu 12 murid. 6Habis itu De kas tunjuk diri ke 500 lebi De pu pengikut sama-sama satu kali. Banyak dari dong masi hidup sampe skarang, tapi brapa dari dong su mninggal. 7Trus De kas tunjuk diri ke Yakobus, sama ke utusan-utusan smua.
8Yang paling trakir skali tu De kas tunjuk diri juga sama sa, sama sperti ke anak yang lahir di waktu yang sala. 9Sa ini suda yang paling hina dari utusan-utusan smua. Sa tra pantas dapa panggil utusan, karna sa su siksa Allah pu jemaat. 10Tapi karna Allah kas tunjuk De pu baik jadi, sa jadi sperti yang sa ada skarang, trus Allah pu baik yang De kas tunjuk sama sa tu tra percuma. Mala sa su kerja lebi kras daripada dong smua, tapi itu bukan karna sa, itu karna Allah pu baik yang kerja sama-sama sa. 11Itu jadi, mo sa ka, ato dong ka, tong kas ajar Brita yang sama, trus kam jadi percaya.
Manusia nanti hidup kembali
15:12-34
12Jadi kalo Brita yang tong kastau itu tentang Kristus dapa kas hidup kembali dari tenga-tenga orang mati, knapa ada dari kam yang bilang kalo orang mati tra bisa dapa kas hidup kembali? 13Kalo memang orang mati tra bisa dapa kas hidup kembali, brarti Kristus juga tra dapa kas hidup kembali. 14Trus kalo Kristus tra dapa kas hidup kembali, brarti percuma saja Brita yang tong kastau, trus percuma juga kam percaya. 15Juga kalo memang orang mati tra dapa kas hidup kembali, itu kas tunjuk kalo tong crita tipu-tipu tentang Allah, karna tong bilang De su kas hidup Kristus kembali, padahal itu tra benar. 16Karna kalo benar orang mati tra dapa kas hidup kembali, brarti Kristus juga tra dapa kas hidup kembali. 17Kalo Kristus tra dapa kas hidup kembali, brarti percuma saja kam percaya, juga kam masi hidup dalam kam pu dosa. 18Begitu juga deng orang-orang yang mati dalam Kristus, dong pasti mati trus. 19Kalo tong harap sama Kristus cuma sampe hidup di dunia ini saja, brarti tong ini orang-orang yang paling bikin kasian dari smua manusia.
20Tapi yang benar tu Kristus su dapa kas hidup kembali dari tenga-tenga orang mati, itu jadi yang pertama dari orang-orang yang su mati. 21Sama sperti lewat satu orang sampe orang-orang harus mati, begitu juga lewat satu orang yang lain sampe orang-orang bisa dapa kas hidup kembali. 22Sama sperti smua orang mati karna pu hubungan deng Adam, begitu juga smua orang pasti dapa kas hidup kembali karna pu hubungan deng Kristus. 23Tapi masing-masing ikut de pu giliran: Kristus yang pertama, habis itu dong yang su jadi De pu milik, waktu De datang kembali.
24Baru akir dari dunia ini, waktu itu tu nanti Kristus kas hancur yang pegang printa smua, kuasa smua deng setan smua pu kuat, baru De kasi Krajaan ke Allah Bapa. 25Karna Kristus harus tetap pegang printa jadi Raja sampe Kristus bikin De pu musu smua ada di bawa De pu kaki. 26Musu trakir yang nanti De kas hancur tu kuasa yang bikin orang mati. 27Karna Kitab Suci bilang, “Smua-smua Allah su kas tunduk di bawa De pu kaki.”#Mazmur 8:7 Kalo, “smua-smua su kas tunduk,” su jlas Allah tra masuk dalam “smua-smua” itu, karna Allah sendiri yang su kas tunduk smua-smua di bawa Kristus pu kaki. 28Tapi habis smua-smua su dapa kas tunduk di bawa Kristus, Kristus sendiri yang jadi Anak pasti kas tunduk De pu diri di bawa Allah yang su kas tunduk smua-smua di bawa De pu kaki, supaya Allah jadi smua di dalam smua.
29Kalo orang mati tra hidup kembali, knapa ada orang yang dapa baptis untuk orang mati? Kalo orang mati sama skali tra dapa kas hidup kembali, knapa orang mau dapa baptis untuk orang yang su mati? 30Trus tong juga, knapa stiap waktu tong bawa tong pu diri ke dalam bahaya? 31Trus stiap hari sa hampir mati. Sodara-sodara, sa kastau kalo ini benar, sama sperti sa bangga atas kam karna kam su percaya Kristus Yesus, tong pu Tuhan. 32Kalo hanya atas dasar manusia pu pikiran saja, untuk apa sa brusaha kras lawan binatang yang jahat skali di Efesus sini, itu de pu untung apa untuk sa? Kalo memang orang mati tra hidup kembali brarti, “Mari suda tong makan deng minum, karna besok tong mati.”
33Kam jang dapa tipu: “Teman deng orang-orang yang jahat bikin hancur sifat yang baik.” 34Sadar baik-baik suda, trus jang bikin dosa lagi! Ada di antara kam yang tra knal Allah, sa kastau ini supaya kam rasa malu.
Badan yang dapa kas hidup kembali
15:35-58
35Tapi mungkin ada orang yang tanya, “Bagemana orang mati dapa kas hidup kembali? Dong nanti hidup kembali deng badan sperti apa?” 36Eh orang bodok! Apa yang kam tanam, de trakan tumbu deng hidup kalo de tra mati dulu. 37Trus yang kam tanam tu bukan tanaman pu bentuk yang nanti tumbu, tapi biji kosong, de pu conto tu biji gandum ato biji yang lain. 38Tapi Allah kasi ke masing-masing tanaman de pu bentuk sendiri. Trus Allah kas tumbu de sperti bentuk yang Allah mau.
39Smua pu badan tra sama: Manusia pu badan lain dari binatang pu badan, lain dari burung pu badan, lain dari ikan pu badan. 40Begitu juga deng yang ada di langit, tra sama deng yang ada di dunia. Langit pu bagus tra sama deng dunia pu bagus. 41Matahari pu bagus lain dari bulan pu bagus, trus bulan pu bagus lain dari bintang-bintang pu bagus, trus bintang yang satu pu bagus tra sama deng bintang yang lain pu bagus.
42Begitu juga deng orang mati hidup kembali. Yang dapa kubur tu badan yang bisa hancur, trus yang dapa kas hidup kembali tu badan yang tra bisa hancur. 43Badan yang dapa kubur tu badan yang tra bagus, trus badan yang dapa kas hidup kembali tu badan yang luar biasa. Dapa kubur deng badan yang tra kuat, dapa kas hidup kembali deng badan yang kuat. 44Yang dapa kubur tu badan dunia, yang dapa kas hidup kembali tu badan rohani.
Kalo ada badan dunia, brarti ada badan rohani juga. 45Sperti ada tatulis: “Manusia pertama Adam jadi manusia yang hidup,”#Kejadian 2:7 tapi Adam yang trakir tu Roh yang kas hidup. 46Tapi yang datang pertama bukan yang rohani, tapi yang dari dunia, habis itu baru yang rohani datang. 47Manusia pertama dapa bikin dari debu tana, tapi manusia kedua, Kristus, De asal dari surga. 48Orang-orang dunia sama deng de yang asal dari debu tana, trus orang-orang surga sama deng De yang asal dari surga. 49Sama sperti tong su pake bentuk sperti de yang dari debu tana, begitu juga tong pasti pake bentuk sperti De yang dari surga.
50Sodara-sodara, ini yang sa mo kastau sama kam, kalo daging deng dara tra bisa dapat bagian dalam Allah pu Krajaan. Trus yang bisa hancur tra bisa dapat bagian dalam apa yang tra bisa hancur. 51Dengar, sa kastau rahasia satu sama kam: Tong trakan mati smua, tapi tong smua pasti dapa kas ruba 52tiba-tiba deng cepat skali waktu bunyi trompet yang trakir. Karna trompet nanti bunyi, trus orang-orang mati pasti dapa kas hidup kembali deng badan yang tra bisa rusak, trus tong smua nanti dapa kas ruba. 53Karna yang bisa hancur ni harus pake yang tra bisa hancur, trus yang bisa mati ni harus pake yang tra bisa mati. 54Habis yang bisa hancur ni pake yang tra bisa hancur, trus yang bisa mati ni pake yang tra bisa mati, brarti kata-kata yang tatulis tu su jadi:
“Kuasa untuk bikin orang mati su dapa kas hancur, Tuhan su menang!” #
Yesaya 25:8
55 “Eh kuasa untuk bikin orang mati, dimana ko pu kuasa?
Eh kuasa untuk bikin orang mati, dimana ko pu racun?” #
Hosea 13:14
56Kuasa untuk bikin orang mati pu racun tu datang dari dosa, baru dosa pu kuasa tu datang dari hukum Musa. 57Tapi trima kasi skali untuk Allah, De yang su bikin tong menang lewat Yesus Kristus, tong pu Tuhan. 58Itu jadi, sa pu sodara-sodara yang sa sayang, bediri kuat, jang goyang, trus slalu rajin dalam Tuhan pu kerja! Karna kam tau kalo smua yang kam kerja untuk Tuhan tu tra percuma.
Currently Selected:
1 Korintus 15: MPapua
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
