Éxodo 32
32
1Le ca j ila'ab tumen le j israelitaob táan ca'ach u xáantal u yéemel Moisés ti' le pu'uco', j much'lajo'ob tu bak paach Aarón, ca tu ya'alajo'ob ti': Séeba'an, beet to'on kuob u ti'al u nu'ucto'ob c beel, tumen ma' c ojel ba'ax dzo'oc u yúuchul ti' Moisés le máax jóokeso'on Egiptoe'.
2Ca j núuca'ab ti'ob tumen Aarón: Lukese'ex le tuupo'ob yaan tu xiquino'ob a watane'ex, a j xibil paale'ex yéetel a x ch'upul paale'ex oro u ca'ajo'obo' ca a taase'ex teen waye'.
3Tuláacalo'ob tu lukesajo'ob tu xiquino'ob le tuupo'ob oro u ca'ajo'obo' ca tu bisajo'ob ti' Aarón, 4Leti'e' tu kamaje', ca tu joyaj le oro'; tu póolaj yéetel jun p'éel cincel bey úuchic póolic jun p'éel chan wacaxo'. Leti'ob túune' tu ya'alajo'ob: ¡Israel lela' a ku máax jóokesech Egipto!
5Le ca tu yilaj Aarón lela', tu líikesaj jun p'éel u multuunil kultaj tu táan le chan wacaxo', cu dzo'ocole' j awat t'aanaji: ¡Sáamale' bíin c beete'ex kinbesajil ti' u nojbe'enil Yuumtzil!
6Tu ja'atzcabil u láak kiine', j líiko'ob u kubo'ob tóocbil ti'ibil óolal, yéetel u quíimsbil ba'alche'ob u ti'al ca'a bisajbáil. Cu dzo'ocole' le caajo', j culaj janal yéetel ukul, cu dzo'ocole', ca j líiko'ob u qui'imaccuns u yóolo'ob. 7Yuumtzil túune' tu ya'alaj ti' Moisés: Séeba'an, éemen, tumen le caaj ta jóokesaj Egiptoe', dzo'oc u kastal. 8Jach séeba'an tu p'atilaco'ob le bej tin wa'alaj ti'ob ca u xíimbalto'obo'. Dzo'oc u póolico'ob jun p'éel chan wacax joybil oro u ca'aj, táan xan u kultico'ob yéetel táan u kubico'ob ti'ibil óolalo'ob ti'; táan u ya'alico'ob: ¡Israel, je'el a ku máax jóokesech Egiptoa'!
9Yuumtzile' tu ya'alaj xan ti' Moisés: Dzo'oc in kaj óoltic le máaco'oba', dzo'oc in wilic sen dzu'uy u pucsi'ikalo'ob. 10¡Bejela'e', tzelaba'ex tin táan, tumen sen p'uja'anen, bíin in ca'aj in xu'ulso'ob! Ba'ale' ta wéetele' bíin in beet jun p'éel nojoch múuch' caaj.
11Moisés túune', tu yóoltaj u jóoms yóol Yuumtzil u Ku yéetel le t'aano'oba': Yuumtzil, ¿ba'axten ca sen p'u'ujul ti' le caaj ta jóokesaj ta kabil tu lu'umil Egipto yéetel a nojoch páajtalilo'? 12¿Bix bíin a cha'a u ya'alal tumen le j egipciobo': Kue' tu jóokeso'ob chéen yéetel u loolob tuucul u quíimsico'ob te j witzo'ob u ti'al u tzelico'ob way yóok lu'uma'? Jóomoc a wóol, lukes ta tuucul a xu'ulsic a caajal. 13Ka'ajac teech Abraham, Isaac yéetel Jacob a palitzilo'ob, ti' máaxo'ob ta jalach t'antaj ta kaaba' le ca ta wa'alaj ti'ob: Bíin in beet u sen ya'abtal a ch'i'ibale'ex je'el bix u eekilo'ob le ca'ano', cu dzo'ocole' tuláacal le lu'um in wa'almaj in dzáic te'exa', bíin in dzáa u ti'alinto'ob u ti'al ja'abo'ob mina'an u xuul.
14Yuumtzile' tu lukesaj tu tuucul le ba'ax tu ya'alaj u beetic ca'ach ti' u caajalo'. 15Moisés túune', jo'op' u yéemel ti' le pu'uc u machmaj le ca'a p'éel u jaajay tuunichilo'ob le a'almaj t'aan, dzíibta'ano'ob tu ca'a tzéelilo'obo'. 16Ku tu kabil tu beetaj le jaajay tuunicho'obo', Ku xan tu kabil tu dzáa u dzíibilo'ob.
17Le ca tu yu'ubaj Josuee' u jun awat le máaco'obo', tu ya'alaj ti' Moisés: táan u yu'uba'al u yawatilo'ob ba'atel te tu'ux jelecbal le caajo'.
18Ba'ale' Moisese' tu núucaj: Ma' u kaayilo'ob u qui' óolalil dzáanche'etaji', mix u kaayilo'ob okom óolalil lúubulili'; yaanal kaayo'ob quin wu'uyic.
19P'elac náadzic Moisés te tu'ux jelecbal le caajo', tu yilaj le chan wacax yéetel le óokoto'obo', ca j sen p'u'uji, ca tu táaj pulaj tu chuun le pu'uc, le ca'a p'éel jaajay tuunicho'ob ca j xe'exe'et'paji 20tu séeblaquil tu machaj le chan wacax oro u ca'ajo' ca tu pulaj káak, cu dzo'ocole' tu mamay juch'aj, ca tu tosaj yóokol le ja'o'; ca túun tu beetaj u yu'ukul le ja' tumen le j israelitaobo'. 21Leti'e' tu ya'alaj ti' Aarón: ¿Ba'ax tu beetaj teech le caaj, úuchic a beetic u sen kebantala'?
22Aarone' tu núucaj: In yuum, ma' a p'u'ujul tin wéetel. Teche' ma'alob a wojelil, le caaja' utz tu yóol u beetic ba'al kaas. 23Leti'obe' tu ya'alajo'ob teen: Beet to'on jun túul ku u ti'al u nu'uct c beel, tumen ma' c ojel ba'ax úuch ti' Moisés máax jóokeso'on Egiptoo', 24Tene' tin núucaj ti'ob: Le máax yaan oro ti'e' u taas teen. Leti'obe' tu taasajo'ob teen le oroo', tene' tin pulaj káake' ¡ca j jóok le chan wacaxa'!
25Moisese' tu yilaj saatal yóol le caajo', bey xan táan u dzáico'ob tu'ux u dzáanche'eta'alo'ob tumen u aj p'eeco'ob, tumen Aarone' ma' páatchaj yéetelo'obi', 26wa'alaj túun tu jool tu'ux jelecbal le caajo' ca tu ya'alaj: Le máaxo'ob yano'ob tu tzel Yuumtzile' u much'uba'ob tin wicnal. Tuláacal le j levitaob, tu much'uba'ob yéetel. 27Moisés túune' tu ya'alaj ti'ob: bey cu ya'alic Yuumtzil u Ku Israela': Ch'a'ex a máascabe'ex tu' jujun túulile'exe' suunene'ex te je'elcabil caajo', jooltaquil naj bin a ca'aje'ex ocol u ti'al a quíimsique'ex a láake'ex, a wéet bisajba'ex, bey xan le máax cajnáal tu tzéel a wotoche'ex.
28Le j levitaobo' tu dzo'ocbeso'ob u t'aan Moisese' ca tu quíimso'ob míin tres mil máaco'ob ti' le kiino'. 29Moisés túune' tu ya'alaj ti'ob: Bejela'e' ca kamique'ex chuca'an páajtalil tu táan Yuumtzil, tumen ta xachjaba'ex ta jujun túule'exe': ti' a paalal, bey xan ti' a láake'ex. Let o'olale' bejela'e' Yuumtzile' cu qui' t'antique'ex.
30Tu láak kiine' Moisese' tu ya'alaj ti' le máaco'obo': Te'exe' dzo'oc a sen kebantale'ex. Bejela'e' bin in ca'aj na'acal tu'ux yaan Yuumtzil in wu'uy wa je'el u sa'atsic a si'ipile'exe'.
31Beyo', Moisese' j suunaj tu'ux yaan Yuumtzile' ca tu ya'alaj ti': Tu jaajile' le caaja' sen kebanchaj iquil tu beetilac jun p'éel ku oro u ca'aj. 32Tene' quin káat óoltic teech ca sa'ats u si'ipilo'ob; Ba'ale' wa ma' ta sa'atsic u si'ipilo'obe', ¡tup in kaaba' ta dzíibil ju'un!
33Ba'ale' Yuumtzile' tu núucaj: Chéen bíin in tup u kaaba' le máax cu bin j kebanchajal tin táane'. 34Bey túuno', xeen a bis le caaj ti' le cúuchil tin wa'alaj teche'. In ángel bíin u bisech. Chéen ba'ale' le quéen kuchuc u kiinil le jaadzo', bíin in ja'adzo'ob ti'olal u kebano'ob.
35Yuumtzile' tu túuchi'itaj jun p'éel báan koja'anil yóokol le caaj úuchic u kultic le chan wacax tu beetaj Aarono'.
Currently Selected:
Éxodo 32: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
