Éxodo 12
12
Cu chúunul u kinbesajil Táadz máanbal
1Yuumtzile' tu t'anaj Moisés yéetel Aarón tu lu'umil Egiptoe' ca tu ya'alaj ti'ob: 2Le kiino'oba' nojoch a ti'ale'ex, leti' u yáax mesil ja'ab. 3A'ale'ex ti' tuláacal u caajil Israel beya': U kiinil diez ti' le winala', tu jujun túulile'exe' yaan a ch'a'ique'ex jun túul chan j taman wa jun túul chan j yuuc tu jujun p'éel a wotoche'ex. 4Wa le máaxo'ob ti' le naj jach jun p'íito'ob u ti'al u láaj jaanto'ob le ba'alche'o', yaan u múul jaantico'ob yéetel le máax cajacbal naadz ti' u yotoch, bíin u t'ox je'el jay túul u yuumilo'ob le najo', le buca'aj xan cu páajtal u jaantico'obe'. 5Le ba'alche'o' jun ja'ab unaj yantal ti', j xiibil ba'alche' yéetel láaj utz u wíinclil, lelo' j taman wa j yuuc. 6Yaan a kalque'ex tac tu catorce kiin le meso', ti' le kiino' tu jujun túulil le israelitaobo', yaan u quíimsico'ob tu ocnal kiinil. 7Cu dzo'ocole' ca ch'a'ique'ex u ki'ikele' ca cu'ultique'ex tu x pakab che'il u jool le naj tu'ux bíin a jaante'ex le ba'alche'o'. 8Ti' le áakabo' bíin a jaante'ex u ka'atbil bakel yéetel káakaj xíiwo'ob bey xan yéetel waaj x ma' levadura. 9Ma' a jaantique'ex mix jun xéet' u che'eche'il wa u chacbilil. Yaan u káabta'al yéetel káak tuláacal le ba'alche'o', je'el bix u poole' bey u yooco'ob yéetel u jobnel. 10Ma' unaj xan a p'atique'ex mix jun xéet' u ti'al u láak kiini'. Wa cu p'áatal jun p'íite' unaj u tóoca'al. 11Cu dzo'ocol a búuquintique'ex a nooke'ex yéetel a taquique'ex a xanabe'ex bey xan a machmaje'ex a xóolte'exe', séeseb jaante'ex le ba'alche'o' tumen u Táadz máanbal#12.11 Táadz máanbal: (Pascua) Le j israelitaobo' cu ka'ajsico'ob tumen le kiin je'elo' u ángel Yuumtzile' ma' tu quíimsaj le nohoch paal le tu'ux tu yilaj cu'ulta'an u ki'ikel j taman tu x pakab che'il u jool naji'. Yuumtzil. 12Ti' le áakabo' tene' bíin máanaquen tu lu'umil Egipto, u ti'al in loobilt ti' quíimil u nojoch paalil tuláacal láaktzilo'ob j egipciob, bey xan u yáax aalo'ob u yaalak ba'alche'ob, yaan in xot kíintic tuláacal u kuilo'ob u lu'umil Egipto. Teen Yuumtzil dzo'oc in wa'alic.
13Le ki'iko' bíin meyajnac te'ex u ti'al a chíicultique'ex le najo'ob tu'ux yane'exo'. Beyo' le quéen in loobilt u ti'al quíimil le j egipciobo', mix jun túul ti' te'ex bíin quíimiqui'; tumen le quéen in wila'a' le ki'iko' quin táadz máanbal. 14Lela' jun p'éel kiin unaj a ka'ajsique'ex yéetel nojoch kinbesajil tu tziiquil Yuumtzil. Yaan a kiinbesique'ex bey jun p'éel a'almaj t'aan mina'an xu'ulul ti'e', cu máan tu cuxtal le taataob ti' u cuxtal u paalalo'ob. 15Yaan a jaantique'ex waaj x ma' levadura ichil siete kiino'ob; let o'olale' líikbal u cáajal yáax jun p'éel kiin, ma' unaj u yantal levadura ta wotoche'exi'. Je'el máax ca u jaant levadura ichil le siete kiino'obo', yaan u luksa'al ichil u caajil Israel. 16Le yáax jun p'éel kiin je'el bix le siete kiino'obo', unaj a kubique'ex u ti'al jun p'éel quili'ich múuch'cabil. Ti' le kiino'obo' ma' bíin úuchuc meyaji', ba'ale' chéen u ti'al u nu'ucbesa'al u janal, u jujun túulil. 17U kinbesajil le waajo'ob x ma' levadurao', jun p'éel kiin unaj a kiinbesique'ex, tumen u kiinil tin láaj jóoksilaque'ex tu lu'umil Egipto. Yaan a kiinbesique'ex bey jun p'éel a'almaj t'aan yaan u ya'alico'ob le taataob ti' u paalo'obe'. 18Yaan a jaantique'ex waaj x ma' levadura líikbal u ye'esame'ental catorce kiin ti' le yáax winalo', tac tu yocbal u kiinil veintiuno ti' láili' le winalo'. 19Ma' unaj u yantal levadura ta wotoche'ex siete kiino'obi', tumen je'el máaxac ca u jaant waaj yéetel levadurae' yaan u luksa'al ichil u múuch'cabil le j Israelitaobo', je'el bix le j táanxel lu'umilo' bey xan le sijnal ti' le múuch' caajo'. 20Let o'olale' ma' jaantique'ex mix ba'al yaan u levadurail. Je'el tu'uxac ca cajlaque'exe' unaj a jaantique'ex waaj x ma' levadura.
21Moisese' tu túuchi'itaj t'anbil u nuuquilo'ob le j israelitaobo' ca tu ya'alaj ti'ob: Xeene'ex a ch'a'ex jun túul chan j taman wa jun túul chan j yuuc u ti'al a láake'ex, quíimse'ex u ti'al a kiinbesique'ex le Táadz máanbalo'. 22Le ki'iko' unaj u p'áatal ti' jun p'éel cáat; cu dzo'ocole' ch'a'ex jun cháach tzitz ja'e' t'ube'ex ichil le ki'iko', cu dzo'ocole' cu'ultex le ki'ik ti' tuláacal u x pakab che'ilo'ob u jool le najo'obo'. Mix jun túul ti' te'ex unaj u jóokol tu yotoch ma'ayli' sáaschajque'. 23Le quéen máanac Yuumtzil u ti'al u loobilt ti' quíimil le j egipciobo', yaan u yilic le ki'ik ti' tuláacal u x pakab che'ilo'ob le jool najo', cu táadz máanbali'. Bey túuno' Yuumtzile' ma' bíin u cha'a' u yocol le j meyaj loob ichil a wotoche'exo'. 24Le ba'ax quin wa'alica' yaan a béeycuntique'ex, yaan xan u béeycunta'al tumen a ch'i'ibale'exo'ob bey jun p'éel a'almaj t'aan mina'an xu'ulul ti'e'. 25Le quéen dzo'ococ a wocle'ex ti' le lu'um bíin u dzáa te'ex le Yuumtzil je'el bix tu séeb chi'itaj ti' te'exo', unaj u bin a kiinbesique'ex le quili'ich meyaja'. 26Le quéen u káat chi'ite'ex a paalale'ex ¿Ba'ax u káat ya'al le quili'ich meyaja'? 27te'exe' unaj a núuquique'ex ti'ob: Le ba'alche'a' cu quíimsa'al tu kiinil Táadz máanbal, cu quíimsa'al ti' u tziiquil Yuumtzil. Le ca tu loobiltaj u ti'al quíimil le j egipciobo', le ca tu tzéeltaj u yotoch le j israelitaob cajnáalo'ob ca'ach Egiptoo', ca tu tocaj ti' quíimil c láaktzilo'ob.
Le j israelitaob túuno' j chinlajo'ob u ti'al kultaj; 28cu dzo'ocole' tu beetajo'ob je'el bix tu ya'alajilac Yuumtzil ti' Moisés yéetel ti' Aarone'
Cu quíimil u j yáax paalalilo'ob Egipto
29Chúumuc áakabe' Yuumtzile' tu loobiltaj le j yáax paal ti' tuláacal láaktzilil j egipcioile', je'el bix u j yáax paal faraón culucbal tu jalach káanche'o', bey le j yáax paal kala'an ti' le kalabnajo', bey xan u yáax aalo'ob le ba'alche'obo'. 30Faraón, u nuuquil u aj meyajo'ob yéetel tuláacal le j egipciobo' j líiko'ob ti' le áakabo', ca j yanchaj nucuch yaayaj awatilo'ob tuláacal Egipto. Ma' j yanji mix jun p'éel naj j p'áat wa mina'an quimeni'. 31Láili' ti' le áakabo', faraone' tu túuchi'itaj t'anbil Moisés yéetel Aarone', ca tu ya'alaj ti'ob:
Xeene'ex, tzelaba'ex ichil u máaquilo'ob in caajal, te'ex yéetel le j israelitaobo'. Xeene'ex a kulte'ex Yuumtzil je'el bix ta wa'aljile'exo'. 32Bise'ex xan a j tamane'ex yéetel a wacaxe'ex je'el bix ta wóoltajile'exe'; xeene'ex. Káat óolnene'ex ti' Ku tin wo'olal.
33Le j egipciobo' tu beeto'ob u séeb jóokol le j israelitaob tu múuch' caajo'obo', tumen táan u tucultico'ob ca'ach bin u ca'ajo'ob láaj quíimil. 34Le j israelitaobo' tu jóokesajo'ob le sacan juuch'o' ma'ayli' pajaque', pa'ate'e' yéetel u cáatil, ca tu láaj to'ojo'ob yéetel u nooko'obe' ca tu dzajo'ob tu queléembalo'ob. 35Tu yu'ubaj t'anto'ob xan Moisese', ca tu káatajo'ob ti' le j egipciob u ba'alilo'ob oro, plata yéetel búuco'ob. 36Yuumtzile' tu beetaj u dza'abal yéetel ma'alob óolal tumen le j egipciob tuláacal le ba'ax cu káatico'ob le j israelitaobo'; bey túun luksa'abic tuláacal ba'al ti' le j egipciob tumen le j israelitaobo'.
Le j israelitaobo' cu jóokolo'ob tu lu'umil Egipto
37Le j israelitaobo' jóoko'ob tu caajil Ramsés u ti'al u binbalo'ob Sucot. U xooquil u j xiibilo'ob x ma' paalalil yéetel co'olelo'obe', míin seicientos mil máaco'ob cu bino'ob xíimbalil, le yaan u ja'abil u beetic u aj ba'atelilo'ob. 38Yéetelo'obe' j bin ya'abcach u jejeláasil máaco'ob, bey xan ya'ab j tamano'ob yéetel wacaxo'ob. 39Bey ma' yanji ti'ob mix jun súutuc u ti'al u máakantico'ob u janalo'ob tu yo'olal tojol ch'intbil beeta'abico'ob tumen le j egipciobo', tu beetajo'ob waajo'ob x ma' levadura yéetel le juuch' tu jóokesajo'ob Egiptoe', lela' ma'ayli' pajchajque'.
40Le j israelitaobo' j cajlajo'ob tu lu'umil Egipto cuatrocientos treinta ja'abo'ob. 41Ti' le kiinac chúucpaj cuatrocientos treinta ja'abo'obo', tuláacal u múuch'ul u caajal Yuumtzilo' jóoko'ob ti' le lu'umo'. 42Ti' le áakabo' Yuumtzile' tu táan óoltaj u jóoksico'ob tu lu'umil Egipto. Lelo' u áakab Yuumtzil, áakab u ti'al u tziiquil; le j israelitaobo' unaj xan u táan óoltico'ob ti' tuláacal u ch'i'ilancabilo'ob.
U ya'almaj t'aanil u ka'ajsa'al u kiinil Táadz máanbal
43Yuumtzile' tu ya'alaj ti' Moisés yéetel ti' Aarón: Lela' u ya'almaj t'aanilo'ob Táadz máanbal. Mix jun túul j táanxel lu'umil je'el u páajtal u jaantic u bakel le ba'alche' quíimsano', 44ba'ale' le palitzil mana'an yéetel taakine' je'el u páajtal u jaantic wa súut kupta'ane'. 45Mix jun túul j táanxel lu'umil cu máan j xíimbal, wa quex aj con meyaj je'el u páajtal u jaantic u bakel le ba'alche'o', 46unaj u jaanta'al chéen ti' jun p'éel naj. Ma' unaj u jóoksa'al mix jun xéet' u bakel le ba'alche' cu quíimsa'alo', ma' utz xan u ca'achal u baaquelo'obi' 47Lela' bíin beeta'ac tumen tuláacal u caajil Israel. 48Ba'ale' wa jun túul j táanxel lu'umil cajnáal ichile'ex u káat u kiinbes le Táadz máanbalo', táanil kabéet u sut kupta'al tuláacal le j xiibo'ob caja'ano'ob tu yotocho'. Cu dzo'ocole' je'el u páajtal u beetic le kinbesajo', tumen leti'e' cu p'áatal je'el bix jun túul máac sijnal Israele'. Ba'ale' mix máac wa ma' sut kupta'an je'el u páajtal u jaantic u bakel le ba'alche'o'. 49Le a'almaj t'aana' u ti'al dzo'ocbesbil tumen le j sijnalo'ob te j lu'uma', bey xan u ti'al le j táanxel lu'umilo'ob cajnáalo'ob ichile'exe'.
50Le j israelitaobo', tu beetajo'ob je'el bix tu ya'alajilac Moisés yéetel Aarone'. 51Láili' ti' le kiino' Yuumtzile' tu jóokesaj u aj ba'atelilo'ob Israel caajil Egipto.
Currently Selected:
Éxodo 12: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
