BEL 14
14
Daniel Yeetel beetbil ku Bel
1Le ca j quíim ajaw Astiagese', yéetel le ca j bin tu'ux yaan u ch'i'ilancabilo'obe', p'áat tu yo'olale' Ciro u ajaw Persia. 2Daniele' ti' yaan ichil le máaco'ob dza'an páatalil ti'ob tumen le ajawo', asab yaabila'an ti' tuláacal ichil u yéet óolo'ob.
3Le Babiloniobo', yaan ti'ob jun túul beetbil ku u kaaba'ae' Bel, máax ti' cu bisa'al sáamsamal seiscientos sesenta litros u asab ma'alobil harina, cuarenta j tamano'ob, yéetel ciento treinta litros vino. 4Le ajawo' cu kultic, sáamsamal cu bin u kulte. Ba'ale' Daniele' le u Ku cu kultic. 5Jun p'éel kiine' j káat chi'ita'ab ti' tumen le ajawo':
¿Ba'axten ma' ta kultic Bel?
Daniele' tu núucaj ti':
Tene' ma' tin kultic beetbil kuob beeta'ano'ob tumen máaco'ob, ba'ale' Junab Kue cuxa'an máax beet ca'an yéetel lu'um, u Yuumtzil xan tuláacal máaco'ob.
6Le ajawo' tu káat chi'itaj ti':
¿Bey túuno' ma' oca'an a wóol ti' Bel wa ku cuxa'ani? ¿Ma' wa a wilmaj buca'aj ba'al cu jaantic yéetel cu yukik sáamsamli'?
7Daniele' wáak u che'etic ca tu núucaj ti':
¡Ma' p'atic a tu'usul ajaw! Ichil le beetbil kuo' kat yanil, paachile' cobre. ¡Mix jun téen janac mix ukulnac!
8Le ajawo' jach p'u'uji, tu túuxtaj t'anbil u yum kiinilo'ob Bel ca tu ya'alaj ti'ob:
Wa ma' ta wa'aliqe'ex teen máax jaantic le janalo'obo' yaan a quíimile'ex. Ba'ale' wa ca we'esique'ex teen cu jaanta'al tumen Bele', yaan u quíimil Daniel, tumen t'aanaj kaas tu yo'olal Bel.
9Daniele' tu ya'alaj ti' le ajawo':
Ma'alob; beeta'ac je'el bix dzo'oc u ya'alic le ajawo'.
U yuum kiinilo'ob le Belo', setenta u túululo'ob, ba'ale' yaan xan u yatano'ob yéetel u paalalo'ob. 10Le ajawo', j bin túun tu kulnaj Bel, láakinta'an tumen Daniel. 11Le yuum kiino'obo' tu ya'alajo'ob ti':
Il a wile' ajaw, to'one' táan c séeb lukul waye'; p'at le janal yéetel le vinoo'; cu dzo'ocole' kal le jool najo'. Ca a ch'iicult yéetel a dzalab. Wa le quéen suunaquech sáamal ja'atzcab ca wilic ma' jaanta'ab tuláacal tumen Bele', c quíimi; ba'ale' wa ca wilic ma' jaaj ba'ax tu ya'alaj Daniel t o'olale', leti' kabéet u qiíimil.
12Le yuum kiino'obo' ma' tu tucultico'ob le ba'ala', tumen tu yáanal le mesao', u beetmajo'ob jun p'éel jool mix máac ilmajil, ti' suuc u yocolo'ob u jaanto'ob le janalo'obo'.
13Chéen p'el jóokic le yuum kiino'obo', le ajawo' tu dzaj le janalo'ob tu táan Bel. 14Daniel xane' tu túuxtaj u palitzilo'ob ca u taaso'ob ta'an ca u t'ot'o'ob ichil tuláacal le kulnajo'. Tuláacal lelo' chéen le ajaw ilo'. Cu dzo'ocole' ca jóoko'ob, tu ch'otajo'ob le jool najo', ca tu dzajo'ob u chíiculal yéetel u x dzalab ajawe' ca j bino'ob. 15Tu áakabile' j bino'ob le yuum kiino'ob je'el bix suuc u beetico'ob, yéetel u yatano'ob bey xan u paalalo'ob, ca tu láaj jaanto'ob le janalo'obo', ca tu láaj uko'ob le vinoo'. 16Le ajawo' jach tu píikil ca j líiki, bey xan Daniel. 17Le ajawo' tu káataj ti':
Daniel, ¿láili' wa dzaca'an u chíiculaj ch'ota'an le jool najo'?
Daniele' tu núucaj ti': láili'e' ajaw, jach je'el bix p'áatico'obe'.
18Chéen P'elac tu je'ejilac le jool najo', le ca tu yilaj le mayac che'o', le ajawo' tu yawtaj:
¡Jach túun nojochech Bel! ¡Ti' teche' mina'an mix jun p'íit tuusil!
19Daniele' wáak u che'ej, ba'ale' ma' xan tu p'ataj u yocol le ajaw ichil le kulnajoo'. Ca túun tu ya'alaj ti':
Ajaw ilawila'aj le lu'umo', il a wil xan máaxo'ob pe'ech'aknaja'ano'obi'.
20Tene' táan in wilic u pe'ech'ak j xiibo'ob, co'olelo'ob, yéetel paalalo'ob: tu núucaj ajaw. 21Jach p'u'uj túun ca tu túuxtaj machbil le yuum kiino'obo', yéetel u yatano'ob, yéetel u paalalo'ob.
Bey túuno' leti'ob tu ye'esajo'ob ti' bix u yocolo'ob ti' le jool mix máac ojéeltmail wa yano', u ti'al u yocolo'ob u jaanto'ob tuláacal le ba'al dza'an tu yóokol le mayac che'o'. 22Le ajawo' tu túuxtaj quiimsbilo'ob; le beetbil dioso' tu kubaj ti' Daniel, leti'e' tu xiixcuntaj, bey xan tu beetaj ti' u kulnaj.
Daniele' cu quiimsic le nojoch caa'no le o'olal toquicubáa ti' quíimil
23Yanchaj xan Babilonia jun túul nojoch caan, le máaco'ob túun te j caajo' cu kultico'ob.
24Le ajawo' tu ya'alaj ti' Daniel: ¡Ma' tu páajtal a wa'alic wa lela' ma' jun túul ku cuxa'ani'! ¡Yaan a kultic!
25Ba'ale' Daniele' tu núucaj: Tene' Qui'ichquelem Yuum in Ku, quin kultic, tumen leti' le Ku cuxa'ano'. Wa teech ca dzáic teen páajtalile', yaan in quiimsic le caano' quex mina'an teen máascab, mix xan jun dzíit che'.
26Le ajawo' tu ya'alaj ti': Quin dzáic teech páajtalil.
27Daniele' tu ch'a'aj jun p'íit u yiitz che', jun xéet' tzaatz yéetel jun wóol tzo'otz, ca tu chacaj tuláacal, tu beetaj waajo'ob ca tu dzaj tu chi' le caano'; le ca tu jaantaje', xíic u nak. Daniel túune' tu ya'alaj: ¡Il a wile'ex ba'ax ca kultique'exo'!
28Le babiloniobo', le ca tu yojéeltajo'ob lela', jach p'u'ujo'ob, tu ch'a'ajo'ob u paach le ajawo' ca tu ya'alajo'ob xan: ¡Le ajawo' dzo'oc u beticubáa judío! ¡Tu pulaj Bel, tu quiimsaj le caano', bey xan tu beetaj u quiimsa'al le yuum kiino'obo'!
29Tu séeblaquil j bino'ob tu yicnal le ajawo' ca tu ya'alajo'ob ti': ¡Kub to'on le Danielo'! Wa ma'e' yaan quiimsiquech yéetel a watan bey xan a paalal.
30Le ca tu yilaj le ajaw jach tu jaajil tu ch'a'apachta'alo', yanchaj u kubic ti'ob le Danielo'. 31Leti'obe' tu pulajo'ob ti' jun p'éel tiquin ch'e'en chuup yéetel leóno'ob, tu'ux p'a'at uc p'el kiino'obi'. 32Te j ch'e'eno'obo' yaan siete leóno'ob, sáamsamal cu pu'ulul ti'ob ca'a túul quimen máaco'ob yéetel ca'a túul j tamano'ob u ti'al u jaanto'ob; ba'ale' le kiinaco' mix ba'al pu'ul ti'ob tu yo'olal u jaantico'ob le Danielo'.
33Le kiino'ob xano', le aj bóobat Habacuco' ti' yaan te Judeao'. Táantic u dzo'ocol u beetic janal, dzo'oc xan u dzáic waajo'ob ti' jun p'éel xaac, táan u bin ich cool u bis janal ti' le joocho'obo', 34le ca chíicpaj ti' jun túul u ángel j Qui'ichquelem Yuume' ca tu ya'alaj ti':
Bis le janal yaan teech te'elo' ti' Daniel, ti' yaan Babilonia, ti' jun p'éel ch'e'n tu'ux yaan leóno'ob.
35Habacucque' tu núucaj:
¡Yuumtzil, mix jun téen yanaquen Babilonia, mix in kaj óol le ch'e'enoo'!
36Bey túuno' u ángel Qui'ichquelem Yuume', tu cháachaj tu tzo'otzel u pool, yéetel u muukil u yuztaje' tu bisaj Babilonia, ca tu p'ataj tu chi' le ch'e'en tu'ux yaan le leóno'obo'. 37Habacucque' tu yawtaj:
¡Daniel, Daniel! ¡Ch'a'a le janala', Ku túuxtic ti' teech!
38Daniele' tu Núucaj:
¡Ka'ajen teech Ku! ¡Teche' ma' ta p'atic máaxo'ob yaabilmailech!
39Ca j líike', ca j jaani, le ángel túuno' tu séeb sutaj Habacuc te tu'ux yaan ca'acho'. 40Ca j máan le siete kiino'obo' j bin le ajaw okol tu yo'olal le Danielo', ba'ale' le ca j kuch te j ch'e'en le tu'ux yaan le leóno'obo', ca tu yilaj ti' culucbal Danieli'. 41Bey túuno' awatnaj ca tu ya'alaj:
¡Jach túun nojochech Yuumtzil, u Junab Ku Daniel! ¡Mina'an u láak Ku wa ma' chéen teech!
42Le ajawo' tu túuxtaj jóokesbil, ba'ale' tu pulaj te j ch'e'eno' le máaxo'ob tu yóolto'ob ca'ach ca quiimsa'ac Daniel, jun súutuc ca jaanta'abo'ob tumen le leóno'obo', te tu táan le ajawo'.
Currently Selected:
BEL 14: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.