Sanghano 22

Paulo kawasimulila Wayuda kamba viyagaluke mkristo

1Kawalongela, “Walume mowandugu zangu na tata zangu, nhegelezeni vinibelela hameso genu!” 2Vuwahulike kamba kolonga nawo mkiebrania, wabanza kunyamala. 3Kalonga, “Niye na Muyuda nyelekelwa Tarso, muna diwambo ja Kilikia komu nghulila mdiwambo dino na kulangukizwa na Mkulufunzi wa Inzuma Gamalieli; niifunza goya mbila za tata zetu, niyoha kumsanghanila Mulungu kamba na mweye mose vumuli lelo vino. 4Niwehila nghani waja wamtogole Yesu, kabili nizahila kuwakoma, kuwadaza na kuwagela mkifungo, wambigalo na watwanzi. 5Viyemela Mtambika Mkulu mwenyecho na Wavyele wose wa Uluhengo wonisindila kamba ngwelelwa baluwa zandikigwe kwa ndugu zetu wa Damasko, nyhole niwagoge wanhu wamtogole Yesu hiko, niwadaze na kuwagala Yerusalemu, wageligwe mkitala. 6Vinghalile nichola mnzila behi na Damasko, kipigiti cha mteguko, nyidukila mwemwe kulu kulawa kuulanga dinimwemwesa, hose hakala behaa. 7Nigwa hasi, mhulika dizwi dinongela, Saulo, Saulo, habali unigaza? 8Nimwidika, Uli nani gweye Mndewa? Kanongela, Niye nene Yesu Mnazareti, gweye uminga. – 9Na waja wakalile hamonga na niye wawona umulangaza, bali hawadihulike dija idizwi ja yuja yalongile na niye.

10Na niye nonga, Nhende choni, Mndewa? Mndewa kanilongela, Inuka wingile Damasko, hiko kolongelwa gose gagambile kusanghanwa. – 11Avija vinghalile silola kilumbo cha umulangaza umhoma gameso, ngogigwa makono na waja wayangu wanghalile nawo hamonga, nivika Damasko. 12Ako kukala na munhu tagwa jake Anania, mwene uholo, mkoleleza Inzuma, na Wayuda wose wakala womsindila. 13Heyo kanizila, kema behibehi hamwangu, kanongela, Gondugu yangu Saulo, ulole kabili! Kipigiti kikija ngolelwa kulola, nimona. 14Na heyo kalonga, Mulungu wa tata zetu kakusagula gweye ugamanye manogelwa gake, na umone Yuja Mwene ihoko wake, na kudihulika dizwi jake dilawile mmulomo wake. 15Vivo viyokulongela gweye, kogalamka msindi wangu haiwanhu wose, kugasindila magweka higo gauwene na kugahulika. 16Avo kobeta choni? inuka usingulwe, usunhigwe matozo gako gasegele, uditambikile twaga jake!

17Vinibwelile Yerusalemu, niza kutambika mngʼanda ya Mulungu, aho sinduka mmoyo. 18Nimona, na heyo kanongela, Halawe chambwisa hano Yerusalemu, kilumbo honda wakutogole uhanisindila. 19Na niye nonga, Mndewa, wavimanyile goya wenyego kamba niye nghalile niwagela mkifungo waja wakutogole na kuwasuna mzingʼanda za nhambiko. 20Avo na mulopa wa Stefano imsindi wako vuwitike, na niye nilibaho nogelwa, na kuwasepela nguwo zawo waja wamkomile. – 21Na heyo kanongela, Igendelele, kilumbo niye nokutuma kutali kwa wamhazi!”

Mkulugenzi wa Asikali katambula Uroma wa Paulo

22Baho waja vuwahulike longa dija, watowa mizangi, kuno wolonga, “Msegeze yuno mwisi, havigambile yawe mpile!” 23Vuwabasilize zija zinyangi na kuzidega nguwo zao na kutimulatimula timbwisi uchana, 24Mkulugenzi wa asikali kalagiza wamgale Paulo mmhongono mgati, kabili wamuuze kuno womtowa vibongho, giladi yavitange kilumbo cha mizangi ija. 25Vuwakalile womdaza na nzabi, Paulo kamulongela mkulu wa asikali yuja yemile kulola, “Che, mweye momsuna munhu yali Mroma, na heyo hanataguswa tanhu?”

26Yuja imkulu wa asikali viyahulike, kamgendela Imkulugenzi yuja, kampetela yolonga, “Konda kutenda choni? Kilumbo munhu hiyo Mroma.” 27Mkulugenzi keza, kamuuza, “Nongela gweye kwa Mroma?” Kalonga, “Wona.” 28Mkulugenzi kedika, “Niye niupata Uroma uno kwa kuugula na mhiya bwando.” Paulo kalonga, “Niye ndeligwa nawo.” 29Baho waja walondile kumuuza na kumtowa wamuleka; na yuja imkulugenzi viyatangile kumbe heyo Mroma, kadumba nghani kilumbo kamdaza. 30Vivikile imitondo, kalonda kuvitanga goya kamba kilihi kiyataguswe na Wayuda; kamdohola, katuma kuwakema Watambika Wakulu na Wavyele wa Luhengo wose welundize, kagala Paulo hasi kamwika behi yawo.

Currently Selected:

Sanghano 22: ZAM75

Highlight

Copy