EFETIKILO 35
35
1Oco Suku wa popia la Yakoba hati, Katuka, lamanẽla ko Betele haiko o kala, haiko o tunga utala wa Suku, u wa ku tukulukilile eci wa tila Esau huvove. 2Yakoba yu wa pañinya onjo yaye lomanu vosi va kala laye hati, Imbipo olosuku viakombe vina vi kasi pokati kene, liyelisi ho pongolola uwalo wene. 3Tu katuki, tu lamanẽli ko Betele, tu ka tungeko utala wa Suku una wa ñumbuluile keteke liohali yange kuenje wa sindaikaila kuosi nda endaenda. 4Oco va eca ku Yakoba oviteka viosi viakombe va vi kuete, lovingelengele viokovatui avo, kuenje Yakoba wa vi kenda pemehi liuti wa kala konele ya Sekeme.
5Osimbu va enda ungende wavo ocinjoko ca Suku ca kuata ovaimbo a lisungue lavo, okuti ka va landuile vali omãla va Yakoba. 6Oco Yakoba weya ko Lusi, ca lomboloka ko Betele vofeka ya Kanana, eye lomanu vosi va kala laye. 7Haiko a tunga utala, yu wa luka usenge waco onduko hati, Suku ya Betele, momo oko Suku a lisituluila kokuaye cina a tila huvaye. 8Devora, uleli wa Rebeka, wa fa kuenje vo kenda kombuelo ya Betele vemehi liuti; oco uti waco vo luka vati, Uti Wasuẽlela.
9Suku wa tukuluka vali ku Yakoba eci a tunda ketapi lia Arama kuenje wo sumũluisa. 10Haeye Suku wa popia laye hati, Onduko yove ya Yakoba ka yi tukuiwa vali Yakoba, te Isareli, oyo onduko yove, kuenje wo luka Isareli. 11Oco Suku wa popia laye hati, Ame Suku Ukuonenewosi, kuata ombuto ka lue, kokuove ku tunda ofeka lohongele yolofeka, koviongo viove ku tunda olosoma. 12Ofeka yilo nda ecele ku Avirahama kuenda ku Isake ndi yeca kokuove, ndi yecavo kombuto yove yu ku kuãi. 13Suku yu wa liamũha laye vusenge una a vanguila laye, kuenje wa londa kilu. 14Yakoba yu wa katula ongunji yewe kuna a vanguila laye; wa pesilako ocilumba cokunyua kuenje wa itilakovo ulela. 15Oco Yakoba wa luka onduko yusenge okondeti Suku a vanguila laye hati, Betele.
16Kuenje va tunda ko Betele, va enda ungende wavo. Eci pa kamba ño naito oku pitila ke Efarata, oco Rahele wa kala kewe, kuenje olongembia via luluviya. 17Eci olongembia via ka luluviya, ucitisi wa popia laye hati, Ku ka yokoke, momo o cita vali omõla ulume. 18Oco, eci pa kamba naito oku tula omuenyo waye, momo wa fa, wa tukula onduko yaye hati, Eye Benoni, puãi isiaye wo luka Benjamini. 19Oco Rahele wa fa, kuenje vo kenda konjila yoku enda ko Efarata, haiko ko Beteleme. 20Yakoba wa katula ongunji keyambo liaye; ongunji yaco haiko yi li keyambo lia Rahele toke etali lilo. 21Isareli wa amako lungende waye, wa tamũlula ombalaka yaye, konẽle yikuavo yombonge ye Edere.
22Osimbu Isareli a kala vofeka yaco, Ruvene wa enda, wa pekela la Biliha, ukama wa isiaye; kuenje Isareli wa ci yeva.
Omãla va Yakoba va kala ekui la vavali. 23Omãla va Lea vava: Ruvene eye nuñulu ya Yakoba, la Simeone la Lewi la Yuda la Yisakare kuenda Sevulono. 24Omãla va Rahele, Yosefe la Bejamini. 25Omãla va Biliha, ufeko wa Rahele, Dani la Nafitali. 26Omãla va Siliha, ufeko wa Lea, Gadi la Asiere. Ovo omãla va Yakoba valume a citila ketapi lia Arama.
27Yakoba weya ku isiaye Isake ko Mamire, kimbo lia Araba, haiko ko Hevirone, kuna kua kala Avirahama la Isake. 28Oloneke via Isake via tẽla handi ocita lakui ecelãla kanyamo. 29Isake wa tula omuenyo, wa fa, kuenje wa likongela lepata liavo. Wa kaile ekongo, ukualoneke via lua. Omãla vaye Esau la Yakoba vo kenda.
Currently Selected:
EFETIKILO 35: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
