Éxodo 25
25
Ti'ibil óolalo'ob u ti'al quili'ich naj
(Ex 35.4-9)
1Yuumtzile' tu t'anaj Moisese' ca tu ya'alaj ti': 2A'al ti' le j israelitaob ca u molo'ob jun p'éel ti'ibil óolal in ti'al. Unaj u molico'ob ichil máaxo'ob taac u dzáico'ob yéetel jaaj óolal bey xan yéetel tuláacal pucsi'ikal; 3Unaj u much'quintco'ob oro, plata, cobre, 4chacpuke'en nook, chacjope'en nook, chac nook, jáaytzile'en lino, u tzo'otzel j taman, 5u kéewel j taman chac bona'anil, ma'alob kéewelo'ob,#25.5 Ma'alob kéewelo'ob: míin leti' u káat u ya'alée. Ich hebreoe' ma' jach ojéela'an ba'ax ti' ba'alche'il u taali', yaan dzíibo'ob cu ya'alic u kéewelil j chi'ic. u che'il acacia, 6aceite u ti'al sáaso'ob, qui'iboc ba'al u ti'al u beeta'al u aceiteil jun páaycunaj yéetel u ti'al u beeta'al qui'iboc poom, 7u tuunichilo'ob cornalina yéetel u láak jadzutz tuunicho'ob, u ti'al t'ilcuntbil tu efod yéetel u pix tzeem nojoch aj kiin. 8Beete'ex teen jun p'éel quili'ich naj u ti'al in cajtal ichilo'ob. 9Ba'ale' le cúuchil pa'ate'e' yéetel u nu'uculo'ob tu'ux bíin cajlaqueno', yaan a beetic jach je'el bix le bíin in we'es techo'.
U ba'asche'il nup t'aan
(Ex 37.1-9)
10Beet jun p'éel ba'asche' yéetel u che'il#25.10 Acacia: jun cúul che' yaan u yittz qui'iboc bey poome'. acacia jun p'éel metro yéetel diez centímetros chowaquil, sesenta yéetel cinco centímetros u cóochil, sesenta yéetel cinco centímetros u ca'anlil. 11Pix yéetel ma'alob oro ichil yéetel u bak paach, súut kaxt yéetel oro u bak paach. 12Beet xan can p'éel u x julubo'ob yéetel oro, dzáa tu can dzíit u yooco'ob, ca'a p'éel ti' jun tzéeli' yéetel ca'a p'éel ti' u láak jun tzéel. 13Beet xan u x katáabilo'ob yéetel u che'il acacia, ca to'olant u bak paacho'ob xan yéetel oro, 14ca a julo'ob ti' le x julubo'ob yaan tu tzelo'ob le ba'asche'o' u ti'al u kóoch queléembalta'al, 15ma' a ca'a lukesico'ob, p'ato'ob tu x julubilo'ob le ba'asche'o', 16cu dzo'ocole', dzáa ichil le ba'asche' le a'almaj t'aan quin in dzáa techo'.
17Beet xan u maac le ba'asche' yéetel chéen oro jun p'éel metro yéetel diez centímetros chowaquil, sesenta yéetel cinco centímetros cóochil; 18póola'ant yéetel x bajab ca'a túul aj cuxa'ano'ob#25.18 Aj cuxa'an: ich hebreoe' cu ya'ala'al querubin. Yaan ti' u táan yich máac, u xiik, u wíinclil yéetel u yooco'obe' bey u yooc león wa wacaxe'. yaan u xiiko'ob, dzáa tu ca'a jo'olal. 19Le maac yéetel le ca'a túul aj cuxa'ano'ob yaan u xiiko'obo', unaj u beeta'al jun tacáalil; jun túul ti'obe' ti' jun jo'ol le maaco', u láak jun túule' tu láak jun jo'ol, 20jun túul actáan ti' u láak, ba'ale' u táan icho'obe' unaj u p'áatalo'ob actáan ti' le maaco', u xiiko'ob xane' unaj u p'áatal xíit'ilo'ob yóokol, u ti'al u láaj balico'ob yéetelo'ob. 21Dzáa u maac le ba'as che'o', dzáa ichil xan le a'almaj t'aan bíin in dzáa techo'. 22Ti' bíin in nuptáantech tu yóokol le maac, tu chúumuc le ca'a túul aj cuxa'ano'ob yaan u xiiko'ob yano'ob yóokol u ba'asche'il le nup t'aan, u ti'al ca in dzáa a wojéelt tuláacal in túuchi' t'aano'ob u ti'al le j israelitaobo'.
Tasche' u ti'al u waajil táanbesajil
(Ex 37.10-16)
23Beet jun p'éel táasche' yéetel u che'il acacia noventa centímetros u chowaquil, cuarenta yéetel cinco centímetros u cóochil, cuarenta yéetel cinco centímetros u ca'anlil. 24To'o' yéetel chéen oro, súut kaxt yéetel oro u bak paach. 25Beet jun yáal tu'ux u ch'a'ic u muuk, siete centímetros u cóochil, súut kaxt yéetel oro u bak paach; 26beet xan can p'éel u x julubilo'ob oro u ca'aj, dzáa tu can ti'itzilo'ob tu'ux yaan u can dzíit yooco'ob, 27ca p'áatac tu tzéel u yáalal tu'ux cu ch'a'ic u muuko', u ti'al u ju'ulul u x katáabilo'ob u ti'al ca páatac u kóoch queléembalta'al le táasche'o'. 28Beet yéetel u che'il acacia u x katáabilo'ob le táasche'o', badz pachto'ob yéetel oro, kabéeto'ob u ti'al u kóoch queléembalta'al le táasche'o'. 29Beet yéetel chéen oro u laquilo'ob, u x jo'opobilo'ob, u nu'ucul u dza'abal ukul yéetel u chúujilo'ob ukul u ti'al u ti'ibil óolalil ukulbil ba'alo'ob. 30Dzáa mantadz tin táan u waajil le táanbesajo'.
Bix unaj u beeta'al t'uchub sáas
(Ex 37.17-24)
31Beet xan yéetel chéen oro jun p'éel x t'uchub sáas póola'an yéetel x bajab. U nu'ucul yedztal, u chuun, chúujilo'ob yéetel u nicte'ilo'obe', ca p'áataco'ob láaj jun tacáalili'ob, 32tu tzéelilo'obe' bíin jóokoc seis u kabo'ob, óox p'éel ti' jun tzéel yéetel óox p'éel ti' u láak jun tzel. 33Tu jujun p'éelil le seis kabo'ob cu jóokol ti' le x t'uchub sáaso', unaj u yantal óox p'éel u chúujilo'ob bey u nicte'ilo'ob yaan tu chúujilo'ob yéetel u nicte'ilo'obo', 34tu chuun xane' bíin yanac can yáal ti' bey u loolo'ob almendroe', u chúujilo'ob yéetel u nicte'ilo'ob, 35Tu jujun dzíitil u seis kabo'ob yano'ob tu ca'a tzéelil cu jóokol ti' le x t'uchub sáaso', yaan u yantal u chúujilo'ob yáanal. 36U chúujilo'ob yéetel u kabo'obe', yaan u jun tacáalili'ob yéetel le x t'uchub sáaso', bíin beeta'ac yéetel chéen oro póola'an yéetel x bajab. 37Beet xan siete sáaso'obe', ca a dzáa tu'ux ca páatac u sáasilcunajo'ob actáan, 38u x machab t'aba'an chúuquilo'ob yéetel u laquilo'obe' unaj xan beeta'an yéetel chéen oro. 39Meyajnac teech treinta yéetel óox p'éel wuudz oro u ti'al a beetic le x t'uchub sáaso' yéetel u nu'uculo'ob, 40cu dzo'ocole' beet jach je'el bix le tin we'esaj teech te j witzo'.
Currently Selected:
Éxodo 25: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
