1 Korintus 11

1Ikut sa pu conto, sama sperti sa ikut Kristus pu conto.

Tentang pake tutup kepala waktu ibada

11:2-16

2Skarang sa puji kam karna kam slalu ingat sa, trus tetap pegang ajaran yang sa kasi sama kam. 3Tapi sa mau supaya kam tau tentang ini, kalo Kristus tu kepala dari laki-laki, trus laki-laki tu kepala dari prempuan, trus Allah tu kepala dari Kristus. 4Laki-laki yang pake tutup kepala, baru berdoa ato yang kastau Allah pu pesan, brarti orang itu su hina Kristus yang jadi de pu kepala. 5Tapi stiap prempuan yang tra pake tutup kepala, baru berdoa ato kastau Allah pu pesan, brarti prempuan itu su hina de pu suami yang jadi de pu kepala. Itu sama saja prempuan itu pu rambut dapa cukur. 6Kalo prempuan tra mau tutup de pu kepala, lebi baik de gunting de pu rambut saja. Tapi kalo prempuan yang de pu rambut dapa gunting ato dapa cukur tu bikin de malu, lebi baik de tutup de pu kepala.

7Laki-laki jang tutup de pu kepala, karna de tu gambar dari Allah yang penu hormat. Tapi prempuan yang bikin laki-laki dapa hormat, jadi de harus tutup de pu kepala. 8Karna laki-laki tra asal dari prempuan, tapi prempuan yang asal dari laki-laki. 9Juga Allah bukan bikin laki-laki untuk prempuan, tapi Allah bikin prempuan untuk laki-laki. 10Itu jadi, prempuan harus pake tanda kuasa di de pu kepala karna malaikat-malaikat ada liat. 11Biar begitu, dalam Tuhan trada prempuan yang bisa sendiri dari laki-laki, trus trada laki-laki yang bisa sendiri dari prempuan. 12Karna sama sperti prempuan asal dari laki-laki, begitu juga laki-laki lahir dari prempuan, trus smua-smua tu asal dari Allah.

13Coba pikir sendiri, pantas ka prempuan berdoa ke Allah deng tra tutup de pu kepala? 14Aturan alam sendiri su kas tunjuk sama kam kalo tra pantas untuk laki-laki kalo de pu rambut panjang to? 15Tapi itu bikin prempuan dapa hormat, kalo de pu rambut panjang. Karna prempuan dapa kasi rambut untuk tutup de pu kepala.

16Tapi kalo ada orang yang tra stuju deng sa, ingat e, mo sa ato Allah pu jemaat-jemaat yang lain juga biasa bikin begitu.

Klakuan yang tra pantas waktu makan minum untuk ingat Tuhan

11:17-34

17Tentang yang sa mo bilang ini, sa tra bisa puji kam, karna waktu kam kumpul untuk ibada, itu bukan kas hasil yang baik, tapi kas hasil yang tra baik. 18Pertama yang sa mo bilang tu, sa dengar kalo waktu kam kumpul untuk ibada sama-sama, kam ada tapisa-pisa, trus sa sdikit percaya tentang itu. 19Memang kam harus tapisa-pisa, supaya kliatan nanti sapa di tenga-tenga kam yang percaya betul-betul.

20Waktu kam kumpul untuk ibada, kam bukan kumpul untuk makan minum untuk ingat Tuhan. 21Karna waktu kam kumpul untuk makan minum tu, masing-masing orang baku rampas untuk ambil de pu makanan sendiri, sampe ada orang yang tra dapat apapa, padahal ada orang yang sampe mabuk. 22Kam tra pu ruma sendiri untuk makan deng minum ka? Ato kam mo hina Allah pu jemaat, trus mo bikin malu orang-orang miskin? Jadi sa harus bicara apa ke kam? Sa harus puji-puji kam begitu? Jang harap, sa trakan puji kam untuk itu.

23Apa yang sa ajar ke kam, itu sa trima dari Tuhan sendiri. Itu tu kalo Tuhan Yesus malam itu waktu De mo dapa jual, De ambil roti, 24trus habis itu De bilang trima kasi ke Allah, De pata-pata roti itu baru bilang, “Ini Sa pu badan yang Sa kasi untuk kam, buat ini untuk ingat Sa.” 25Begitu juga habis makan, De ambil glas anggur trus bilang, “Glas anggur ini tu Allah pu janji yang baru, Sa pu dara yang bikin sah janji itu. Stiap kali kam minum ini, bikin ini untuk ingat Sa.” 26Karna stiap kali kam makan roti ini deng minum dari glas anggur ini, itu kam kastau tentang Tuhan mati, sampe De datang kembali.

27Jadi, sapa saja yang makan roti deng minum dari glas anggur itu deng cara yang tra pantas, de su bikin dosa karna tra kas tunjuk hormat sama Tuhan pu badan deng dara. 28Itu jadi, masing-masing orang harus nilai de pu diri sendiri, trus habis itu baru de makan roti deng minum dari glas anggur itu. 29Karna sapa yang makan minum tapi tra kas tunjuk hormat sama Tuhan pu badan, itu yang bikin Allah hukum de. 30Itu jadi ada banyak dari kam yang tra kuat, sakit-sakit, trus banyak yang mati. 31Kalo tong nilai tong pu diri sendiri dulu, Allah trakan hukum tong. 32Tapi kalo tong dapa hukum dari Tuhan, tong dapa ajar supaya tong nanti tra dapa hukum sama-sama deng dunia.

33Sa pu sodara-sodara, itu jadi, kalo kam kumpul untuk makan, kam harus baku tunggu supaya bisa makan sama-sama. 34Kalo ada orang yang lapar, de harus makan dulu di de pu ruma, supaya jang kam kumpul untuk dapa hukum. Untuk masala-masala yang lain nanti sa atur waktu sa datang.

Currently Selected:

1 Korintus 11: MPapua

Highlight

Copy

Compare