Éxodo 9
9
U báan quíimilil wacaxo'ob
1Yuumtzil túune' tu ya'alaj ti' Moisés: Xeen a wila'a' faraone' ca a wa'al ti': Bey cu ya'alic Yuumtzil u Ku le j hebreoba': Cha'a u bin in caajal u ti'al u kulten. 2Wa ma' ta cha'ic u bino'obe', ba'ale' bin u bin a pechicabáe', 3Yuumtzile' bíin u láal u páajtalil tu yóokol a wacaxo'ob yaan te j káaxo', yéetel talam koja'anilo'ob. Bíin quíimic a tzíimino'ob, a burro'ob, a camello'ob, a wacaxo'ob yéetel a j tamano'ob. 4Ba'ale' Yuumtzile', bíin u ye'es máacalmáac u wacaxo'ob le israelitaobo', bey xan máacalmac u ti'al le j egipciobo', tumen ma' bíin quíimic mix jun túul u wacax le j israelitaobo'.
5Yuumtzile' tu xot'aj u kiinil ca tu ya'alaj: Sáamal bíin úuchuc beyo'.
6Tu láak kiine', Yuumtzile' tu beetaj beyo'. Tuláacal u wacaxil Egiptoe' j quíimi, ba'ale', u wacaxil Israele' mix jun túul j quíimi'. 7Faraone' tu túuchi'itaj ilbil u wacaxil Israele', ca j ila'ab mix jun túul j quíimi', ba'ale' tu pechubáe', ma' tu cha'aj u jóokol le j israelitaobo'.
U báan koja'anil noj yajil
8Yuumtzil túune' tu ya'alaj ti' Moisés yéetel Aarón:
Ch'a'ex ca'a lóoch' u ta'anil u káakil chujcabe', ca pu'uluc ca'anal tu táan faraón tumen Moisés. 9Le ta'ano', bíin suunac u ma'ay lu'um u ti'al ki'itpajal yóokol tuláacal u lu'umil Egipto u beet u noj yajtal u wíinclil tuláacal u máaquilo'ob yéetel u ba'alche'ilo'ob Egipto.
10Moisés yéetel Aarone', tu ch'a'ajo'ob u ta'anil káakil le chujcabo' ca j bino'ob u yilo'ob faraón. Te'elo' Moisese' tu pulaj u ta'anil u káakil chujcab ca'anal tu táan faraone', ca j buul yajchaj u wíinclil máaco'ob bey xan le ba'alche'obo'. 11Le j meeno'obo', ma' páatchaj u quetico'ob ba'ax tu beetaj Moisesi', tumen buul yajchaj xan u wíinclilo'ob je'el bix le j egiptciobo'. 12Ba'ale' Yuumtzile' tu beetaj u pechicubáa faraón u ti'al ma' u táan óoltic ba'ax cu ya'alic Moisés yéetel Aarón, Je'el bix u ya'almajil Yuumtzil ca'ach ti' Moisés.
Cu báanal bat
13Yuumtzil túune' tu ya'alaj ti' Moisés: Líiken ja'atzcab sáamale', ca xi'iquech a wa'al ti' faraón. Bey dzo'oc u ya'alic Yuumtzil u Ku le hebreoba': cha'a u bin in caajal u ti'al u kulten; 14tumen bejela'e' bíin in ca in láaj túuchi'it tuláacal in báan quíimilo'ob ta wóokol, tu yóokol u nuuquil a aj meyajo'ob yéetel yóokol a caajal, u ti'al a wojéeltic mina'an yóokolcaab mix máac je'el bix tene'. 15Tene' páatchaj ca'ach in we'esic teech in páajtalil u ti'al in jadziquech pa'ate'e' yéetel a caajal ich jun p'éel j báan quíimil, bejela'a' dzo'oc ca'ach a sa'atal way yóok lu'ume'; 16Ba'ale' tin p'ataj a cuxtal yo'olal a wilic in páajtalil, yéetel u ti'al in dzáiquimbáa kaj óoltbil ti' tuláacal lu'um. 17Quex tumen beyo', xi'ic u bin a pechicabáa u ti'al ma' cha'ic u jóokol in caajal. 18¡Ma'alob beyo'! Walquil sáamala' bíin in beet u káaxal ka'ancach bat je'el bix mix jun téen ila'an u káaxal tuláacal u kiinilo'ob Egiptoo'. 19Let o'olale' túuchi'it ca dza'abac ti' ma'alob cúuchil a wacax yéetel tuláacal ba'ax yaan teech te j káaxo', tumen le bat bíin káaxaco' yaan u quíimsic tuláacal le máaco'ob yéetel le ba'alche'ob mina'ano'ob yáanal naje'.
20Jujun túul ti' u nuuquil u aj meyajo'ob faraone' tu ch'a'ajo'ob sajacquil ti' le t'aan tu dzáa Yuumtzilo', ca tu yocsajo'ob u palitzilo'ob yéetel u wacaxo'ob ich naj; 21ba'ale' j yanchaj u láako'ob tu biso'ob bey báaxlile', ca tu p'atajo'ob u wacaxo'ob chéen jáanpike'enil. 22Yuumtzil túune' tu ya'alaj ti' Moisés: Líikes a kab j ca'an u ti'al ca káaxac bat tuláacal Egipto yóokol máaco'ob yéetel yóokol ba'alche'ob, bey xan yóokol tuláacal u che'ilo'ob u coolilo'ob Egipto.
23Moisese' tu líikesaj u kab j ca'ane', ca j túuchi'ita'ab tumen Yuumtzil quíilbal yéetel jaadz cháaco'ob, yéetel u káaxal bat tu yóokol le lu'umo'. Tu beetaj u káaxal bat tuláacal Egipto, 24j káax bat yéetel u jaadz cháac x ma' je'elelil. Tuláacal u kiinilo'ob Egiptoe', mix jun téen ca'ach káaxac bat sen ka'am. 25Le bato' tu kascuntaj tuláacal ba'ax yaan ca'ach tu lu'umil Egipto: tu xu'ulsaj máaco'ob, ba'alche'ob yéetel tuláacal u che'ilo'ob káax, tu ca'acachaj xan u kab u che'ilo'ob tuláacal le lu'umo'. 26Quex bey úuchico', tu lu'umil Gosén tu'ux cajnáal ca'ach le j israelitaobo', ma' j lúub mix jun p'éel bati'.
27Faraón túune' tu túuchi'itaj t'anbil Moisés yéetel Aarone', ca tu ya'alaj ti'ob:
Quin kaj óoltic dzo'oc in kebantal. Le si'ipila' in ti'al yéetel in caajal, ma' u ti'al Yuumtzili'. 28Dzo'oc u sen quíilbal cháac yéetel dzo'oc u sen káaxal bat, let o'olale', ma' bíin in ca'aj in xancunse'exi'. Payalchi'inene'ex ti' Yuumtzil t o'olale' ca in cha'a a bine'ex.
29Ca j núuca'ab ti' tumen Moisés:
Chéen p'el c jóokol ti' le caaja', quin líikesic in kab ti' Yuumtzil u ti'al payalchi'. Bíin jáawac túun u káaxal bat, bey xan bíin xu'uluc u quíilbal le cháacobo', yo'olal a wojéeltic Yuumtzil u yuumil tuláacal lu'um. 30Ba'ale' tene' in wojel, mix ti' teech, mix ti' u nuuquil a aj meyajo'ob yaan u sajacquil Ku Yuumtzil.
31U paakalilo'ob lino yéetel cebadae', j kascunta'abo'ob, tumen le cebadao' táan ca'ach u yi'ijanquil, le lino' xano' táan ca'ach u loolanquil. 32Ba'ale' le trigo yéetel centeno',#9.32 Centeno: jun p'él neek bey trigoe'. ma' j úuch mix ba'al ti'obe', tumen ma' jóokco'ob ca'achi.
33Le ca jóok Moisés ti' le caaj cu dzo'ocol u lukul yicnal faraono', tu líikesaj u kab ti' Yuumtzil ich payalchi'. Tu séeblaquil jáaw u káaxal bat yéetel ja', bey xan jáaw u quíilbal cháaco'ob. 34Ba'ale' le ca tu yilaj faraón dzo'oc u jáawal u káaxal ja' yéetel bat bey dzo'oc u jáawal u quíilbal cháacobe', kebanchaj tu ca'a téen. Ma' chéen leti' tu pechubái', ba'ale' tu pechubáa xan u nuuquil u aj meyajo'ob. 35Faraone' tu pechubáa ma' tu cha'aj u jóokol le j israelitaob je'el bix u ya'almajil Yuumtzil ti' Moiseso'.
Currently Selected:
Éxodo 9: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
