1 Korintus 13
13
Rasa sayang
13:1-13
1Biar sa bisa bicara deng manusia smua pu bahasa sampe deng malaikat pu bahasa juga tapi kalo sa tra punya rasa sayang, apa yang sa bicara tu hanya bunyi yang bikin ribut saja, trada arti apapa. 2Biar sa punya hadia rohani untuk kastau Allah pu pesan, mngerti smua rahasia deng tau smua-smua, trus biar sa pu percaya kuat skali sampe bisa kas pinda gunung, tapi kalo sa tra punya rasa sayang, brarti sa trada arti sama skali.
3Biar sa bagi-bagi smua-smua yang sa punya, sampe sa kasi sa pu badan untuk dapa bakar, tapi kalo sa tra punya rasa sayang, itu trada untung untuk sa sama skali.
4Rasa sayang tu sabar deng baik hati, tra iri hati, tra angkat-angkat diri deng tra sombong. 5De tra bikin barang yang tra sopan deng tra pikir diri sendiri, de tra cepat mara deng tra dendam. 6De tra snang deng apa yang tra adil, tapi snang deng apa yang benar. 7De tetap tahan dalam keadaan apa saja, tetap percaya trus, tetap harap sama Tuhan, tetap sabar tanggung smua-smua.
8Rasa sayang pasti ada trus. Orang yang kastau Allah pu pesan nanti brenti, bahasa Roh nanti hilang, orang pintar nanti trada lagi. 9Karna smua yang tong tau ni masi kurang, trus tong ni tra lengkap untuk kastau Allah pu pesan. 10Tapi kalo Allah bikin smua jadi lengkap, brarti yang tra lengkap tu trada lagi. 11Waktu sa masi anana, sa bicara sperti anana, sa rasa sperti anana, sa pikir juga sperti anana. Skarang sa su besar, sa su kas tinggal sifat anana itu. 12Skarang yang tong liat dalam kaca muka tu gambar yang kabur-kabur, tapi nanti tong liat deng jlas. Skarang sa blum tau smua-smua, tapi nanti sa tau smua-smua, sama sperti Allah su tau smua-smua tentang sa.
13Jadi, tinggal tiga bagian ini, itu tu percaya sama Tuhan, harap sama Tuhan, deng rasa sayang. Rasa sayang tu yang paling penting.
Currently Selected:
1 Korintus 13: MPapua
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
