1 Korintus 14
14
Lebi baik hadia rohani untuk kas kuat jemaat
14:1-25
1Brusaha kras untuk sayang orang lain, trus betul-betul mau untuk trima hadia-hadia rohani. Lebi lagi harus mau trima hadia rohani untuk kastau Allah pu pesan. 2Orang yang bicara pake bahasa Roh, de bukan bicara sama manusia, tapi sama Allah. Karna trada orang yang mngerti itu, Roh yang bikin de bicara apa yang rahasia. 3Tapi orang yang kastau Allah pu pesan, de bicara sama manusia untuk kas kuat, kas naseat, sama kas hibur. 4Orang yang bicara pake bahasa Roh, de kas kuat de pu diri sendiri, tapi orang yang kastau Allah pu pesan, de kas kuat jemaat.
5Sa snang kalo kam smua bicara pake bahasa Roh, tapi paling baik kalo kam kastau Allah pu pesan. Karna lebi penting orang yang kastau Allah pu pesan daripada orang yang bicara pake bahasa Roh, kecuali kalo orang itu juga bisa kas jlas bahasa itu, supaya jemaat bisa dapa kas kuat.
6Jadi sodara-sodara, kalo sa datang sama kam baru bicara pake bahasa Roh, kam dapat untung apa kalo sa tra kastau apa yang Allah kas tunjuk sama sa? Ato sa tra kas jlas tentang Allah, ato sa tra kastau Allah pu pesan, ato sa tra kas ajar? 7Begitu juga deng alat-alat musik yang trada nyawa tapi bisa bunyi, sperti suling deng kecapi. Orang bisa tau lagu apa yang orang main pake suling ato kecapi tu bagemana, kalo dua-dua tra kas kluar bunyi yang jlas? 8Ato kalo trompet tra kas kluar bunyi yang jlas, sapa yang mo kas siap diri untuk prang? 9Begitu juga deng kam yang bicara-bicara pake bahasa Roh. Kalo kam tra pake kata-kata yang jlas, orang mo mngerti apa yang kam bicara tu bagemana? Kam pu kata-kata tu nanti hilang sperti angin saja!
10Ada banyak, tra tau brapa banyak macam bahasa di dunia, biar begitu tapi trada satu dari bahasa itu yang tra pu arti. 11Tapi kalo sa tra mngerti bahasa itu pu arti, sa jadi orang asing untuk de yang pake bahasa itu, juga de orang asing untuk sa. 12Begitu juga deng kam. Karna kam brusaha kras dapat hadia-hadia rohani, jadi kam harus brusaha lebi kras lagi pake itu untuk kas kuat jemaat.
13Itu jadi, sapa yang bicara pake bahasa Roh, de harus berdoa supaya de bisa kas jlas bahasa itu. 14Karna kalo sa berdoa pake bahasa Roh, brarti memang sa pu roh berdoa, tapi sa pu pikiran tra kas hasil apapa. 15Jadi apa yang harus sa bikin? Sa mo berdoa deng sa pu roh, tapi sa berdoa juga deng sa pu pikiran. Sa mo menyanyi puji Tuhan deng sa pu roh, tapi sa menyanyi puji Tuhan juga deng sa pu pikiran. 16Karna kalo kam bilang trima kasi ke Allah deng kam pu roh saja, orang lain yang hadir deng dengar bisa bilang, “Amin” waktu kam bilang trima kasi tu bagemana? De tra tau apa yang kam bicara to? 17Biar kam pu cara bilang trima kasi itu baik skali, tapi orang lain tra dapa kas kuat lewat itu.
18Sa bilang trima kasi ke Allah karna sa lebi banyak bicara pake bahasa Roh daripada kam smua. 19Tapi waktu jemaat kumpul, sa lebi suka bicara pake lima kata yang orang bisa mngerti untuk kas ajar orang lain, daripada pake kata banyak-banyak pake bahasa Roh.
20Sodara-sodara, kam pu cara pikir jang sama sperti anana. Tapi kam harus jadi sperti anana yang tra tau bikin jahat, trus jadi sperti orang besar dalam kam pu cara pikir! 21Dalam Kitab Suci ada tatulis, Tuhan bilang: “Sa nanti bicara sama bangsa ini lewat orang-orang yang bicara bahasa lain deng lewat orang-orang asing pu mulut. Tapi biar begitu juga, dong tetap tra mau dengar Sa.”#Yesaya 28:11-12 22Jadi hadia rohani bahasa Roh tu bukan tanda untuk orang yang percaya, tapi untuk orang yang tra percaya. Trus hadia rohani untuk kastau Allah pu pesan tu bukan tanda untuk orang yang tra percaya, tapi untuk orang yang percaya.
23Jadi kalo jemaat smua kumpul sama-sama baru masing-masing orang bicara-bicara pake bahasa Roh, trus ada orang lain ato ada orang yang tra percaya, pasti dong bilang kam gila to? 24Tapi kalo smua kastau Allah pu pesan, trus ada orang yang tra percaya ato ada orang baru, pasti lewat smua itu de jadi percaya trus sadar de pu dosa-dosa. 25Smua rahasia yang ada di dalam de pu hati nanti dapa buka, sampe nanti de tunduk semba Allah deng mngaku, “Benar, Allah ada di tenga-tenga kam.”
Aturan dalam jemaat
14:26-40
26Jadi skarang bagemana sodara-sodara? Kalo kam kumpul untuk ibada, masing-masing orang ada yang: menyanyi, yang lain kas ajar, ato kastau apa yang Allah kas liat, ato pake bahasa Roh, ato kas jlas bahasa Roh. Tapi smua itu harus pake untuk kas kuat jemaat. 27Kalo ada yang mo bicara-bicara pake bahasa Roh, biar dua ato paling banyak tiga orang, satu orang bicara dulu baru satu lagi, trus harus ada orang lain yang kas jlas itu. 28Kalo trada orang yang bisa kas jlas itu, dong harus diam waktu jemaat kumpul, biar dong bicara ke Allah dalam hati saja.
29Trus tentang nabi-nabi, baik kalo dua ato tiga orang di antara dong yang kastau pesan itu dulu, baru jemaat yang lain nilai apa yang dong bilang. 30Tapi kalo orang lain yang duduk disitu dapa kas liat Brita dari Allah, brarti orang yang pertama kastau pesan dari Allah tu de harus diam dulu. 31Karna kam smua bisa kastau Allah pu pesan satu orang dulu baru satu lagi, sampe kam smua bisa blajar deng dapa kas kuat. 32Nabi tu dong bisa atur dong pu diri. 33Karna Allah tra suka yang kaco, tapi yang damai deng tenang.
34Sama sperti di Allah pu orang-orang di jemaat smua, prempuan-prempuan harus diam waktu jemaat kumpul. Karna dong tra dapa kas ijin untuk bicara. Dong harus ikut dong pu pemimpin, agama Yahudi juga kas ajar begitu. 35Kalo dong mau tau apapa begitu, lebi baik dong tanya itu ke dong pu suami waktu di ruma. Karna tra pantas buat prempuan untuk bicara waktu jemaat kumpul.
36Ingat, Allah pu kata-kata bukan datang dari kam, trus kata-kata itu bukan datang hanya untuk kam saja. 37Kalo orang anggap de pu diri nabi ato orang yang rohani, de harus sadar kalo apa yang sa tulis ini Tuhan pu printa. 38Tapi kalo de tra pratikan ini, kam jang pratikan de. 39Itu jadi sodara-sodara, brusaha supaya kam dapat hadia rohani untuk kastau Allah pu pesan, trus jang larang orang yang bicara pake bahasa Roh. 40Tapi smua itu harus bikin deng baik trus tratur.
Currently Selected:
1 Korintus 14: MPapua
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
