Sanghano 23
23
Paulo haluhengo lwa Mtambika Mkulu
1Paulo kawabunhulila meso wakulu wa luhengo kalonga, “Walume ndugu zangu, niye kuvikila dilelo nogendelela hameso ga Mulungu kwa moyo ungʼalile.”
2Baho Mtambika Mkulu Anania kawalagiza waja wemile behi na heyo, wamsune mulomo. 3Komu Paulo kamulongela, “Mulungu kokusuna gweye, ugambile lukingigo lubakigwe nyhwakala; che, gweye konhagusa kamba viilumbile Inzuma kabili kobeza Inzuma, kowalagiza wanhowe?”
4Baho waja wemile walonga, “Che, komuliga Mtambika Mkulu wa Mulungu?”
5Paulo kedika, “Mwa ndugu, sivimanyile kamba heyo yuyo Mtambika Mkulu, kwa mzoko yandikigwa, Sikuumlonge gehile mkulu wa lukolo lwako!”
6Paulo viyatangile kamba umwambu uno wa Luhengo wakala Masadukeo, na umwambu uno Mafariseo, kalava dizwi haluhengo lwa Nhaguso kalonga, “Walume ndugu, niye na Fariseo, mwana wa Fariseo. Hano nodununzigwa vino kilumbo vituubeta mzuko wa wafile.”
7Viyalongile higo, hakala na bamila waja Mafariseo na Masadukeo, na mtinghano wihagula. 8Kwa mzoko Masadukeo wolonga, Kuduhu kuzuka, kuduhu malaika, kuduhu loho; komu Mafariseo wagavumila kamba gose gabaho. 9Halawilila bwato kulu; Wana Inzuma wayagwe wa Mafariseo wema wodeta wolonga, “Munhu yuno haduhu chayabanange; kwali ihawa loho hebu malaika kalonga nayo, hana choni?”
10Hekaheka vidibanzile, ija mkulugenzi kadumba Paulo sikuyalumizwe; kawalagiza asikali weze kumsegeza mmakono gawo, wamgale kuli mhongono.
11Ikilo iija Mndewa kamwizila Paulo kalonga, “Gangamala, kilumbo vuunisindile kuno Yerusalemu, avo ikwandama unisindile na hiko Roma!”
Msagu wa Wayuda kumkoma Paulo
12Vuuchele Wayuda welundiza waigondanya, kuno weduwila wolonga, honda tuje hebu kungʼwa tanhu, hanakomigwa Paulo. 13Na waja weduwile wakala wanhu bwando kubanza milongo mine. 14Wagenda kwa Mtambika Mkulu na Wavyele walonga, “Twiduwila sikutulanze kinhu tanhu hanakomigwa Paulo. 15Avo mweye hamonga na Luhengo lwa Nhaguso mulongeleni Mkulugenzi wa asikali, yamgale hasi kumwenu, kwa mzoko molonda kutanga nghani kivugulo chake; na tweye tombeta mnzila tumkome hanavika kumwenu.”
16Kukala na mwana wa lumbu ja Paulo yahulike msagu hiwo; keza kengila mmhongono mgati, kampetela Paulo. 17Paulo kamkema mkulu imonga wa asikali kalonga, “Msole mmhale yuno umgale kwa Mkulugenzi, kilumbo kana mbuli yolonda kumpetela.”
18Kamsola kamgala kwa yuja Mkulugenzi, kamulongela, “Paulo yuja yafungigwe kanghema kalonda, nikugalile mmhale yuno, kilumbo kana mbuli ya kukulongela.” 19Yuja mkulugenzi kamgoga mkono, wakwenhuka hambenhelo, kamuuza, “Mbuli ilihi yulonda kunongela?” 20Kalonga, “Wayuda watenda msagu, wakupule mayo umgale Paulo haluhengo lwa ikitala, giladi wamuuze goya kivugulo chake. 21Bali gweye sikuutogole, kwa mzoko wanhu bwando kubanza milongo mine welavile womsepeleza, wegondanya na kwiduwila sikuwaje hebu kungʼwa, komu wamkome Paulo; na hewo vino waika goya, wobeta vonda uwavumile.”
22Yuja imkulugenzi kamulaga yuja immhale, kamgomesa kamba sikuumulongele munhu yoyose gano gaumhetele!
Mkulugenzi Lisia kamgala Paulo Kaisaria ikilo
23Kawakema wakulu wabili wa asikali kalonga, “Ikeni goya asikali mizo mibili kuchola Kaisaria, na wakwela farasi milongo saba na wene migoha mizo mibili, wabete saa ndatu ya ikilo! 24Kawalongela, Tandikeni na nyumbu wa kumkweneza Paulo; mgaleni goya kwa Luwali Feliki!”
25Yomana kumwandikila baluwa kamba vino, 26“Klaudio Lisia kwa Luwali mwene nhogolwa Feliki, Ndamuso zako! 27Munhu yuno kagogigwa na Wayuda, walonda kumkoma, na niye hamonga na dale ja asikali nimgombeleza, kilumbo nihulika kamba heyo Mroma. 28Na niye vinondile niditange dija diwomtagusa, nimuhumulusa nimwika haluhengo lwao lwa Nhaguso. 29Nivona wamtagusa kilumbo cha bamila ja Nzuma yawo, wala haduhu mbuli yoyose imwandame kukomigwa hebu kufungigwa. 30Komu vinihulike kivugulo cha msagu wa kumkoma, kileka nimgala kumwako, niwalagiza na waja wamtaguse, walonge kumwako gaja gowomdununza. Hongela!”
31Ikilo kikija waja asikali vuwalagizwa, wamsola Paulo wamgala Antipatri. 32Vivikile imitondo waja wakwela farasi wagoga nzila, wachola hamonga na heyo; bali waja wagenda magulu wabwela kwimhongono. 33Na waja vuwavikile Kaisaria, wamwingha Luwali ija ibaluwa, na Paulo wamulava kumwake. 34Na heyo viyamalile kuisoma, kamuuza mwambu wa isi iyalawile; na viyahulike kamba munhu wa Kilikia, 35kalonga, “Nokutegeleza vonda wavike waja wakutaguse.” Kalagiza yemilizwe muna imhongono ya Herode.
Currently Selected:
Sanghano 23: ZAM75
Highlight
Share
Copy
Want to have your highlights saved across all your devices? Sign up or sign in
New Testament in Zaramo © United Bible Societies, 1975.
