1 MACABEOS 5
5
Cu yúuchul ba'atel yéetel idumeob bey xan yéetel amonitaob
(2 Mac 10.14-38)
1Le ca j kuch u tzicbalil te j caajo'ob yano'ob tu tzéelo'ob dzo'oc u ca'a líiksa'al le multuunil kultaj bey xan dzo'oc u ca'a utzquinta'al le kulnaj je'el bix ca'ache', j sen p'u'ujo'ob 2ca tu tucultajo'ob u xu'ulsico'ob le j israelitaob caja'ano'ob ichilo'obo': tu cáajsajo'ob u quiimsico'ob u ti'al u xu'ulsico'ob.
3Judas túune' j bin ba'atel yéetel u ch'i'ibalo'ob Esaú tu lu'umil Idumea, tu puljubáa tu yóokol Acrabatenee', tu'ux bakpachta'an ca'ach le j israelitaobo'. Te'elo' tu pa'aj u muuk le j idumeobo' tu t'onquintajo'ob bey xan tu tocaj u ayikalilo'ob. 4J ka'aj xan ti' u kasa'anilo'ob u cajnáalilo'ob Beón, tumen mantadz cu dzico'ob léecho'ob yéetel cu báalantico'ob le j israelitaobo', ti'le bejo'ob u ti'al u beetico'ob loob ti'ob. 5Judase' tu beetaj u kalicuba'ob ichil u tuulum caajo'ob, tu bakpachtajo'ob yéetel tu xot kintajo'ob quíimil, tu tóocaj u tuulum caajo'ob yéetel tuláacal ba'axo'ob yaan ichil.
6Cu dzo'ocole' j máan tu lu'um le j amonitaob, tu'ux tu nactáantaj jun p'éel mu'uka'an aj ba'atelo'ob, sen ya'abo'ob tu yáanal u kab Timoteo. 7Tu puljubáa tu yóokolo'ob ya'ab u téenele' tac ca tu pa'aj u muuko'ob, 8cu dzo'ocol u ch'a'ic Jezer yéetel u péet caajilo'obe' j suunaj Judea.
U ba'atelilo'ob Galad yéetel Galilea
(2 Mac 12.10-31)
9U ma' ocsaj óol caajil Galaade', tu much'juba'ob u ti'al u xu'ulso'ob le j israelitaob cajnáalo'ob tu lu'umo'obo'. Leti'ob túune' tu ta'acbesjuba'ob tu tuulumil Datema, 10tu túuxtajo'ob jun p'éel ju'un ti' Judas cu ya'alic beya': Le ma' ocsaj óol caaj bakpachtmailo'ona' u káato'ob u xu'ulso'on. 11Táan u taalo'ob u p'ito'ob le tuulum tu'ux c ta'acbesicbáa. Timoteo nu'ucbesic le aj ba'atelo'obo'. 12Co'oten a toco'on tu kabo'ob tumen ichilo'one' ya'ab dzo'oc u quíimilo'obi'. 13Tuláacal c láako'ob caja'ano'ob tu lu'umil Tubi dzo'oc u quiimsa'alo'ob; dzo'oc u ma'achal bisbil u yatano'ob yéetel u paalalo'ob, dzo'oc xan u lukesa'al ba'ax yaan ti'ob. Naadz ti' mil máaco'ob dzo'oc u quiimsa'alo'ob te'elo'.
14Ca'aliquil ma' dzo'ococ u xoquico'ob le ju'una' ca u kuch u láak aj bisaj t'aano'ob u ja'ajatmaj u nooko'ob ti' u taalo'ob tu lu'umil Galileae', tu ya'alajo'ob: 15U cajnáalilo'ob Tolemaida, Tiro yéetel Sidón, bey xan tuláacal u ma' ocsaj óolalo'ob Galilea, dzo'oc u much'icuba'ob u ti'al u xu'ulso'on.
16Le ca tu yu'ubajo'ob Judas yéetel le caaj le tzicbalo'oba', tu much'jubáa ya'ab máaco'ob u ti'al u tuculto'ob ba'ax unaj u beetico'ob tu yo'olal u láako'ob, yaj yanilo'ob tumen táan u ba'atelta'alo'ob tumen u aj p'eeco'ob. 17Judase' tu ya'alaj ti' Simón: Yéey le j xiibo'ob a káate', xeen a toc c láako'ob tu lu'umil Galilea. Teen yéetel in wíidzin Jonatane', bíin xi'ico'on tu lu'umil Galaad. 18U yalab le aj ba'atelo'obo' j p'a'ato'ob Judea u ti'al ca u cananto'ob tu yáanal u kab José u paal Zacarías yéetel tu yáanal u kab Azarías j xiibo'ob tzica'ano'ob ti' le caajo'. 19Ba'ale' a'ala'ab ti'ob beya': Ta kabe'ex cu p'áatal le caajo', ba'ale' ma' wocsicaba'ex j ba'atel tu yéetel le ma' ocsaj óolo'obo', yaan a p'atique'ex c suut. 20Ti' Simone' j dzaab tres mil aj ba'atelo'ob u ti'al u bin Galilea, ti' Judase' j dzaab ocho mil u ti'al u bin ba'atel Galaad.
21Simone' j bin Galilea, ca ba'atelnaj ya'ab u téenel tu yéetel le ma' ocsaj óolo'obo' ca tu pa'aj u muuko'ob 22tu ch'a'apachtajo'ob tac u jool caajilo'ob Tolemaida. J kuch tres mil u quimenilo'ob le ma' ocsaj óolo'obo', Simone'; tu tocaj u ayikalilo'ob. 23Cu dzo'ocole' yéetel nojoch qui'imac óolale' tu bisaj Judea le Judíob cajnáalo'ob ca'ach Galilea, Arbata, bey xan u yatano'ob, u paalalo'ob yéetel tuláacal ba'ax yaan ti'ob.
24Ca'aliquile', Judas Macabeo yéetel Jonatán u yíidzine' tu ch'actajo'ob u áalcab ja'ail Jordane' ca j náachchajo'ob óox p'éel kiin tac x tocoy lu'umo'. 25Te'elo' tu nactáantajo'ob jun múuch' nabateob, ca j ka'amo'ob yéetel utz, ca tzicbalta'ab ti'ob tuláacal ba'ax cu yúuchul ti' u yéet caajalo'ob tu lu'umil Galaad, 26bey xan bin ya'ab ti' leti'obe' dzo'oc u kalicuba'ob tu caajil Bosra, Bosor, Alema, Caspín, Maqued yéetel Carnaín, tuláacalo'obe' nucuch tuulum caajo'ob. 27Tu ya'alajo'ob xan yaan u láak j israelitaob u kalmajuba'ob, ba'ale' u aj p'eeco'obe' dzo'oc u ya'alico'ob u ch'a'ico'ob tuulumilo'ob tu ja'atzcabil u láak kiin u ti'al ca u xu'ulso'ob le j israelitaob chéen jun p'éelili' kiin.
28Bey túuno' Judas yéetel u aj ba'atelo'obe' tu téec kexajo'ob u tojil tu'ux cu bino'obe', ca j xíimbalnajo'ob x tocoy lu'ume' ca tu tojtáantajo'ob u caajil Bosra. Judase', tu ch'a'aj le caajo', cu dzo'ocol u quiimsic tuláacal u j xiibilo'obe', tu ch'a'aj tuláacal ba'ax yaan te j caajo', cu dzo'ocole' ca tu tóocaj. 29Tu yáakabile' j xíimbalnajo'obe' ca tu tojtáantajo'ob u tuulumil Datema. 30Le ca j sáaschaje' tu yilajo'ob ya'abcach aj ba'atelo'ob táan u pulicuba'ob tu yóokol le tuulumo': táan u bisico'ob u nucuch nu'ucul ba'atelo'ob yéetel éeb che'ob u ti'al u ch'a'ico'ob le caajo'. 31Judase' tu yilaj dzo'oc u cáajal le ba'atelo', u yawatil le ba'atel yéetel u jóopsaj paaxilo'ob le caajo' cu kuchul tac j ca'an. 32Leti' túune' tu ya'alaj ti' u aj ba'atelo'ob: ¡Ba'atelnene'ex tu yo'olal c láako'ob! 33Tu beetaj u bin ti' óox p'éel tzoolilo'ob u ti'al u ba'atelto'ob le aj p'eec cúulpacho'. Tu jóopsajo'ob u paaxo'obe' ca j payalchi'inajo'ob táan u káatico'ob u yáantaj Yuum Ku. 34U aj ba'atelo'ob Timoteoe', tu yilajo'ob Macabeo cu bin tu yóokolo'obe' ca púudzlajo'ob ti' leti'. Pa'ab u muuko'ob tumen Judas, tu quiimsajo'ob míin ocho mil aj ba'atelo'ob ti' le kiino'.
35Cu dzo'ocole' Judase' tu ch'a'aj u beel u caajil Alema, tu puljubáa tu yóokole' ca tu ch'a'aj, tu quiimsaj tuláacal u j xiibilo'ob, cu dzo'ocole' tu ch'a'aj tuláacal ba'ax yaan ti' le caajo', ca tu tóocaj. 36Te'elo', j máan táanile' ca tu ch'a'aj caajilo'ob Caspín, Maqued, yéetel Bosor bey xan u chuucáan caajilo'ob u lu'umil Galaad.
37Cu dzo'ocole', Timoteoe' tu much'quintaj u láak aj ba'atelo'obe' ca j yanchaj actáan ti' u caajil Rafón, tu táanxel tzéelil áalcab ja'. 38Judase' tu túuxtaj máaxo'ob ch'úuctic u cúuchil u je'elel le aj ba'atelo'obo', leti'obe' tu ya'alajo'ob ti'e', tuláacal le ma' ocsaj óolo'ob le cúuchilo' dzo'oc u much'icuba'ob tu yicnal Timoteo, dzo'oc u ya'abtal u aj ba'atelo'ob; 39cu dzo'ocole' ichilo'obe' yaan xan arabeob cu náajalo'ob tu yo'olal ba'atel u ti'al áantico'ob, ti' yano'ob tu táanxel jáal le áalcab ja'o', u nu'ucbesmajuba'ob u ti'al ba'atel. Judase' jóok u ti'al nactáantico'ob.
40Ca'aliquil táan u náadzal Judas yéetel u aj ba'atelo'ob ti' le áalcab ja'o', Timoteoe' tu ya'alaj ti' u náacomilo'ob u aj ba'atelo'ob: Wa judas cu ch'actic le áalcab ja' ma'ili' ma' c ch'act to'one' wa cu pulcubáa t óokole' ma' bíin páataco'on yéetelo'obi'. 41Ba'ale' wa cu sajactal cu je'elel tu táanxel tzeelil le áalcab ja'o', to'one' c ch'actique' c pulicbáa tu yóokole' c pa'ic u muuk. 42Le ca náadz Judas ti' le áalcab ja'o', tu tzolaj tu chowaquil le áalcab ja'o', le náaco'omo'ob máaxo'ob nu'ucbesic le ba'atelo' ca tu ya'alaj ti'ob ma' u cha'ico'ob u je'elel mix máac te'elo', ba'ale' láaj xi'ico'ob ti' le ba'atelo'. 43Judase' tzaypachta'an tumen tuláacal u aj ba'atelo'obe', tu ch'actajo'ob le áalcab ja' ma'ili' ch'acta'ac tumen u aj p'eeco'obe' ca tu pa'aj u muuk le ma' ocsaj óolo'obo', leti'obe' tu xúunp'atajo'ob u nu'ucul u ba'atelo'obe' ca j bino'ob u ta'acbesuba'ob tu kulnajil caajil Carnaín. 44Le j israelitaobo' tu ch'a'ajo'ob le caajo' ca tu tóocajo'ob le kulnaj pa'ate' yéetel le máaxo'ob yano'ob ichilo'. Bey ch'a'abic u caajil Carnaino', ma' páatchaj u xachicuba'ob ti' Judasi'.
45Judase' tu much'quintaj tuláacal le j israelitaob yano'ob Galaado', yéetel u yatano'ob, u paalalo'ob bey xan u ayikalilo'ob, u ti'al ca xi'ico'ob Judá: sen ya'abo'ob. 46J kucho'ob Efrón jun p'éel caaj sen nojoch yéetel ma'alob tuulumta'anil, lelo' ti' yaan te j bejo'. Mina'an bej u ti'al u máano'ob ti' tu ca'a tzeelal, chéen ichil le caaj je'el u páajtal u máano'obo'. 47Ba'ale' u cajnáalilo'obe', ma' tu cha'ajo'ob ca máanaco'obi', ba'ale' tu much'quintajo'ob tuunicho'ob tu jool le caajo'. 48Judase' tu túuxtaj aj bisaj t'aano'ob u ti'al t'aan yéetel jéedzel ca u ya'alo'ob: c káat máan ta lu'ume'ex u ti'al ca kuchuco'on t lu'um. Mix máac bíin beetic te'ex kaas. Chéen bíin káataco'on. Ba'ale' leti'obe' ma' tu yóoltajo'ob u je'ob le caajo'.
49Judas túune' tu túuxtaj a'albil ti' u aj ba'atelo'ob ma' u péeco'ob tu cúuchilo'ob, p'aataco'ob je'el bix yanilo'obo'. 50Le aj ba'atelo'obo' tu nu'ucbesajuba'ob j ba'atel, ca tu puljuba'ob tu yóokol le caajo', bul kiin yéetel bul áakabo' tac ca j lúub le caaj tu kabo'obo'. 51Tu quiimsajo'ob tu yej máascab tuláacal le máaxo'ob yano'ob ichil le caajo', ca tu pa'ajo'ob le caajo', tu ch'a'ajo'ob ba'axo'ob yaan ichil, cu dzo'ocole' ch'aacatnajo'ob ti' le caajo', j máano'ob tu yóokol u quimenilo'ob. 52Cu dzo'ocole' tu ch'actajo'ob u áalcab ja'ail Jordán, ca j kucho'ob tac ti' le táax koom yaan actáan ti' Bet-seán. 53Ca'aliquil Judase' táan u much'quintic le p'aatalo'ob paachilo', táan u dzáic u yóol le máaco'ob ca'aliquil táan u bino'ob tac u kuchbalo'ob Judea. 54Chuupo'ob yéetel qui'imac óole' j na'aco'ob tu pu'uquil Sióne' ca tu kubajo'ob tóocbil siibalo'ob tumen dzo'oc u suuto'ob toj u yóolo'ob bey xan cuxa'ano'ob, ma' quíim mix jun túul ti' leti'obi'.
Cu lúubul ich ba'atel dze'edzec j israelitaob
(2 Mac 12.32-45)
55Ca'aliquil Judas yéetel Jonatán táan u ba'atelo'ob Galaad, bey xan Simón táan u ba'atel Galilea tu táan Tolemaidae', 56José u paal Zacarías, yéetel Azarías le j p'áato'ob Judea u ti'al nu'uctic le aj ba'atelo'obo'. Tu yu'ubajo'ob u nucuch tzicbalilo'ob le pa'a muuk cu beetic u láak j israelitaobo', 57ca tu ya'alajo'ob: ¡Co'one'ex beeticbáa nucuch ba'alil xan! ¡Co'one'ex ba'atel yéetel le j ma' ocsaj óolo'ob bakpachtmailo'ono'! 58Tu ya'alajo'ob túun ti' le aj ba'atelo'ob yaan yáanal u kabo'obo' ca xi'ico'ob te j ba'atelo', ca tu tojtáantajo'ob Jabnia. 59Ba'ale' Gorgias yéetel u aj ba'atelo'obe' jóoko'ob te j caaj u ti'al j ba'atel tu yéetelo'obo'. 60José yéetel Azaríase' j pa'ab u muuko'ob ca ch'a'apachta'abo'ob tac tu jáal u lu'umilo'ob Judea. Ti' le kiino' j lúub míin dos mil j israelitaob. 61Lelo' jun p'éel nojoch pa'a muuk u ti'al Israel, tumen ma' tu yu'ubaj t'antaj ba'ax a'ala'ab ti' tumen Judas yéetel u yíidzino'obi', tu tucultuba'ob jach xibil máaco'ob. 62Ba'ale' leti'obe' ma' ti' u taalo'ob ti' u ch'i'ibalo'ob le máaxo'ob toc Israelo'.
63Le j xibil máac cu kaaba'intic Judas yéetel u yíidzino'obo' nojoch ba'alchaj u péectzililo'ob tuláacal Israel bey xan ichil le ma' ocsaj óol múuch' caajo'ob tu'ux cu yu'uba'al u tzicbalilo'obe'. 64Le máaco'obo' cu much'talo'ob tu bakpacho'ob u ti'al ka'aytic u kaaba'ob.
65Judas yéetel u yíidzino'obe' j bino'ob u ba'atelto'ob u ch'i'ibal Esaú tu tojil j noojol. Tu ch'a'aj Hebrón yéetel u péet caajilo'ob, tu jenaj u tuulumilo'ob, tu tóocaj u witzil najilo'ob yano'ob tu bakpach. 66Cu dzo'ocole' j bin tu tojil u lu'umil j filisteob u ti'al u káatbal tac Maresa. 67Ti' le kiin j lúub quimen dze'edzec aj kiino'ob, tu yo'olal tu yóoltajo'ob u ye'eso'ob u j xibil máaquilo'obe', ma' tu canantajuba'ob ca jóoko'ob j ba'ateli'. 68Judase' tu ch'a'aj u beel Azoto, u lu'um j filisteob, ca tu pa'aj le p'ecbe'en multuunil kultajo'ob, tu tóocaj beetbil kuo'ob bey xan tu ch'a'aj u ayikalilo'ob le caajo'obo', cu dzo'ocole' j suunaj Judea.
Currently Selected:
1 MACABEOS 5: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.