Éxodo 11
11
U j báan quíimil j yáax paalo'ob
1Yuumtzile' tu ya'alaj ti' Moisés:
Bin in ca'aj in taas u láak báan quíimil yóokol faraón yéetel le j egipciobo'. Cu dzo'ocole' faraone' ma' chéen bíin u cha'a a jóokole'exi', ba'ale' leti' bíin u tojol ch'iinte'ex waye'. 2Ba'ale' bejela'e' a'ale'ex ti' le israelitaob j xiibo'ob yéetel le x co'olelo'obo' le ca u káato'ob ba'alo'ob beeta'an yéetel oro, bey xan yéetel plata ti' le j xiibo'ob bey ti' co'olelo'ob egipciob cajnáalo'ob tu tzéelo'obo'.
3Yuumtzile' tu beetaj u muuntal u pucsi'ikal le j egipciob ti' le j israelitaobo'. Le xan u nuuquil u aj meyajo'ob faraone', u ti'alo'obe' Moisese' jun túul máac sen yaan u na'at, yéetel bey u tuucul xan tuláacal Egipto.
4Moisese' tu ya'alaj ti' faraón: Bey dzo'oc u ya'alic Yuumtzila': Chúumuc áakabe' yaan in máan ti' tuláacal Egipto, 5yaan u quíimil u j nojoch paalil ti' tu jujun p'éel u najil Egipto, líikbal u nojoch paal faraón culucbal tu jalach káanche'o' tac u nojoch paal le x palitzil cu meyaj tu nu'ucul juuch'o'. Yaan xan u quíimil u yáax a'alo'ob tuláacal ba'alche'ob. 6Ti' tuláacal Egiptoe' bíin yanac yaayaj awat okol, je'el bix mix jun téen anchajaque', mix xan bíin suunac antal. 7U ti'al xan ca a wojéelte'exe', Yuumtzile', cu jun páaycuntic le j israelitaob ti' le egipciobo', mix bíin wowo' chi'ita'aco'ob tumen peeko'ob, mix jun túul u máaquil wa u ba'alche'il Israel. 8Bíin túun taalac u yileno'ob tuláacal u nuuquil u aj meyajo'ob, xolaanquil bíin u káato'ob teen: Xeene'ex yéetel tuláacal le máaxo'ob t'u'ulpachtiquecho'. Ma' bíin xi'iquen ma'ayli' úuchuc lelo'.
Sen kuux Moisés ca jóok tu táan faraón. 9Cu dzo'ocole' Yuumtzile' tu ya'alaj ti' Moisés: Faraone' ma' bíin u táan óolte'exi', bey túuno', asab ya'ab jak óolalo'ob bíin in beet tu lu'umil Egiptoo.
10Moisés yéetel Aarone' tu beeto'ob tuláacal le jak óolalo'ob tu táan faraono', ba'ale' je'el bix u ya'almajil Yuumtzile', tu pechubáa faraone', ma' tu cha'aj u jóokol le j israelitaob Egiptoo'.
Currently Selected:
Éxodo 11: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
