ETUNDILO 6
6
1Yehova yu wa popia la Mose hati, Kaliye o mõla eci ndinga ku Fareo; momo o sĩlĩhiwa oku va eca loku va tundisa longusu vofeka yaye.
2Suku wa popia vali la Mose hati, Ame ndi Yehova. 3Nda tukuluka ku Avirahama kuenda ku Isake loku Yakoba nda Suku Ukuonenewosi. Puãi sia lisituluile kokuavo londuko yange Yehova. 4Nda lisila lavo ocisila cange coku va iha ofeka ya Kanana, haiyo ofeka yokutungayala kuavo omu va kaile ndakombe. 5Nda yevavo eleñoleño lia va Isareli avandeti va Egito va tumãlãisa kupika, kuenje nda ivaluka ocisila cange. 6Oco ondaka yange ku va Isareli, yeyi, Ame ndi Yehova, kuenje ndu wupi ovitele via va Egito. Nyimũla upika waco, ndu yovoli lokuokuo kuolõha lolonimbu via tua. 7Ndu tambuli okuti vu linga omanu vange kuenje ame ndinga Suku yene. Vu kulĩha okuti ame ndi Yehova Suku yene u wo wupi ovitele via va Egito. 8Ndu tuali kofeka nda lisila oku eca ku Avirahama, kuenda ku Isake loku Yakoba; ndu yihi ndocipiñalo cene, ame ndi Yehova. 9Mose wa ci sapuila va Isareli puãi ka vo yevele momo ovitima viavo via teka, lupika waco wa kãla vali.
10Yehova wa popia la Mose hati, 11Kuendemo, ka sapuile Fareo, Soma ye Egito, oco a ece va Isareli okuti va tunda vofeka yaye. 12Mose puãi wa kumbulula Yehova hati, Tala, va Isareli ka va njevele, oco hẽ, Fareo o njeva ndati ame sia pila vomẽla? 13Puãi Yehova wa popia la Mose kuenda Arone, wa va kundika ocikundi coku va Isareli, leci coku Fareo, Soma ye Egito, coku upa va Isareli vofeka ye Egito.
14Ovakulu vapata olosekulu viavo vava: omãla va Ruvene nuñulu ya Isareli: Henoke la Falu la Hecirone la Karimi; o apata a Ruvene. 15Omãla va Simeone vava: Yemuele la Yaminu la Ohada la Yakini la Cohara la Saulu eye omõla ukãi u Kanana; o apata a Simeone. 16Olonduko viomãla va Lewi ca soka ovaimo avo vievi: Gerisiono la Kohata la Merari. Ovanyamo omuenyo wa Lewi ocita kakuĩ atatu kovanyamo kovanyamo epanduvali. 17Omãla va Gerisiono vava: Livini la Simei ca soka apata avo. 18Omãla va Kohata vava: Amirama la Yicihare la Hevirone la Usiyele. Anyamo omuenyo wa Kohata ocita kakuĩ atatu kanyamo atatu. 19Omãla va Merari: Mahili la Musi. O apata a va Lewi ca soka ovaimo avo. 20Amirama yu wa kuela Yokevede, manja a mukãi wa isiaye, kuenje wa cita laye Arone la Mose. Anyamo omuenyo wa Amirama ocita kakui atatu kovanyamo kovanyamo epanduvali. 21Omãla va Yicihare vava: Kora la Nefege la Sikiri. 22Omãla va Usiyele vava: Misiaele la Elicafane la Sitiri. 23Arone yu wa kuela Elisieva, omõla a Amindava, mukãi wa Nahisione, kuenje wa cita laye Nadava la Avihu kuenda Eleasa la Itamare. 24Omãla va Kora vava: Asire la Elikana la Aviasafa; o apata a va Kora. 25Eleasa, omõla a Arone, wa kuela umue omõla a Putiyele kuenje wa cita laye Finehase. Ovo muẽle ovakulu va Lewi ca soka lapata avo.
26Ovo muẽle Arone la Mose, vana Yehova wa popia lavo hati, Kopi va Isareli vofeka ye Egito ca soka lolohoka viapata avo. 27Ovo muẽle, Mose la Arone, va vangula la Fareo, Soma ye Egito, ondaka yoku upa va Isareli ke Egito.
28Eteke Yehova a popia la Mose vofeka ye Egito, 29oco yehova a sapuila Mose hati, Ame ndi Yehova. Sapuila Fareo, Soma ye Egito, viosi evi mopia love. 30Puãi Mose wa kumbulula Yehova hati, A Ñala, ame sia pile vomẽla, oco hẽ Fareo o njeva ndati?
Currently Selected:
ETUNDILO 6: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
