Éxodo 14
14
Bix ch'acta'abic le Chac Ka'anab tumen u caajil Israel
1Yuumtzile' tu t'anaj Moisese' ca tu ya'alaj ti': 2A'al ti' le j israelitaob ca suunaco'ob je'elel actáan ti' Pi-hahirot, táancoch bej Migdol yéetel le ka'anabo', actáan ti' Baal-zefón. Ca u dza'ob u cúuchil u je'elelo'ob, actáan ti' le cúuchila', tu jáal le ka'anabo'. 3Bey túuno' faraone' yaan u tucultic: Le j israelitaoba' ma' u yojelo'ob tu'ux unaj u bino'obi'. Saatal u máano'ob te x tocoy lu'umo'. 4Ba'ale' tene' bin in ca'aj in beet u chichtal u pucsi'ikal faraón u ti'al ca u ch'a'apachto'ob; tu yo'olal in we'esic in páajtalil ti' leti' yéetel ti' u aj ba'atelo'ob; le j egipciob túuno' yaan u yojéeltico'ob teen Yuumtzilen.
Le j israelitaobo' tu beetajo'ob beyo'. 5Ca'aliquile' u ajawil u lu'umil Egiptoe', tu kamaj túuchi' t'aan dzo'oc u púudzul le j israelitaobo'. Le ajaw yéetel u nuuquil u aj meyajo'obo', tu kexaj u tuuculo'ob táan u ya'alico'ob: ¿Bix táabsa'abico'on c cha'a u bin le j israelitaob u ti'al u p'atico'ob u meyajticono'?
6Tu séeblaquile', faraone' tu ya'alaj ca nu'ucbesa'ac u bolanil u ba'atele', ca tu bisaj u aj ba'atelo'ob. 7Tu ch'a'a seicientos u asab ma'alobil u bolano'ob, pa'ate'e' yéetel tuláacal u bolanilo'ob Egipto cu bisa'al ca'ach tumen jujun túul u nuuquil u j meyajo'ob. 8Yuumtzile' tu beetaj u chichtal u pucsi'ikal faraón u ti'al ca u ch'a'apacht le j israelitaob quex tumen jóoko'ob yéetel nojoch páajtalilo'.
9Le j egipciobo' jóoko'ob yéetel tuláacal u aj ba'atelo'ob, u bolano'ob, yéetel u tziimino'ob u ch'a'apachto'ob le j israelitaobo', ca tu nactáanto'ob tu jáal le ka'anab, tu yicnal Pi-hahirot actáan ti' Baal-zefón, tu'ux jelecbalo'ob ca'ache'. 10Le ca tu yilaj le j israelitaob táan u náadzalo'ob faraón yéetel le j egipciob, j sen ooc sajacquil ti'obe' ca tu káato'ob áantaj ti' Yuumtzil. 11Ti' Moisese' tu ya'alajo'ob: ¿ba'axten ta beetaj to'on beya'? ¿Mina'an wa mucnalo'ob Egipto u ti'al ca taaso'on j quíimil way ti' le x tocoy lu'uma'? 12Ma' t a'alaj teech ca'ach Egiptoe': Cha'a c meyajtic le j egipciobo'. ¡Asab ma'alob ca u palitzilto'ono'ob, wa yaan c quíimil te x tocoy lu'umo'!
13Ba'ale' Moisese' tu núucaj ti'ob: P'áatque'ex jejedzquil ca wile'ex ba'ax bíin u beet Yuumtzil u ti'al u toquique'ex bejela'e', tumen mix bikin bíin a wile'ex tu ca'a téen le j egipciob ca wilique'ex bejela'a'. 14Te'exe' ma' a chi'ichnactale'ex tumen Yuumtzil bíin ba'atelnac ta wo'olale'ex.
15Yuumtzil túune' tu ya'alaj ti' Moisés: ¿Ba'ax teen ca káatic teen áantaj? ¡A'al ti' le j israelitaob ca xíimbalnaco'obo'! 16Teche' tich' a kab ca líikes a xóolte' u ti'al a jatzic ca'a búujil le ka'anab u ti'al u yantal tiquin bej u máan le j israelitaobo'. 17Tene' bin in ca'aj in beet u chichtal u pucsi'ikal le j egipciob u ti'al u ch'a'apachtique'exo'; ca in we'es in páajtalil ti' faraón, u aj ba'atelo'ob, u bolano'ob yéetel u tziimino'ob. 18Le quéen dzo'ococ in we'esic in páajtalil ti' faraón, bey xan ti' u bolano'ob yéetel ti' u aj nat' tzíimino'obe', le j egipciobo' bíin u yoje'elto'ob teen Yuumtzilen.
19Ti' le súutuco', u ángel Yuumtzil yéetel le múuyal cu bino'ob táanil ti' le j israelitaobo' tu sutuba'ob paachil. 20Bey túuno', le múuyalo' j p'at chúumuc ti' u aj ba'atelo'ob Egipto yéetel ti' le j israelitaobo'; u ti'al le j egipciobo' jun p'éel múuyal éekjoch'e'en, ba'ale' jun p'el sáasil u ti'al le j israelitaobo'. Let o'olale' le j egipciobo' ma' j páatchaj u chucpactico'ob le j israelitaob tuláacal le áakabo'.
21-22Moisese' tu tich'aj u kab tu yóokol le ka'anabo' ca túuchi'ita'ab tumen Yuumtzil jun p'éel ka'amcach iik tuláacal le áakabo', ca tu bujaj ca'a jaatzil le ka'anabo'. Bey úuchic u su'utul j tiquin lu'umil le ka'anab tumen Yuumtzilo'. Beyo' ti' tiquin lu'um ch'aacatnaj le j israelitaob ichil ca'a p'éel u pakil ja'o', jun p'éel x no'ojil, yéetel jun p'éel x dzíiquil.
23Tuláacal u tzíimino'ob yéetel u bolano'ob faraone' j ooco'ob tu paacho'ob u ti'al u ch'a'apachta'alo'ob tac tu chúumuc le ka'anabo' 24Ba'ale' ta'itac u sáastale' Yuumtzile' tu pactaj le aj ba'atelo'ob j egipciob ichil le káak yéetel le múuyalo', ca tu beetaj u yantal nojoch xa'aka'antanbail ichilo'ob 25tu kascuntaj xan u x sutub che'ilo'ob u bolano'obe' ca j p'at jach xan u bino'ob. Ca túun tu ya'alaj le j egipciobo': Co'one'ex púudzul tu táan le j israelitaobo' tumen Yuumtzile' táan u ba'atel tu tzéelo'ob.
26Ba'ale' Yuumtzile' tu ya'alaj ti' Moisés: Tich' a kab tu yóokol le ka'anab u ti'al ca suunac le ja' u buul le j egipciob, yéetel u bolano'ob bey xan tac u tzíimino'ob.
27Moisese' tu tich'aj u kab yóokol le ka'anabo', ca j suunaj tu cúuchil u ti'al u taal u sáastal. Le ca tu yóoltajo'ob j púudzul le j egipciob ca'acho', tu nactáanto'ob nuup'ul u beelo'ob tumen le ka'anabo', ca túun j bu'ulo'ob ichil tumen Yuumtzil. 28Le ca j suunaj le ja' je'el bix yanil ca'acho', tu bulaj le bolano'obo', le j nat' tzímino'obo', yéetel tuláacal le aj ba'atelo'ob j ooco'ob te j ka'anab u ch'a'apachto'ob ca'ach le j israelitaobo'. Mix jun túul u aj ba'atel faraón j p'at cuxa'an. 29Ba'ale' le j israelitaobo' tu ch'actajo'ob le ka'anab ti' j tiquin lu'um chúumuc ti' ca'a jaatz ja' bey ca'anal pako'obe', jun p'éel x no'oji' yéetel jun p'éel x dzíiqui'.
30Ti' le kiino' Yuumtzile' tu tocaj le j israelitaob ti' u j mu'ukan aj ba'atelo'ob Egipto. Le j israelitaobo' tu yilajo'ob u j quimen máaquilo'ob le j egipciob tu jáal le ka'anabo'. 31Le ca tu yilaj le j israelitaob le nojoch páajtalil tu jedzaj Yuumtzil yóokol le j egipciobo', tu ye'esajo'ob tziiquil tu táan Yuumtzil, ca tu yocsaj u yóolo'ob ti' bey xan ti' Moisés u palitzil.
Currently Selected:
Éxodo 14: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
