1 Korintus 1

Salam

1:1-3

1Surat ini dari Paulus yang karna Allah pu mau dapa panggil untuk jadi Kristus Yesus pu utusan, deng dari Sostenes tong pu sodara yang sama-sama percaya. 2Untuk Allah pu jemaat di Korintus. Kam itu orang-orang yang su dapa kas suci dalam Kristus Yesus, trus kam su dapa panggil untuk jadi Allah pu orang-orang, kam sama-sama deng smua orang dimana saja yang berdoa panggil tong pu Tuhan Yesus Kristus pu nama. De itu tong pu Tuhan deng dong pu Tuhan.#Kisah Para Rasul 18:1 3Sa doa minta supaya Allah tong pu Bapa deng Tuhan Yesus Kristus kas tunjuk De pu baik, trus kasi damai deng tenang ke kam.

Doa bilang trima kasi ke Allah

1:4-9

4Sa slalu bilang trima kasi ke sa pu Allah karna De kas tunjuk De pu baik sama kam lewat Kristus Yesus. 5Karna kam su trima apa yang baik banyak skali lewat De, supaya kam bisa tau smua-smua deng bisa bicara tentang smua-smua. 6Itu jadi bukti yang kuat kalo apa yang tong bilang sama kam tentang Kristus tu benar. 7Deng begitu, kam pu hadia rohani tu tra kurang sama skali waktu kam tunggu tong pu Tuhan Yesus Kristus datang kembali trus smua orang liat De. 8Supaya De yang nanti kas kuat kam sampe trakir, sampe kam tra bisa dapa tudu waktu tong pu Tuhan Yesus Kristus datang kembali. 9Allah tu setia, De yang panggil kam untuk hidup satu hati deng De pu Anak Yesus Kristus, tong pu Tuhan.

Yang bikin jemaat tapisa-pisa

1:10-17

10Sodara-sodara, deng tong pu Tuhan Yesus Kristus pu nama sa minta sunggu-sunggu sama kam, supaya kam satu hati trus kam jang baku mlawan. Sa minta supaya kam tetap satu hati deng satu pikiran. 11Sa pu sodara-sodara, sa bilang begitu karna ada orang-orang dari Kloe pu kluarga yang kastau sama sa tentang kam kalo kam ada baku mlawan. 12Yang sa maksud tu kalo kam masing-masing bilang, “Sa ni Paulus pu pengikut,” ato, “Sa ni Apolos pu pengikut,” ato, “Sa ni Kefas#1:12 Kefas ‒ Nama lain dari Petrus. pu pengikut,” ato, “Sa ni Kristus pu pengikut.”#Kisah Para Rasul 18:24

13Kristus tra bisa tabagi-bagi to? Coba kam pikir, Paulus yang dapa salib untuk kam ka? Ato kam dapa baptis pake Paulus pu nama? 14Itu yang sa bilang trima kasi ke Allah karna trada satu orang dari kam yang sa baptis, cuma Krispus deng Gayus#Kisah Para Rasul 18:8; 19:29; Roma 16:23 saja. 15Jadi trada orang yang bisa bilang kalo de dapa baptis pake sa pu nama. 16Oh iyo, Stefanas deng de pu kluarga juga yang sa baptis. Sa tra ingat kalo sa perna baptis orang lain lagi.#1 Korintus 16:15 17Karna Kristus utus sa bukan untuk baptis tapi untuk kastau Brita Baik. Itu juga sa tra bicara pake manusia pu pintar, supaya kuasa dari Kristus mati di kayu salib tu tra jadi sia-sia.

Brita Baik tu kas tunjuk Allah pu kuasa deng De tau smua-smua

1:18-31

18Untuk orang-orang yang nanti hancur, Brita tentang Yesus mati di kayu salib tu dong anggap itu crita bodok. Tapi untuk tong yang dapa kas slamat, tong tau kalo itu kas tunjuk Allah pu kuasa yang besar. 19Itu yang Allah perna bilang di Kitab Suci,

“Orang-orang yang mngerti smua deng baik nanti Sa kas hancur yang dong mngerti,

trus orang-orang yang pu cara pikir paling baik nanti Sa kas hilang dong pu cara pikir.” # Yesaya 29:14

20Orang yang mngerti smua deng baik tu dong dimana? Guru-guru agama tu dong dimana? Dunia pu orang-orang yang pintar tanya jawab tu dong dimana? Allah su bikin dunia pu pintar tu jadi bodok to?#Ayub 12:17; Yesaya 19:12, 33:18, 44:25 21Memang Allah De tau smua-smua, jadi De tra kas biar manusia pake dong pu pintar untuk knal Allah. Tapi De mo kas slamat orang-orang yang percaya sama De lewat Brita Baik yang tong kastau, biar dunia anggap itu Brita Baik bodok.

22Orang-orang Yahudi dong minta tanda untuk jadi bukti, trus orang-orang bukan Yahudi dong lebi kas penting untuk mngerti smua deng baik. 23Tapi tong kastau tentang Kristus yang mati di kayu salib. Untuk orang Yahudi, Brita itu sperti batu yang bikin dong jatu. Trus untuk orang bukan Yahudi, dong anggap itu bodok skali, 24tapi untuk dong yang dapa panggil, mo itu orang Yahudi ato bukan Yahudi, Kristus itu yang kas tunjuk kalo Allah pu kuasa tu yang besar deng Allah tau smua-smua. 25Karna, biar manusia anggap yang Allah bikin tu tra masuk akal, tapi yang benar tu, smua yang Allah bikin tu Allah jau lebi tau dari yang manusia bisa bikin. Trus yang Allah bikin yang manusia anggap trada kuasa, itu pu kuasa lebi besar dari yang manusia bisa bikin.

26Sodara-sodara, kam ingat kam pu keadaan waktu Allah panggil kam. Mnurut manusia pu cara ukur tu, tra banyak di antara kam yang mngerti smua deng baik, tra banyak orang yang pu posisi penting, tra banyak orang yang dari kluarga yang dapa hormat. 27Tapi apa yang dunia anggap bodok, Allah pili itu untuk bikin malu orang-orang yang mngerti smua deng baik. Trus yang dunia anggap trada pu kuasa apapa, Allah pili itu untuk bikin malu orang yang kuat. 28Trus yang tra penting deng yang hina untuk dunia, Allah pili itu. Mala apa yang trada arti, Allah pili itu untuk kas hilang yang ada arti, 29supaya jang ada satu orang juga yang bisa bikin diri hebat di depan Allah. 30Tapi kam ada dalam Kristus Yesus karna Allah. Lewat Yesus Kristus, Allah bikin tong mngerti kalo De tau smua-smua. De kas benar, deng kas suci, trus kas bebas tong. 31Itu yang ada tatulis, “Sapa saja yang mo bangga, de harus bangga atas apa yang Tuhan bikin.”#Yeremia 9:24

Currently Selected:

1 Korintus 1: MPapua

Highlight

Copy

Compare