Kisah Para Rasul 28

Paulus di Malta

28:1-10

1Stela tong smua sampe di pante itu deng slamat baru tong tau kalo tempat itu de nama pulou Malta. 2Orang-orang yang tinggal disitu dong baik skali sama kitong. Dong bikin api besar deng ajak tong smua duduk dekat situ karna su hujan trus dingin.

3Waktu Paulus de kumpul kayu bakar trus taru di atas api, begini ada ular bisa yang kluar karna panas dari api trus gigit de pu tangan tra kas lepas. 4Waktu orang-orang disitu liat ular de gigit deng masi gantung di Paulus pu tangan, dong smua baku bicara begini, “Orang ini de pasti su bunu orang karna de su slamat dari laut, Dewi Adil tra kas biar de hidup.” 5Tapi Paulus hela de pu tangan ke api trus ular jatu ke api, baru de tra rasa sakit apapa. 6Trus dong kira de pu tangan nanti bengkak ato de jatu mati. Dong tunggu-tunggu, tapi dong liat trada apapa deng Paulus. Jadi yang dong pikir tentang de bruba, trus dong bilang de ini dewa.

7Tra jau dari tempat dong duduk itu ada orang nomor satu di pulou itu de pu tana. Orang itu de pu nama Publius. De trima tong smua jadi de pu tamu slama tiga hari. 8Waktu itu Publius pu bapa ada tidur karna sakit panas dingin deng juga mencret-mencret. Paulus de masuk dalam de bapa pu kamar trus taru tangan di atas de bapa trus doa kas sembu dia. 9Publius pu bapa sembu, banyak orang lain yang sakit di pulou itu yang datang trus dong sembu. 10Dong hormat skali sama tong, baru waktu tong mo pigi deng kapal lagi dong kas siap smua yang tong perlu.

Paulus sampe di Roma

28:11-16

11Habis tiga bulan tong tinggal di pulou itu, tong lanjut pigi deng kapal yang tinggal lama disitu karna musim dingin. Kapal itu dari Kota Aleksandria trus de ada lambang Dioskuri.#28:11 Dioskuri ‒ itu dewa kembar yang orang Yunani semba, untuk jaga kapal. 12Tong singga di plabuhan Sirakusa baru tong tinggal disitu sampe tiga hari. 13Dari situ tong brangkat sampe di Kota Regium. Besok begini angin slatan de tiup baru tong sampe ke Kota Putioli pas hari kedua. 14Disitu tong ketemu sodara-sodara yang ikut Yesus pu ajaran. Trus dong undang tong tinggal sampe tuju hari sama-sama dorang. Baru tong pigi ke Kota Roma. 15Sodara-sodara yang tinggal di Roma su dengar kalo tong ada ke Roma, jadi dong datang sampe di Kota Pasar Apius deng juga di Kota Tiga Tempat Singga.#28:15 Kota Pasar Apius deng juga di Kota Tiga Tempat Singga ‒ bahasa asli: Forum Apius deng Tres Taberne. Waktu Paulus ketemu dorang, de pu hati tamba kuat deng doa bilang trima kasi ke Allah sama Allah.

16Stela tong sampe di Roma, Paulus dapa ijin tinggal sendiri deng satu tentara yang kawal dia.

Paulus bicara deng orang Yahudi di Roma

28:17-29

17Pas su tiga hari begini Paulus de panggil orang-orang penting dari bangsa Yahudi trus waktu dong su kumpul, Paulus de bilang,

“Sodara-sodara, biar sa tra sala deng sa pu bangsa ato sama tong pu nene moyang pu adat istiadat, tapi sa dapa tangkap di Yerusalem baru dong kasi sa sama orang-orang Roma. 18Habis sa dapa priksa, orang Roma mo kas lepas saya, karna dong tra dapat sa pu sala yang jadi alasan mo kas hukum mati. 19Itu tapi orang-orang Yahudi dong mlawan trus, karna itu sa minta sa pu masala Raja Besar Roma yang jadi hakim, tapi sa trada rencana mo lapor sa pu bangsa. 20Begitu jadi sa minta supaya sa bisa ketemu deng bicara sama kam, karna janji slamat yang Israel harap deng percaya itu, sa dapa ikat deng rante ini.”

21Dengar begitu dong bilang,

“Tong tra trima surat apapa dari Yudea tentang ko, juga trada satu orang dari tong pu sodara-sodara mo datang kastau apapa yang jahat tentang ko. 22Tapi tong mo dengar dari ko, ko pikir bagemana, karna tentang ajaran Yesus ini tong tau, di mana-mana orang dong bicara lawan itu.”

23Trus dong bikin rencana mo ketemu Paulus lagi. Pas hari itu dong smua datang deng jumla yang banyak ke tempat de tinggal. De kas jlas deng kastau sama dong smua tentang Allah jadi Raja. De pake dasar hukum Musa deng nabi-nabi pu kitab untuk kas yakin dong smua tentang Yesus. Dong ketemu dari pagi sampe sore. 24Ada yang su percaya deng apa yang de kastau, ada yang tetap tra mo percaya. 25Jadi dong smua pulang ke dong pu tempat deng pikiran sendiri-sendiri. Tapi Paulus masi sempat bilang dorang,

“Pas skali kata-kata yang Roh Allah kastau lewat Nabi Yesaya untuk tong pu nene moyang, 26de bilang:

‘Ko pigi ke bangsa ini deng kastau begini:

Nanti kam dengar ulang-ulang, tapi tra mngerti,

Nanti kam liat ulang-ulang, tapi tra tau apa yang kam liat.

27 Karna bangsa ini pu hati su kras,

dong pu tlinga su tebal,

dong pu mata su tutup mati;

supaya jang liat deng dong pu mata,

dengar deng dong pu tlinga,

mngerti deng dong pu hati,

biar dong jang balik untuk Sa kas sembu dorang.’ # Yesaya 6:9-10

28Karna itu kam musti tau, kalo brita slamat yang dari Allah ini dapa kastau ke bangsa-bangsa lain trus dong mo dengar itu.” [29Habis Paulus bicara begitu, orang-orang Yahudi itu dong pigi deng baku mlawan.]#28:29 Bagian yang ada dalam kurung ini trada di teks-teks bahasa Yunani yang paling lama, tapi ada di brapa teks Yunani stela yang paling lama itu.

Paulus kastau di Roma tentang Allah jadi Raja

28:30-31

30Trus Paulus tinggal dua taun di ruma yang de sewa sendiri itu, de trima smua orang yang datang sama dia. 31De kastau sama smua orang bagemana Allah mo jadi Raja deng kas ajar tentang Tuhan Yesus Raja Yang Allah Pili. De tra takut juga trada yang larang dia.

Currently Selected:

Kisah Para Rasul 28: MPapua

Highlight

Copy

Compare