Números 10
10
Le jóopsaj paax beeta'an yéetel platao'
1Yuumtzile' tu t'anaj Moisés ca tu ya'alaj ti': 2Beet ca'a p'éel jóopsaj paaxo'ob yéetel plata póola'an yéetel x bajab, u ti'al ca much'lac le máaco'obo' yéetel u ti'al a dzáic u chíiculal u xíimbalo'ob. 3Le quéen jóopsa'ac tu ca'a p'éelal le paaxo', tuláacal le caajo' unaj u much'tal ta wicnal, tu jool u noj Paselil Much'tal yéetel Ku. 4Ba'ale' le quéen jóopsa'ac chéen jun p'éel le jóopsaj paaxo', cu much'tal chéen u nuuquilo'ob u múuch' cajtalil le j otochnáalo'ob. 5Wa cu juum le jóopsaj paax yéetel ka'amkach awato'obe', yaan u xíimbalo'ob le j much'lajo'ob j lakino', 6le quéen juumnac tu ca'a téene' cu xíimbal le yano'ob j noojolo'. U juum jóopsaj paax pa'ate' yéetel awato'obe' u chíiculal u dzáicuba'ob j xíimbal. 7Chéen u juum jóopsaj paax u chíiculal u much'tal máaco'ob. 8Le aj kiino'ob u ch'i'ibalo'ob Aarone' leti'ob bíin u paaxo'ob le jóopsaj paaxo'. Lela' jun p'éel a'almaj t'aan u ti'al láaj kiin. 9Wa cu taal jun túul aj p'eec u ba'atelt a lu'umile'exe' wa te'ex unaj a bine'ex j ba'atele' jóopse'ex le paaxo' yéetel awatnaque'ex ka'am. Beyo' teen Yuumtzil a Junab Kuexe', ca ka'ajale'ex tene', quin tojque'ex ti' le aj p'eeco'obo'. 10Paxe'ex le jóopsaj paaxo' le kiin yaan qui'imac óolo', je'el bix le kiin yaan kiin kujil wa yaan túumben ujo', bey xan le quéen a kube'ex láaj tóocbil yéetel quíimsbil ba'alche' u ti'al ca'a bisajbáilo'. Beyo' ca ka'ajle'ex teen. Tene' Yuumtzilen a Junab Kuex.
Le j israelitaob cu jóokolo'ob Sinaí
11U kiinil veinte ti' u ca'a winal ti' u ca'a ja'abe', j luk le múuyal yaan yóokol u quili'ich najil le nup t'aano'. 12Le j israelitaobo' jóoko'ob tu x tocoy lu'umil Sinaí ca xíimbalnajo'ob. Le múuyal túuno' je'el tu x tocoy lu'umil Parán. 13Je'el bix tu tzolbe'en t'antaj Yuumtzil ti' Moisese', 14yáax táanil cu jóokolo'ob le aj ba'atelo'ob cu xíimbalo'ob tu yáanal u lacam Judá, u aj nu'uctaj ba'atele' Naasón, u paal Aminadab. 15Natanael, u paal Zuar, dza'an ca'ach u méektáant u aj ba'atelo'ob u ch'i'ibalo'ob Isacar. 16Eliab, u paal Helón dza'an ca'ach u méektáant u aj ba'atel u ch'i'ibalo'ob Zabulón. 17Wa'ach' túun le quili'ich najo', u ch'i'ibal Gersón yéetel Merarie', jóokesa'ano'ob u ti'al bisic, ca tu cúuch queléembaltajo'ob ca jo'op u xíimbalo'ob.
18Tu paach leti'e' cu bin le aj ba'atelo'ob cu xíimbalo'ob tu yáanal u lacam Rubén, u aj nu'uc ba'atele' Elisur, u paal Sedeur. 19Selumiel u paal Zurisadai dza'an ca'ach u méektáant u aj ba'atelo'ob u múuch' cajtalil yotochnáalo'ob Simeón. 20Eliasaf u paal Reuel, dza'an ca'ach u méektáant u aj ba'atelo'ob u ch'i'ibalo'ob Gad. 21Tu paacho'obe' cu bin ca'ach u ch'i'ibalo'ob Coat, máaxo'ob bisic le quili'ich nu'uculo'ob. Le quéen cóojoco'ob ca'ach le cu taalo'ob paachilo' leti'obe' dzo'oc u wa'acuntico'ob le quili'ich najo'.
22Cu dzo'ocole' cu xíimbal le u aj ba'atelo'ob yano'ob tu yáanal u lacam Efraino', u nojchile' Elisama, u paal Amiud. 23Gamaliel u paal Pedasure', dza'an ca'ach u méektáant u aj ba'atelo'ob u ch'i'ibalo'ob Manasés. 24Abidán, u paal Gedeone' dza'an ca'ach u méektáant u aj ba'atelo'ob u ch'i'ibalo'ob Benjamín.
25Tu dzooque', tu paach u láak aj ba'atelo'obe' cu xíimbalo'ob ca'ach tu yáanal u lacam Dan, dza'an ca'ach u méektáantico'obe' Ahieser, u paal Amisadai. 26Pagiel, u paal Ocrán dza'an ca'ach u méektáant u aj ba'atelo'ob u ch'i'ibalo'ob Aser. 27Ahira, u paal Enán dza'an ca'ach u méektáant u aj ba'atelo'ob u ch'i'ibalo'ob Neftalí.
28Lela' leti' u tzoolol xíimbalnajico'ob u aj ba'atelo'ob Israel le kiin cu jóokol u binbalo'obo'.
Moisese' cu t'anic u baal u ti'al j láakintico'ob
29Jun p'éel kiine' Moisese' tu ya'alaj ti' u baal Hobab, u paal Reuel j madianil: To'one' ti' c bin te j lu'um u séeb chi'itmaj Yuumtzil u dzáic to'ono'. Co'oten t éetel je'el c bisicbáa utz ta wéetele', tumen Yuumtzile' u séeb chi'itmaj u yaacuntic Israel.
30Ba'ale' Hobabe' tu núucaj ti': ma', tene' in káat suut tin lu'um tu'ux yaan in láako'ob. 31Moisés tu sen a'alaj ti' ma' a bin. Teche' a kaj óol ma'alob le tu'ux cu páajtal u yúuchul je'elel te x tocoy lu'umo', yéetel cu páajtal a we'esic to'on tu'ux je'el u páajtal c bine'. 32Wa ca taal t éetele' je'el c muulan ti'alintic ta wéetel tuláacal u ma'alobil le ba'ax bíin u dzáa to'on Yuumtzilo'.
33Bey túuno', j bino'ob tu pu'uc Yuumtzil ca xíimbalnajo'ob óox p'éel kiin. Tu táan leti'obe' cu bin u ba'asche'il u Nup t'aan Yuumtzil, u ti'al u caxtic tu'ux u je'elelo'ob. 34yéetel kiine' chéen p'el u jo'op'ol u bino'obe', u múuyal Yuumtzile' ti' yaan tu yóokolo'obe'. 35Chéen p'el u bin le ba'asche'o' Moisese' cu ya'alic:
¡Líiken Yuumtzil!
¡Ki'itpajac a aj p'eeco'ob!
¡Le quéen u yilecho'obe' púudzuco'ob le aj p'eeco'obo'!
36Ba'ale' le quéen jáawac u bin le ba'asche'o', cu ya'alic Moisés:
¡Yuumtzil bejela'e' suunen,
ti' u ya'abcach aj ba'atelo'ob Israel!
Currently Selected:
Números 10: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
