Éxodo 33
33
Kue' cu túuchi'itic u ángel táanil ti' Israel
1Yuumtzile' tu ya'alaj ti' Moisés: Péecsabáa xeen, bis le caaj ta jóokesaj Egiptoo', Xeene'ex te j lu'um tin séeb chi'itaj ti' Abraham, ti' Isaac yéetel ti' Jacob, bíin in dzáa ti' u ch'i'ibalo'obo'. 2Tene' bíin in túuchi'it in ángel u nu'ucbes te'ex le bejo', bíin xan in láaj tzel ti' le lu'um le j cananeob, le j amorreob, le j hititaob, le j ferezeob, le j heveob yéetel le j jebuseob. 3Xeene'ex te j lu'um tu'ux cu yáalcab bey ja' leche yéetel caab. Ba'ale' tene' ma' bíin xi'iquen ta wéetele'exi', tumen ma' xan ca in xu'ulse'ex te j bejo', te'exe' ma' ta éejemtique'ex ba'ax jaaj.
4Le caajo' j óotzilchaj yóol le ca tu yu'ubaj le t'aano'ob beya', mix máac tu dzáa u co'ocoj ba'alo'ob, 5tumen Yuumtzile' dzo'oquili' ca'ach u ya'alic ti' Moisese': A'al ti' le j israelitaob beya': Te'exe', máaque'ex ma' ta éejemtique'ex ba'ax jaaj. ¡Wa ti' yanen ichile'exe' quex chéen jun súutuque', je'el in xu'ulsique'exe'! Bejela'a' túune', lukese'ex a co'ocoj ba'ale'ex, ca in wila'a ba'ax quin in beet ta wéetele'ex.
6Líikbal tu pu'uquil Horebe', le j israelitaobo', jáaw u dzáico'ob u co'ocoj ba'alo'ob.
U noj Paselil Ku
7Moisese', tu ch'a'aj le noj Paselo' ca tu dzáa chan náach te tu'ux jelecbal le caajo', ca tu dzáa u kaaba'int, nuptáanbalil yéetel Ku. Wa yaan máax u káat t'aan yéetel Ku ca'ache', cu bin te noj pasel yaan ca'ach tu paach le tu'ux jelecbal le caajo'. 8Le quéen jóokoc Moisés u binbal ca'ach te tu'ux jelecbal le caajo', tuláacal le máaco'obo' cu p'áatalo'ob wa'alacbalo'ob tu jool u paselo'ob u ti'al u pactico'ob u bin Moisés tac u yocbal ti' le noj paselo'. 9Chéen p'el ca'ach u yocol Moisés ichile', le jun t'o'ol múuyalo' cu yéemel yéetel cu je'elel tu jool le noj Paselo', ca'aliquil táan u t'aan Yuumtzil yéetel Moisés. 10Le quéen u yila'a' ca'ach le máaco'ob u je'elel le jun t'o'ol múuyal tu jool le noj Paselo', tu jujun túulilo'obe', cu xoltalo'ob u kulto'ob Ku tu jool u paselo'ob.
11Kue' cu t'aan ca'ach yéetel Moisés táan u paaclan ilicuba'obo' je'el bix u t'aan máac yéetel u yéet bisajbae', cu dzo'ocole' cu sut ca'ach te tu'ux jelecbal le caajo'. Ba'ale' Josué u paal Nun j táanquelem xi'ipal máax áantic Moisese', ma' teech u jóokol ca'ach ichil le noj Paselo'.
Yuumtzile' cu ye'esic u nojbe'enil ti' Moisés
12Moisese' tu ya'alaj ti' Yuumtzil: Ile teche' táan a wa'alic teen ca in nu'uct u beel le caaja', ba'ale' ma' a wa'al teen máax bíin áantiquen. Táan xan a wa'alic ca wocsic a wóol ti' teen, bey xan dzo'oc in lúubul utzil ti' teech. 13Wa jaaj beyo', dzáa in wojéelt ba'ax bíin a beete, ca páatchajac xan in wocsic in wóol ti' teech, u ti'al ma' u xóot'ol in kamic a wutzil. Ka'ajac teche', le caaja', a caajal.
14Yuumtzile' tu ya'alaj Teen bíin in láakintech yéetel bíin in beet a je'elel.
15Ba'ale' Moisese' tu núucaj: Wa ma' bíin xi'iquech t éetele', ma' beetic c jóokol waye'. 16Tumen wa ma' ta láakintico'one', ¿bix túun je'el páajtal u yojéelta'al to'one' a caajalo'on, c xoc xan yéetel a wutzil? Chéen beyo', a caajal tin wéetele' je'el u páajtal u yila'al c jela'anil ti' u láak caajo'ob yóok lu'ume'.
17Tu ya'alaj Yuumtzil: Le ba'ax dzo'oc a wa'alica' bin in ca'aj xan in beete, tumen quin wocsic in wóol ti' teech, yéetel ca lúubul utzil ti' teen.
18Moisese' tu káat óoltaj: ¡Cha'a in wilic a nojbe'enil!
19Ba'ale' Yuumtzile' tu núucaj: Bíin in beet u máan ta táan tuláacal in wutzil, ta táan xane' bíin in wa'al in kaaba'. Bíin in ch'a'a óotzilil ti' le máax in káat in ch'a'a óotzilile', bey xan bíin okom óolnac in pucsi'ikal le je'el máax in káate'. 20Ba'ale' quin dzáic a wojéelt ma' bíin páatchajac a wilic u táan in wichi', tumen mix máac je'el u páajtal u yilic u táan in wich, wa ma' yaan u quíimil.
21Tu ya'alaj xan Yuumtzil: Ile, way tin tzéele', yaan jun p'éel cúuchil. Wa'alen tu yóokol le nojoch tuunicha'. 22Le quéen máanac in nojbe'enile', quin dzáiquech ti' jun p'éel u jool le nojoch tuunicha', quin baliquech yéetel in kab tac u dzo'ocol in máan. 23Cu dzo'ocole', quin lukesic in kabe', cu páajtal a wilic in paach; Ba'ale' u táan in wiche', ma' unaj u yila'ali'.
Currently Selected:
Éxodo 33: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
