Números 21
21
Cu ch'a'abal Horma tumen Israel.
1Le ca tu yu'ubaj u ajaw le j cananitaob ti' u caajil Arad, le cajacbal Néguev, táan u taal le j israelitaob tu bejil Atarime', jóok ba'atel yéetelo'ob ca tu machaj dze'edzec ti'obi'. 2Le israelitaob túuno' tu séeb chi'itajo'ob ti' Yuumtzil, wa leti' cu yáantico'ob u ti'al u ch'a'ob le lu'umo', bíin u láaj xu'ulso'ob tuláacal le caajo'obo'. 3Yuumtzile' tu dzaj ti' le israelitaob le ba'ax tu káatajo'obo', ca tu yáantajo'ob u ti'al u pa'ic u muuk le j cananeobo' bey xan u caajilo'obo', le t o'olale' tu dzajo'ob u kaaba' le cúuchilo' Horma.
Ba'ax o'olal beeta'abic jun p'éel caan bronce u ca'aj
4Le israelitaobo' jóoko'ob tu pu'uquil Hor u ti'al u binbalo'ob tu bejil chac ka'anab, xíimbalnajo'ob tu bakpach u ti'al ma' u máano'ob tu lu'umil Edom. Te j bejo', le máaco'obo' j náac u yóolo'ob 5ca jo'op' u ya'alico'ob ba'al tu yo'olal Ku yéetel tu yo'olal Moisés. Táan u ya'alico'ob beya': ¿ba'ax u biilal ta jóoksajo'on Egipto? ¿U ti'al a beetic c quíimil te x tocoy lu'uma'? mina'an to'on ja' mix janal ¡dzo'oc u na'acal c óol ti' le óotzil janala'!
6Yuumtzile' tu túuxtaj j chi'ibal caano'ob u ti'al ca chi'ibico'ob, ya'abcach ti' le israelitaobo' j quíimo'ob. 7Bino'ob túun te tu'ux yaan Moisese' ca tu ya'alajo'ob ti': ¡Dzo'oc kebantal úuchic c a'alic ba'al tu yo'olal Yuumtzil yéetel ta wo'olal! ¡káat óolt ti' Yuumtzil ca u náachcunt ti' to'on le caano'obo'! Moisese' tu káataj ti' Yuumtzil ca u sa'ats u si'ipilo'ob le j israelitaobo', 8Yuumtzile' ca tu ya'alaj ti': Beet jun p'éel caan je'el bix lelo'obo', dzáa tu che'il jun p'éel lacam. Le quéen chi'ibic wa máax tumen jun túul caane' cu pactic le caan beeta'an yaan te j che'o' beyo' cu yutztal.
9Moisese' tu beetaj jun túul caan bronce u ca'aj, ca tu dzaj tu che'il jun p'éel lacam, wa máax cu chi'ibil tumen jun túul caane', chéen p'el u pactic le caan bronce u caajo' cu yutztal.
U jejeláas cúuchilo'ob je'elel
10Le j israelitaobo' xíimbalnajo'obe' ca je'elo'ob Obot. 11Obote' xíimbalnajo'ob tu ca'a tene' ca j je'elo'ob Ije-abarim, te x tocoy lu'umo', tu lakin u lu'umil Moab. 12Te'elo' xíimbalnajo'ob tac ca je'elelo'ob tu t'o'ol ja'il Zered. 13Cu dzo'ocole' xíimbalnajo'ob tu ca'a tene' ca j je'elo'ob tu láak u tzéelil u áalcab ja'il Arnón. Le áalcab ja'o' ti' yaan te x tocoy lu'umo' jilicbal tu lu'um le j amorreobo', cu meyaj u ti'al u ye'esic u xuul u lu'umil Moab yéetel le j amorreobo'. 14Lela' leti' cu ya'alic u dzíibil ju'unil u ba'atelo'ob Yuumtzil.
J máano'on Vaheb, tu lu'umil Sufá,
tu t'o'ol ja'ilo'ob yéetel tu tojil Arnón,
15jun tzéel le t'o'ol ja'ob
cu jiltal tac u kuchbal Ar
le cu kuchulo'ob tac tu'ux cu xu'ulul u lu'umilo'ob Moab.
16Tu yáalcab ja' Arnone' xíimbalnajo'ob tac Beer. Tu'ux yaan le ch'e'en tu'ux tu ya'alaj Yuumtzil ti' Moisés: Much'quint le caajo' ca in dzáa ja' ti'ob 17Ti' le kiino' kaaynajo'ob le israelitaobo':
¡Tóop', u ja'il ch'e'en!
¡kaaynene'ex ti' le ch'e'eno'!
18¡U nojchilo'obe' tu páanajo'ob yéetel u che'il u tusbeelo'ob,
U nuuquilo'ob le caajo' tu páanajo'ob yéetel u xóolte'ob!
Te j x tocoy lu'umo' xíimbanajo'ob tac Matana; 19ti' Matanae' tac Nahaliel, Nahaliele' tac Bamot, 20Bamote' tac tu táax kóom lu'umil Moab tu tojil u ca'analil Pisga, tu'ux cu páajtal u yila'al le x tocoy lu'umo'.
Israele' cu pa'ic u muuk u ajawil Sehón
21Le j israelitaob tu túuxtajo'ob dze'edzec aj bisaj t'aano'ob ti' Sehón, u ajaw le j amorreobo', u ti'al u ya'alo'ob ti': 22C Káat káatal ta lu'umil. Ma' bíin máanaco'on ichil a coole'exi', mix ichil a pakal uvaex, mix bíin c uk u ja'il a ch'e'ene'exi'. Bíin káataco'on ta lu'umile' ti' le noj bejo'.
23Ba'ale' Sehone' ma' tu cha'aj u káatal le j israelitaob tu lu'umilo'ob, Ba'ale' tu much'quintaj u aj ba'atelo'ob ca j jóok u nactáanto'ob te x tocoy lu'umo', le ca j cóojo'ob Jahazae' tu pulajuba'ob yóokolo'ob. 24Ba'ale' le j israelitaobo' tu tocajuba'ob ca tu pa'ajo'ob u muuk, ca tu ch'a'ajo'ob u lu'umilo'ob líikbal tu áalcab ja'il Arnone' tac tu áalcab ja'il Jaboc, u káat ya'ale' le tu'ux cu xu'ulul u lu'umil le j amonitaob, kala'an ca'ach yéetel tuulumo'. 25Beyo' Israele' tu ch'a'aj tuláacal u caajilo'ob le j amorreobo', lelo'oba', Hesbón yéetel u mejen caajilo'ob, ca j p'áato'ob cajtali'. 26Hesbón ca'ache' le caaj tu'ux caja'an Sehón u ajawil le amorreobo'. Sehone' dzo'oc u ba'atel ca'ach yéetel u máanja'an ajaw Moab ca tu lukesaj ti'e' tuláacal u lu'um tac tu'ux cu yáalcab u ja'il Arnón. 27Let o'olale' le aj kay t'aano'obo' cu ya'alico'ob:
¡Co'otene'ex Hesbón,
u noj caajil ajaw Sehón!
¡utzquinte'ex, dza'ex u tuulumilo'ob!
28Hesbone', u caajil sehón,
Tóoch'balnaj u káakilo'ob jun p'éel tóoc,
tu láaj tóocaj Ar tu lu'umil Moab
tac u ca'analilo'ob tu'ux cu páajtal u yila'al Arnón
29¡óotzilech Moab!
¡saatalech, u caajil ku Quemós!
Leti'e' tu p'ataj ca púudzulo' a j xiibilo'obo'
a x ch'uupo'obe' lúubuco'ob tu kab ajaw Sehón.
30J pa'ab u páajtalil Hesbón;
tu caajil Dibón tac Nofa tuláacal láaj suunaj x lab caajil,
le káako' kuch tac Medeba.
Israele' cu pa'ic u muuk Og u ajaw Basán
(Dt 3.1-11)
31Beyo' Israele' tu ch'aj u lu'umil le j amorreobo', 32Moisés xane' tu túuxtaj dze'edzec máaco'ob u ti'al xakalt ilic u caajil Jaser, le j israelitaobo' tu ch'a'ajo'ob le caajo'ob yaan tu tzéelo' ca tu jóokeso'ob le j amorreob caja'ano'ob te'elo'. 33Cu dzo'ocole' suunajo'ob tu tojil Basán, Ba'ale' Og, u ajawil Basane' jóok ba'atel yéetel u aj ba'atelo'ob tac Edrei. 34Yuumtzil túune' tu ya'alaj ti' Moisés: Ma' a ch'a'ic sajaquil, tumen teen bíin in dzáa ta kab u lu'umilo'ob, pa'ate' yéetel u aj ba'atelo'ob, teche' bíin a pa'a u muuko'ob je'el bix ta beetaj yéetel Sehono' u ajaw le j amorreobo' caja'an ca'ach Hesbono'.
35Beyo' le j israelitaobo' tu quíimso'ob Og, u paalal, yéetel tuláacal u aj ba'atelo'ob. Ma' tu p'atajo'ob mix máac cuxa'anil, ca tu ch'a'ajo'ob u lu'umo'ob.
Currently Selected:
Números 21: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
