Waroma 6

Undewa wa uholo uhuma matozo, utuduganya na Kristo

1Avo tulongeze; tubasilize kubananga, giladi uholo ubwagale? 2Aka sivivo; tweye tudanganikile matozo, todahaze kukala nago kabili? 3Hebu hamvimanyile kamba chose tubatizigwe mditwaga ja Yesu Kristo, tusingulwa tufe hamonga na Heyo? 4Avo tuzikwa hamonga na Kristo mkifo chake, vitubatizigwe, ivo vino kamba Heyo viyazusigwe kulawa mkifo kwa mhiko za iyenzi ya Tata, vivo na tweye tugalamke wanhu wa sambi, tugendelele muugima wa sambi. 5Kwa mzoko vituhandigwe mdikabuli jake, tugaluke kamba Heyo viyafile, vivo vondatugaluke kamba Heyo na viyazukile.

6Kilumbo tuimanya mbuli ino, Unhu wetu wa umwaka uwambigwa mdibiki hamonga na Heyo, giladi nghuli zino za gamatozo ziluzige, sukutusanghanile matozo viyagwe. 7Kwa mzoko Yuja yafile kapetigwa ihoko, kahuma muna gamatozo. 8Na tweye kamba todanganika hamonga na Kristo, totamanila kamba twa muupile hamonga na heyo. 9Kilumbo tuvimanya, Kristo viyazusigwe kulawa wafile, hondayafe viyagwe; kifo chabule undewa wa kumgoga. 10Kwa mzoko viyafile, kadanganikila matozo mwanza umonga; komu vija viyali mpile, na dilelo mpile yamsanghanile Mulungu. 11Avo na mweye geseni gago, matozo mgadanganikila gamala; vino mwawapile, mtumikileni Mulungu, kubitila kumwake Yesu Kristo.

12Kileka ubananzi sukuugoge uja undewa muli zinghuli zenu zene ikifo, sukumzahile dongho zawo! 13Hebu sukumzilave nghuli zenu zigambe viya vya kusanghanila matozo, bali mwilave wenyego kwa kumsanghanila Mulungu, vumuli wapile, kwa mzoko mkala mdanganike; azo nghuli zenu mzilave zigambe icho ikimbigalo cha ihoko cha kumsanghanila Mulungu! 14Kilumbo ubananzi honda ugoge undewa uwatawale, kwa mzoko mhiko zenu hazili muli Inzuma, bali zolawa muuholo.

Tuzilave nghuli zetu kwa kumsanghanila Mulungu

15Avo imbuli yokuwaze? Tubanange vivo, tuhawa mhiko zetu hazili mwinzuma, bali zamuna uholo yeka? Aka, sivivo bule! 16Hamtangile viili? yavino, Kamba muhailava wenyego kumsanghanila munhu kinyakadala na kuvumila igake, avo mgalamka nyakadala wa yuja yumumvumile; ihawa unyakadala wenu wa matozo, mogenda kudanganika; ihawa unyakadala wenu wa kuwinza lukemo, mogenda kugolelwa ihoko.

17Komu Mulungu yalavilwe nhogo, kilumbo mweye mkalile nyakadala wa matozo, sambi mgaluka miyoyo, motegeleza malangukizo gaja gamgolelwe. 18Na haja hamkombolwe kulawa muutumwa wa ubananzi, mgaluka kamba watumwa wa ihoko. 19Amba avo nolonga kimunhu, kilumbo vumnyekile kilukuli; kamba vija vumzilavile nghuli zenu kusanghanila kitumwa ubananzi na gaja ganyolodoke, vumgakutule kuvikila uponela, avo zilaveni nghuli zenu zitumikile ihoko, kuvikila kungʼazulwa!

20Kileka vumkalile watumwa wa matozo, bahaja mkala wagolo bule ihoko. 21Avo haja umwaka mkala mpatile choni? Sambi mogonela kinyala, kwa mzoko kimambukizo chawo kuko ukudanganika. 22Komu vino vummalile kukombolwa kulawa muutumwa wa matozo, avo mgalamka watumwa wa Mulungu, mnago magalo genu, mvike hangʼazuke, kabili ikimambukizo mogolelwa ugima wa digunge kwa digunge. 23Kilumbo kitumetume cha matozo kuko ukudanganika, komu golelo, Mulungu joyotwingha hamonga na Mndewa wetu Kristo Yesu, uwo upile wa idigunge kwa digunge.

Currently Selected:

Waroma 6: ZAM75

Highlight

Copy