1 Korintus 16
16
Sumbangan untuk jemaat di Yerusalem
16:1-4
1Tentang uang yang kam kumpul untuk Allah pu orang-orang, kam harus bikin itu ikut cara yang sa kasi sama jemaat-jemaat di Galatia, itu tu: 2Kam masing-masing harus kas pisa uang sesuai deng yang kam sanggup trus simpan itu, bikin begitu stiap minggu di hari pertama. Supaya waktu sa datang, kam tra perlu kumpul-kumpul itu lagi. 3Habis sa sampe, nanti sa utus orang-orang yang kam anggap pantas untuk kasi kam pu sumbangan ke Yerusalem, sama-sama deng surat-surat yang kas jlas dong pu tujuan. 4Kalo memang baik kalo sa juga harus pigi, brarti dong nanti pigi sama-sama deng sa.
Paulus pu rencana
16:5-9
5Tapi sa nanti datang sama kam habis sa ke Propinsi Makedonia, karna sa mo kesana dulu. 6Mungkin nanti sa tinggal brapa lama deng kam di Korintus situ, ato mungkin slama musim dingin, supaya kam bisa tolong sa untuk sa lanjut ke tempat lain. 7Karna skarang sa tra mau liat kam hanya sbentar saja. Kalo Tuhan kas ijin, sa harap sa bisa tinggal agak lama deng kam. 8Tapi sa mo tinggal di Efesus sini dulu sampe hari besar Pentakosta, 9karna ada banyak kesempatan besar deng penting untuk sa, biar lagi ada banyak yang lawan sa.
Brapa hal lagi
16:10-18
10Kalo Timotius datang, sambut de deng baik supaya de rasa tenang waktu de ada di tenga-tenga kam, karna de kerja untuk Tuhan, sama sperti sa. 11Jadi jang ada orang yang anggap reme de! Tapi tolong de sampe de kembali ke sa deng slamat, karna sa deng sodara-sodara yang lain disini ada tunggu de datang. 12Tentang tong pu sodara Apolos, sa su brapa kali mohon skali supaya de sama-sama deng sodara-sodara yang lain pigi liat kam, tapi de tra mo pigi skarang. Kalo nanti ada waktu yang baik, de pasti datang.
13Kam harus jaga-jaga! Pegang kuat-kuat deng yang kam percaya! Kam harus brani deng tetap kuat! 14Kas tunjuk kalo kam sayang orang lain lewat smua yang kam bikin! 15Sodara-sodara, ada satu lagi yang sa mo minta sama kam. Kam tau kalo Stefanas deng de pu kluarga tu orang-orang pertama yang jadi percaya di Propinsi Akhaya, trus dong su kasi dong pu diri untuk layani Allah pu orang-orang. 16Itu jadi, ikut baik-baik orang-orang yang begitu, sama stiap orang yang ikut kerja kras. 17Sa snang skali karna Stefanas, Fortunatus sama Akhaikus dong datang, karna dong ganti kam disini. 18Dong yang kas kuat sa pu roh deng kam pu roh. Kas tunjuk hormat sama orang-orang yang begitu!
Salam
16:19-24
19Jemaat-jemaat di Propinsi Asia kirim salam untuk kam. Akwila deng Priskila trus jemaat di dong pu ruma kirim salam hangat dalam Tuhan untuk kam. 20Smua sodara-sodara sama-sama percaya disini kirim salam untuk kam. Kam harus baku kasi salam deng penu sayang dari orang yang satu ke orang yang lain.
21Salam ini sa tulis deng sa pu tangan sendiri: Salam dari Paulus.
22Sapa yang tra sayang Tuhan, biar de dapa kutuk. Maranata!#16:22 Maranata! ‒ Bahasa Aram: Tong pu Tuhan datang!
23Tuhan Yesus kas tunjuk De pu baik sama kam.
24Sa slalu sayang kam smua dalam Kristus Yesus.
Currently Selected:
1 Korintus 16: MPapua
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
