Números 9
9
U kiinbesajil Táadz Máanbal
1Jun ja'ab máanac u jóokbal le israelitaob Egiptoo', tu yáax winalil le ja'abo', Yuumtzile' tu t'anaj Moisés tu x tocoy lu'umil Sinaí, ca'a tu ya'alaj ti': 2Le j israelitaobo' u najmal u kiinbensico'ob u kiin kujil le Táadz Máanbalo' le kiin a'ala'an u kiinbesico'obo', 3u káat u ya'ale', tu kiinil catorce le winala', tu yocnaj kiinil, je'el bix le tzolbe'en t'aan in dzaamaj u ti'al le kiinbesajilo'.
4Moisés túune' tu ya'alaj ti' le j israelitaobo', ca u kiinbeso'ob le Táadz Máanbal 5leti'obe' tu beetajo'ob beyo', tu kiinil catorce ti' le winalo', tu yocnaj kiinile', tu x tocoy lu'umil Sinaí, je'el bix tu tzolbe'en t'antaj Yuumtzil ti' Moisese'.
6Ba'ale' yaan ca'ach wa jay túul máaco'ob ma' utz yanilo'obi' tu yo'olal tu machajo'ob jun túul quimen, let o'olale' ma' tu kiinbeso'ob Táadz Máanbal ti' le kiino'; bino'ob u yilo'ob Moisés yéetel Aarón ti' le kiino', 7ca tu ya'alajo'ob ti' Moisés: to'one' dzo'oc machic jun túul quimen, let o'olale' ma' utz yanilo'oni' ¿Ma' bíin cha'abac c táanbesic ti' Yuumtzil ti'ibil óolal ti' le kiin j a'ala'ano', tu pa'ate'il yéetel le israelitaobo'? 8Moisese' tu núucaj ti'ob: Pa'ate'ex in kamic u tzolbe'en t'aan Yuumtzil a ti'ale'ex. 9Yuumtzil tu t'anaj Moisese' ca tu ya'alaj ti': A'al ti' le israelitaob lela': 10tuláacale'ex pa'ate' yéetel a ch'i'ibale'ex unaj a kiinbesique'ex le Táadz Máanbal ti' in nojbe'enilo'. Le máaxo'ob ma' utz yanilo'ob tu yo'olal tu macho'ob quimen, wa le náach yanilo'ob tu yo'olal bino'ob táanxel lu'umile', 11bíin u kiinbeso'ob tu kiinil catorce tu ca'a p'éel winalil, tu yocnaj kiinil. Unaj u jaantico'ob j taman yéetel káakaj xíiwo'ob bey xan waaj x ma' levadurail, 12ma' unaj u p'atico'ob mix ba'al u ti'al u láak kiin mix u cachico'ob mix jun p'éel u baaquel. Bíin u kiinbeso'ob le Táadz Máanbal je'el bix le tzolbe'en t'aan quin wa'alico'. 13Le máax ma' tu kiinbesic le Táadz Máanbal quex utz yanil yéetel mix náach yanile', unaj u xot kinta'al ichil u caajal. Tumen ma' tu táanbesaj u ti'ibil óolal ti' Yuumtzil le kiin jóokesa'ano', yaan u kamic u jaadzil u keban. 14Le j táanxel lu'umilo'ob cajnáalo'ob ichile'exo' unaj u kiinbesco'ob le Táadz Máanbal tin nojbe'enil je'el bix le tzolbe'en t'aan dzo'oc in wa'alico'. Le tzolbe'en t'aano'oba' u ti'al táanxel lu'umil yéetel le sijnalo'ob te j lu'uma'.
Le múuyal yóokol u najil le nup t'aano'
15Le kiin wa'acunta'abic le quili'ich najo', u káat ya'ale', u najil nup t'aan, j ba'al tumen le múuyalo'. Le quéen kuchuc ocnaj kiine' cu chíicpajal jun p'éel ba'al bey káake' tac u sáastal. 16Bey u yúuchul mantadz: yéetel kiine' jun p'éel múuyal balic, yéetel áakabe' jun p'éel ba'al bey káake'. 17Le quéen líikik le múuyal tu yóokol le quili'ich najo' le j israelitaobo' cu jóokol u binbalo'ob, le tu'ux cu wa'atal le múuyalo', ti' cu je'elelo'obi'. 18Le ba'ax cu ya'alic Yuumtzil ca u beeto'obe' le cu beetico'ob, le israelitaobo' cu xíimbalo'ob wa cu p'áatalo'ob je'elel tuláacal le kiino'ob ti' yaan le múuyal tu yóokol le quili'ich najo'. 19Wa le múuyal cu p'áatal ya'ab kiin tu yóokol le quili'ich najo', le israelitaobo' cu p'áatalo'ob te'elo' u ti'al u meyajto'ob Yuumtzil. 20Wa le múuyal cu p'áatal chéen dze'edzec kiino'ob tu yóokol le quili'ich najo', le quéen u ya'al Yuumtzil ca xíimbalnaco'obe' cu líikbal u bino'ob wa cu ya'alic ca je'eleco'obe' cu je'elelo'ob. 21Yaan kiine' le múuyalo' cu je'elel chéen yéetel áakab, cu líikil piknac kiin; leti'ob túune' cu xíimbalo'ob yéetel kiin je'el bix buul áakabe', je'el bix u bin le múuyalo' bey u bin u xíimbalo'ob. 22Wa le múuyal cu p'áatal tu yóokol le quili'ich naj ca'a p'éel kiin, wa jun p'éel winal wa jun ja'abe', le israelitaobo' cu je'elelo'ob, cu jáawal u bino'ob. 23Le quéen t'aanac Yuumtzile' cu je'elelo'ob, le quéen ca'a t'aanaque' cu líikil u bino'ob. Ba'ale' ca'aliquile' cu meyajtico'ob Yuumtzil je'el bix tu tzolbe'en t'antaj ti' Moisese'.
Currently Selected:
Números 9: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
