1 MACABEOS 1
1
Alejandro yéetel máaxo'ob tu p'ataj cutal tu jalach káanche'
1Alejandro macedoniail, u paal Filipo, jóok tu lu'ume' ca tu pa'aj u muuk Darío u ajawil persaob yéetel medos, ca j culaj tu jalach káanche'; táanil tu beetaj u ajawil tu lu'umil Grecia. 2Tu cáajsaj ya'abcach ba'atelo'ob, tu tocaj ya'abcach tuulum caajo'ob, tu quiimsaj ya'abcach u ajawilo'ob le cúuchilo'ob, 3j kuch tac tu jach náachil yóokolcaab ca tu xaklaj oclaj tuláacal u múuch' caajo'ob. Cu dzo'ocole', tuláacal lu'um j p'áat tu kab ich jéedzel, Alejandroe' jach chu'up yéetel ca'anal ich, bey xan yéetel ca'anal óolal. 4Cu dzo'ocol u much'quintic jun p'éel mu'uka'an aj ba'atelo'obe', tu t'onquintaj tzúuc caajo'ob múuch' caajo'ob yéetel jala'acho'ob u ti'al u bo'oto'ob páatan ti'. 5Ba'ale' j lúub koja'anil; tu yu'ubaj táan u quíimile', 6ca tu t'anaj u jach xiixib máaquilo'ob, u aj ba'atelo'ob jach ma'alob canbanaja'ano'ob tu yéetel tu táanquelmilo'ob, ma'ili' quíimique' tu t'oxaj le ajawil ti'obo'. 7Cu dzo'ocol doce ja'abo'obe', Alejandroe' j quíimi. 8Le náacomo'ob túuno' tu ch'a'ajo'ob le méektáanilo'ob tu jujun túulilo'ob le tu'ux caja'ano'obo', 9bey túuno' cu dzo'ocol u quíimil Alejandroe' tu beetajo'ob u ajawilo'ob, ya'abcach ja'abo'ob, bey xan u paalalo'ob le ca j quíimo'ob leti'ob, beyo' tu chupajo'ob le lu'umo' yéetel u kasa'anilo'ob.
Tu kiinilo'ob Antíoco Epífanes Cuarto, cu yoquesa'al ma' ocsaj óol cuxtalil tu caajil Israel
(2 Mac 5.11-20)
10Ichilo'obe' j síij, leti' le kaakas Antíoco Epífanes u paal ajaw Antíoco, le máax j ma'ach bisbil tu caajil Roma, leti'e' j cáaj u beetic u ajawil tu ja'abil ciento treinta y siete ti' le t'onquinajajil u beetmaj le griego'obo'.
11Ti' le kiino'obo' chíicpaj ichil le caajo' wíinico'ob kéex óolo'ob, ca tu tusajo'ob le caaj táan u ya'alico'ob: Co'one'ex utzul bisicbáa yéetel le caajo'ob yano'ob t bakpacho', tumen likbal tu kiinil t tzelajbáa ichilo'obe', jo'op' u sen taal t óokol ya'abcach yayaj ba'alo'ob. 12Dze'edzec ti' le caajo' utzchaj tu t'aano'ob le ba'ala', 13ca j ooc tu poolo'ob u bino'ob tu yicnal ajaw, leti'e' tu ya'alaj ti'ob je'el u páajtal u cajtalo'ob ti' le ma' j ocsaj óol cuxtalo'. 14Tu beetajo'ob jun p'éel u cúuchil tu'ux cu jóokesic u mu'uk ma'ac tu caajil Jerusalén je'el bix suuc ti' le ma' ocsaj óolo'obo'; 15tu beetajo'ob u ca'a ta'akal u yoot'el u j xiibilo'ob súut kupta'ano'obe', beyo' tu cúulpachquintajo'ob le quili'ich nup t'aano'; tu nupuuba'ob yéetel le ma' ocsaj óolo'obo', tu conajuba'ob u ti'al u beeto'ob kaas.
Antíocoe' cu p'atic jóojochil u kulnaj Jerusalén
16Le ca tu yilaj Antíoco dzo'oc u jéedzel u ajawile', tu tucultaj u ch'a'ic Egipto u ti'al ca u beet u ajawil ti' ca'a p'éel múuch' caajo'ob. 17Bey túuno' téec j ooc Egipto yéetel jun p'éel nojoch múuch' aj ba'atelo'ob, yaan u bolanilo'ob ba'atel, u elefanteob yéetel jun múuch' u cheemilo'ob ba'atel, 18ca tu puljubáa u ba'atelt ajaw Tolomeoe', ca tu beetaj u suut tu paach u ti'al u púudzul, tu p'ataj ya'abcach quimeno'ob tu cúuchil le ba'atelo'. 19Antíocoe' tu ch'a'aj le caajo'ob tuulumta'ano'ob yaan Egipto' ca tu láaj ocoltaj le ba'ax yaan te j lu'umo'.
20Cu dzo'ocol u pa'ic u muuk Egipto tu ja'abil ciento cuarenta y trese', Antíocoe' j bin yéetel jun p'éel nojoch aj ba'atelo'ob tu yóokol Israele', ca j kuch tac Jerusalén. 21J ooc yéetel nonoj báil ichil le quili'ich najo', ca tu ch'a'aj u oroil u multuunil kultaj, u t'uchub sáas yéetel tuláacal u nu'uculo'ob, 22bey xan le mayac che' tu'ux cu dza'abal le waajo'ob jun páaycuna'ano'obo', le nu'ucul ukulo'ob, le laco'ob, le x lu'uchubo'ob oro u ca'ajo'ob, le káasabo' bey xan le péet jo'olo'obo', bey xan tu láaj lacaj le ba'axo'ob jadzutzquintic u táan le kulnajo'. 23Tu ch'a'aj xan plata yéetel oro, bey xan le jadzutz nu'uculo'ob yéetel le ayikalil ta'acbesa'ano'ob tu nactáantajo'. 24Tuláacal le ba'alo'obo' tu bisaj tu múuch' caajil. Tu quiimsaj xan ya'abcach máaco'ob bey xan j t'aanaj yéetel pooch'ilo'ob.
25Ti' tuláacal Israel yanchaj okom óolal;
26u jalach wíinico'ob yéetel u nuuquilo'ob le caajo', jo'op' u yawat okolo'ob,
le x ch'úupalal yéetel le xi'ipalalo'obo' joch'kaj u muuko'ob,
sa'at u qui'ichpamil le co'olelo'obo'.
27Le máaxo'ob táant u dzo'ocol u beelo'obo' cu kayico'ob okom óol kaayo'ob,
le x ch'úupalo'ob ta'aytac u dzo'ocol u beelo'obo' tu búuquintajo'ob u nookil okom óolal
ca'aliquil culucbalo'ob tu cúuchil tu'ux cu wenelo'ob.
28Tuláacal le lu'umo' j péecnaj u yóol le ca tu yilaj ba'ax cu yúuchul ti' u cajnáalilo'ob; tuláacal u caajil Jacobe' yanchaj ich paj subtalil.
Cu pa'abal u caajil Jerusalén
(2 Mac 5.21-26)
29Cu dzo'ocol u máan ca'a p'éel ja'abe', ajawe' tu túuxtaj tu caajilo'ob Judea jun túul u j meyaj u ti'al u káat u bo'olil páatan, leti'e' j kuch tu caajil Jerusalén yéetel jun p'éel nojoch múuch' aj ba'atelo'ob; 30bey tumen j taal yéetel u tuuculil u tusic u caajil Jerusaleno' tu t'anajo'ob yéetel jéedzel óolal, leti'ob xane' tu táan óoltajo'ob. Ba'ale' chéen ti' jun súutuque' tu puljubáa tu yóokol le caajo', ca tu quiimsaj ya'abcach j israelitaob, 31cu dzo'ocol u láaj ch'a'ic ba'ax yane', tu kascuntaj u najilo'ob yéetel le tuulum bakpachmailo'. 32le j xiibo'obo' tu machajo'ob u biso'ob u kalo'ob co'olelo'ob yéetel mejen paalal, bey xan tu ch'a'ajo'ob u yalak ba'alche'ob. 33Tu bakpach u caajil Davide' tu beetajo'ob jun p'éel ca'anal piimpin pake' ca tu sutajo'ob j tuulum caajil. 34Tu dzajo'ob ti' j ma' ocsaj óol wíinico'ob bey xan tu kab judíob u kéex óoltmajo'ob u caajalo'obe' ca tu ch'a'a muktajuba'obi'. 35Tu much'quintajo'ob u nu'ucul ba'atel yéetel ya'abcach janal, ti' xan tu ta'acbesajo'ob le ba'axo'ob tu yocoltajo'ob tu caajil Jerusaleno'. te'elo' tu dzajuba'ob j ch'úuc.
36Lelo' j suunaj jun p'éel p'ec óolal ti' le kulnaj bey xan jun p'éel dzaa sajaquil ti' u caajil Israel.
37Tu wecajo'ob u ki'ikel máaxo'ob mina'an u si'ipilo'ob,
tu bakpach le quili'ich najo', cu dzo'ocole' tu mixba'alcuntajo'ob xan le quili'ich najo'.
38Tu yo'olal sajquile' púudzla'aj u cajnáalilo'ob Jerusalén;
le caajo' j suunaj u caajal táanxel lu'umilo'ob,
u jach cajnáalilo'obe' j p'áat bey táanxel lu'umilo'obe',
yanchaj u xúunp'attico'ob.
39Le kulnajo' j p'áat x tocoy yéetel jenel pak, le kiinbesajo'obo'
j suunajo'ob okom óolil, u kiinilo'ob je'elelo' suunaj sublaquil, u tziiquil le caajo' manba'alcunsajil.
40Je'el bix nojochchajic u tziiquile', bey nojochchajic j t'onquinajil. U nojba'alile' j suunaj okom óolalil.
Cu cáajsa'al u beeta'al ma' ocsaj óol kultajo'ob
(2 Mac 6.1-11)
41Le ajaw túuno' tu túuxtaj a'albil ti' tuláacal u ajawil ca yanchajac chéen jun p'éelili' caaj, 42tu jujun túulile' unaj u ch'éenel u cuxtal je'el bix suuque' u ti'al ca queetchajaco'ob. Tuláacal le múuch' caajo'ob tu dzo'ocbesajo'ob le ba'ax tu ya'alaj ajaw, 43tu yóokol lelo' ya'abcach j israelitaob tu kamajo'ob u yocsaj óol ajaw, tu kubajo'ob quiimsbil ba'alche'ob ti' le beetbil kuo'obo', tu manba'alcuntajo'ob xan u kiinil Sábado. 44Ajawe' tu túuxtaj aj bisaj t'aano'ob tu caajil Jerusalén yéetel ti' u chuucáan u caajilo'ob Judea, lelo' tu t'onquintaj le caaj u beeto'ob ba'ax ma' suuca'an ti' le múuch' caajo' 45cu dzo'ocole' cu wet'ic u ku'ubul tóocbil ba'alche'ob, quiimsbil ba'alche'ob yéetel ti'ibil óolo'ob ich quili'ich naj, lelo' cu beetic u mixba'alcunta'al u kiinil Sábado, kiinbesajo'ob, 46le quili'ich naj yéetel tuláacal le ba'axo'ob jun páaycuna'ano'ob ichilo'; 47tu túuxtaj beetbil u multuunil kultajo'ob, nucuch yéetel mejen kulnajo'ob u ti'al u kulta'al beetbil kuo'ob, bey xan u ti'al u ku'ubul quiimsbil kéekeno'ob yéetel u láak ba'alche'ob ma' utz yanilo'obi', 48tu wet'aj u súut kupta'al mejen paalal bey xan tu kascuntaj yanil máac yéetel tuláacal ba'alo'ob ma' utz yanilo'obi', 49tu beetaj u tu'ubsa'al a'almaj t'aan yéetel tu kexaj tuláacal nu'ucben t'aano'ob. 50Le máax ma' tu dzo'ocbesic ba'ax cu ya'alic ajawe' bíin quiimsa'ac.
51Le ba'ax tu ya'alaj ajawo' dzíibta'abe' ca túuxta'ab ichil tuláacal u ajawil; tu yóokol lelo' ajawe' tu dzaj máaxo'ob ilic ca'a dzo'ocsa'ac ichil tuláacal le caaj. 52Ya'ab ti' le judíobo' tu manba'alcuntajo'ob a'almaj t'aan, tumen j bino'ob u dzo'ocbeso'ob le ba'axo'ob a'ala'an tumen ajawo'; yéetel u kaakas ba'ax tu cuxtalo'obo' 53tu yáalcabanso'ob le utzul j israelitaob ti' tuláacal tu'ux tu caxtajo'ob u jejeláasil ta'acbesajilo'ob.
54Tu kiinil quince ti' u winal Quisleu tu ja'abil ciento cuarenta y cuatro, ajawe' tu beetaj jun p'éel kaakas manba'alcunaj, tumen tu líiksaj jun p'éel p'ecbe'en multuunil kultaj tu yóokol u multuunil tóocbil ba'alche'ob. Bey xan tu beetaj u beeta'al u láak multuunil kultajo'ob tu chuucáan u caajil Judea. 55Tu jool najo'ob, ich najo'ob bey xan ti' le bejo'obo' cu ku'ubul ca'ach poom. 56Tu ja'ajato'ob bey xan tu tóocajo'ob le u ju'unilo'ob a'almaj t'aan tu caxtajo'obe', 57cu dzo'ocole' wa cu nactáanta'al ti' wa máax u ju'unil u nup t'aan Yuum Ku, wa quex yaan máax utz tu xiquin le a'almaj t'aano', cu xot kinta'al quíimil je'el bix u ya'almajil ajawe'. 58Beyo' le máaco'ob je'elo' mantadz tu jáanpay óoltajo'ob le j israelitaobo' ti' le jejeláas caajo'obo'.
59Tu kiinil veinticinco ti' u jujun winale' cu ku'ubul quiimsbil ba'alche'ob ti' le ma' ocsaj óol multuunil kultaj yaan tu yóokol u multuunil tóocbil ba'alche'obo'. 60Je'el bix a'ala'anilo', le co'olelo'ob tu beetajo'ob u súut kupta'al u paalalo'obo' quiimsa'abo'ob, 61ch'uyucbal u paalalo'ob tu caalo'ob, quiimsa'ab xan u láaktzilo'ob, bey xan le máaxo'ob j beet le súut kuptajo'. 62Ba'ale' yanchaj ya'ab j israelitaob yanchaj u yóolil yéetel u muukil ma' u jaantico'ob le janalo'ob ma' utz yanilo'obo'. 63Tu yéeyajo'ob quíimil tumen ma' tu yóoltajo'ob u jaanto'ob le janalo'obo' u ti'al beyo' ma' u manba'alcuntico'ob le quili'ich nup t'aano'; bey túuno' j quiimsa'abo'ob. 64Le kiino'ob je'elo' sen yanchaj talam mukyajo'o ti' Israel.
Currently Selected:
1 MACABEOS 1: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.