Éxodo 15
15
U kaay Moisés
1Moisés yéetel le j israelitaob túuno', tu kayo'ob le kaaya', tu noj be'enil Yuumtzil:
Quin kaay ti' u nojbe'enil Yuumtzil
máax tu beetaj jun p'éel sen jadzutz
dzáanche'etajil
úuchic u bulic ich ka'anab tzíimino'ob
yéetel le máaxo'ob nat'mail,
2In kaaye' u ti'al Yuumtzil
máax in muuk yéetel in aj tocsajil.
Leti' in Junab Ku, bíin in qui'iqui' t'ante;
Leti'e' u Ku in taata,
yaan xan in nojbe'encuntic.
3Yuumtzile' jun túul nojoch aj ba'atel.
Yuumtzil ¡u kaaba' beyo'!
4Yuumtzile' tu bulaj ich ka'anab
u bolano'ob yéetel u aj ba'atelo'ob faraón;
u yéeya'anil u nuuquil u aj ba'atelo'obe'
j bu'ulo'ob ich chac ka'anab.
5J lúubo'ob tu taamil bey tuuniche', ca j ba'alo'ob tumen u sen taamil le ka'anabo'.
6In Yuumtzil a mu'uka'an x no'oj kabil,
leti'e' muuk yéetel páajtalil,
tu xe'exe'et'aj le aj p'eeco'.
7Yéetel a nojoch páajtalil
ta yach'aj le máaxo'ob j wa'alajo'ob ta táano',
j t'a'ab a p'u'ujulil
j eelo'ob bey sojol tu yo'olal a sen p'u'ujule'.
8Yéetel u muuk a wustaje' le ja'o'
niclaji;
u cuclil le ka'anabo' j líik bey
pake';
¡U dzu' u taamil le ka'anabo'
j p'áat ma' tu péec!
9Le aj p'eeco' tu tucultaj ca'ach beya':
bíin ca'aj in ch'a'apachto'ob
tac quéen in chucpachto'ob,
in ca'aj in t'ox le ba'ax tin lukesaj ti'obo'
tac quéen utzac in wóol.
Bíin in jóokes in máascab,
yéetel u muuk in kabe' bíin in xu'ulso'ob.
10Ba'ale' j ustajnajeche',
ca j lu'uko'ob xan tumen le ka'anabo';
j búulo'ob bey plomo ichil
le j dzíidzic ja'o'.
11In Yuumtzil,
¡Mix jun túul ku je'el u queticubáa
ta wéetele'!
¡Mix máac quili'ich yéetel nojoch
je'el bix teche'!
¡Ca beetic nucuch jak óol ba'alo'ob!
¡Ca najmatic a qui'iqui' t'anta'al!
12¡Ta xit'aj a páajtalile'
ca j lu'uko'ob tumen le lu'umo'!
13Yéetel yaacunaj bíin u bin a nu'uctic
u beel le caaj ta tocajo';
Yéetel a páajtalil ca bisic ta
quili'ich najil.
14Le múuch' caajo'obo' bíin quiquilnaco'ob
quéen u yojéelto'ob,
le j filisteobo' yaan u ch'o'och'otcuba'ob
tu yo'olal ki'inamil,
15U nuuquil u aj ba'atelo'ob Edone'
bíin p'áataco'ob x ma' óolil,
u jo'ol poolilo'ob Moabe'
yaan u quiquilaanquilo'ob yéetel
sajacquil,
yaan xaan u p'áatal j ma' óolil le j cananeobo'.
16In Yuumtzil,
¡Ja'akac yóolo'ob!
¡U ch'a'ob sajacquil!
¡Suunaco'ob tuunichil yéetel u muuk a kab,
tac quéen dzo'ococ u láaj máan a caajal,
le caaj ta ti'alinto'!
17In Yuumtzil,
biso'on j cajtal ta quili'ich pu'uc,
te j cúuchil ta yéeyaj u ti'al a cajtal,
te j kulnaj ta wedzcuntaj yéetel a kabo'.
18¡Yuumtzil cu beetcubáa ajaw u ti'al mina'an u xuul!
U kaay Maria
19Le ca j ooco'ob ka'anab u bolano'ob faraón yéetel u tzíimino'obe', Yuumtzile' tu beetaj u bu'ululo'ob tumen le ka'anabo', ba'ale' le j israelitaobo' tu ch'actajo'ob le ka'anab bey yóokol tiquin lu'ume'. 20Bey túuno' le x bóobat María u quiic Aarone', tu cha'a jun p'éel lalajpaax,#15.20 Lalajpaax: pandero wa pandereta. ca j t'u'ulpachta'ab, tumen tuláacal co'olelo'ob táan u yóokoto'ob yéetel táan paxic u lalajpaaxo'ob, 21Ca'aliquil leti'e' táan ca'ach u kayic ti'ob:
Kaaynene'ex ti' u tzicbe'enil' Yuumtzil,
máax tu beetaj jun p'éel jak óol dzáanche'etajil
le ca tu bulaj ich ka'anab tzíimino'ob yéetel le máaxo'ob nat'mailo'obe'.
Bix úuchic u ch'ujucquinta'al le ja' káaje'
22Moisese' tu beetaj u náachtal le j israelitaob ti' le j chac ka'anabo'. Leti'ob túune', xíimbalnajo'ob tu x tocoy lu'umil Shur óox p'éel kiin x ma' ja'il 23Le ca j kucho'ob Marae' ma' páatchaj u yukico'ob le ja' yano'o' tumen káaj. Let o'olal tu dzáajo'ob u kaaba'int Mara#15.23 Mara le t'aana' u káat u ya'ale' káaj. le cúuchilo'
24Le máaco'obo' jo'op' u t'aano'ob kaas tu yo'olal Moisés, táan u káat chi'itico'ob: ¿Ba'ax bíin c ukej? 25Moisés túune' tu káataj u yáantaj Yuumtzil, leti'e' tu ye'esaj jun cúul chan che' ti'. Moisese' tu pulaj le chan che' ichil le ja'o' ca j ch'ujucchaji.
Te'elo' j túunta'ab yóolo'ob tumen Yuumtzile' ca j dzaab jun p'éel a'almaj t'aan ti'ob, u ti'al jun p'éel ma'alob cuxtal. 26Ca tu ya'alaj ti'ob: Wa ca táan óoltique'ex utzil ba'ax quin wa'alic, teen Yuumtzil a Kuex, yéetel wa ca beetique'ex ba'ax utz tin wóol iquil a u'uyaj t'antique'ex in wa'almaj t'aano'ob yéetel ca dzo'ocbesique'ex in nup t'aano'obe', ma' bíin in túuchi'it ti' te'ex mix jun p'éel le báan quíimilo'ob je'el bix tin túuchi'itaj yóokol le j egipciobo', tumen teen Yuumtzil máax dzáic te'ex toj óolal.
27Cu dzo'ocole' j kucho'ob Elim tu'ux yaan ca'ach doce sayabo'ob yéetel setenta u cúulul xa'ano'ob, ca j je'elo'ob tu jáal le ja'o'.
Currently Selected:
Éxodo 15: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
