EFETIKILO 49
49
1Yakoba yu wa kovonga omãla vaye, wa popia lavo hati,
Liongololi okuti ndu sapuili eci cu sangi kovaso.
2Likongeli pamosi, yeveleli, amãla va Yakoba,
yeveleli isiene Isareli.
3A Ruvene, ove vunuñulu yange,
wulohõlo viange, haive tete kongusu yange,
wucimalomata kulamba, wucimalomata kunene.
4O feloka ndovava, ku kuata umalomata
momo wa londa lolohaku kula wa so;
wo vĩhisa, wa londa kula wange!
5Simeone la Lewi vamanji;
olosipata viavo ovimãleho viungangala.
6Otima wange, ku ka iñile vongombo yavo!
Konyeño yavo va ipa omanu,
kocipange cavo va teta akanja olongombe.
7Onyeño yavo yi siñaliwe momo ya feluka enene;
kuenda ocikumbiti cavo, momo ci kangisa omanu!
Ndi va tepisa ku Yakoba.
Ndi va sandola ku Isareli.
8A Yuda, ove muẽle vahuvove va ku sivaya.
Eka liove li kuata kakosi ovanyãli vove.
Omãla va so va ku fendela.
9Yuda eye eyove liohosi.
Amõlange, wa lia epulukutu, kuenje wa tunda.
Wa kukuva, wa yomba ndohosi,
pamue ndomange yohosi. Eli u pindula?
10Ombueti yonanelo ka yi tundi ku Yuda,
ndaño onganji kovitumbulukila viaye,
toke Ukuambembua iya,
kuenje omanu va pokola kokuaye.
11O pandekela okacimbulu kaye kuyuva,
lomõla ocimbulu caye kuyuva wa fina,
o sukula olonanga viaye vovinyu
luwalo waye vosonde yuyuva.
12Ovaso aye a kusuka lovinyu.
Ovayo aye a yela lasenjele.
13Sevulono eye o tunga ketapu liokalunga
O linga etapu liolonaviyu.
Ongave yaye yi kala ko Sitono.
14Yisakare eye ocimbulu ca pama,
o pekela pokati kovimanga violomeme.
15Wa mõla ocipuyukilo okuti ciwa,
lofeka okuti ya posoka,
yu wa petamisila ocitai oku ambata.
Wa linga ukuenje kupange wutolongo.
16Dani eye o tetuluila omanu vaye muẽle.
O kuata epata pokati kapata a va Isareli.
17Dani o linga ombandanjila vonjila,
pamue ombuta pelila,
yi lumana kakonjo okavalu
kuenje u endelako o kupukila konyima.
18Eyovo liove, a Yehova, nda limbila ovaso.
19Gadi eye o pundiwa la vakuakupunda,
puãi o va ñualisapo kuenje o va lupuisa.
20Asere eye o lialia okulia ku sosa,
kovapia aye ku tunda okulia kuolosoma.
21Nafitali eye ohoha yi liendela,
haiyo yi cita cita omãla va posoka.
22Yosefe eye ocanja cimaima epako,
ocanja cimaima epako konele yono.
Ovianja viawo vi yandela kocimbaka.
23Vakualohonji vo yambula enene,
vo wasa lovisongo, vo fukĩlisa.
24Haimo ohonji yaye ya mia longusu,
lovoko aye a kolisua,
a kolisua lovaka Ukuonene wa Yakoba
kuenda londuko yungombo, haeye Ewe lia Isareli,
25a kolisua la Suku ya so, una o ku kuatisa,
a kolisua la Suku Ukuonenewosi.
Eye o ku sumũluisa lesumũluho liombela
yi tunda kilu
kuenda vali lesumũluho liatumu ovava a tunda posi,
o ku sumũluisa koku cita lo koku tekula.
26Asumũluho a so, ana a velapo okuti
asumũluho a sangiwa kolomunda ka vi
sondoloaka, a sule,
ndaño asumũluho a tunda koviwulu ka vi pui;
asumũluho aco o-o a kale kutue wa Yosefe,
hao a futise undeti wa tepiwa ku vahuvaye.
27Benjamini eye ombinji yepulukutu.
Omẽle o lia eci ca kuatiwa,
oñolosi anjela eci ca pundiwa.
28A o-o apata osi ekui la avali a Isareli; kuenje ondaka eyi oyo a vosika isiavo eci a va sumũluisa, omunu lesumũluho liaye, omunu lesumũluho liaye, oco a va sumũluisa. 29Wa vosika hati, Ame ndi likongela la vakuepata lietu, ñendi kumue lolosekulu viange veleva li kasi vepia lia Efirone u Hiti, 30veleva li kasi vusenge wa Makapela kutundilo wa Mamire, vofeka ya Kanana; hailio Avirahama a landa kumue lusenge ku Efirone u Hiti ha li lingi ovilangu viaye. 31Omo va kenda Avirahama lukãi waye Sara; haimo wa kenda Isake lukãi waye Rebeka; haimo nda kenda Lea. 32Usenge waco leleva li kasimo via landiwa ku va Hiti. 33Eci Yakoba a mala oku usika omãla vaye oco wa pungika ovolu aye vula, kuenje wa tula omuenyo, wa kongeliwa ku vakuepata liavo.
Currently Selected:
EFETIKILO 49: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
