ETUNDILO 39
39
1Lalinya onoloti la a vumbula la a kusuka va tunga lao uwalo wa fina woku vumbila omu mu kola kuenda uwalo u kola wa Arone va tunga; ndeci Yehova a handeleka Mose.
2Yu wa panga efonde lulu lalinya onoloti la a vumbula la a kusuka lovalatanya. 3Va vandisa ulu ho pelevela, vo wonjolola alimi olosambo oku posuisa lao pokati kalinya onoloti la a vumbula la a kusuka kuenda ovalatanya, upange wuloño. 4Efonde va li tungila apatahãlo kapepe, a litokeka; lia litokeka kolosungu viaco vivali. 5Uvia wa vindiwa luloño, wa kala lalio woku itika, wa linga lalio cimosi, wa pangiwa ndeci va panga efonde, wulu lalinya onoloti la a vumbula la a kusuka lovalatanya; ndeci Yehova a handeleka Mose.
6Va linga upange wotuvawe tuasardonika tua ñualiwa lovivela viulu, loku sokotola ndeci va sokotola osinete lolonduko viomãla va Isareli. 7Wa tu kapa kapatahãlo efonde, ha tu lingi ovawe oku ivaluka omãla va Isareli; ndeci Yehova a handeleka Mose.
8Wa tunga onjeke yoponete, upange wuloño, ndupange wefonde, lulu lalinya onoloti la a vumbula la a kusuka lovalatanya. 9Ya kala lavindi akuãla a lisoka; va tunga onjeke yaco lombandihinyo; usõvi epaluma, upati epaluma lombandihinyo. 10Va kapako ovilala vikuãla viotuvawe. Ulala wa sardiu, topasiu, karbunkulu, owo ulala watete; 11ulala wavali emeralda, safira, diamante; 12ulala watatu jasintu, agata, la ametisitia; 13ulala wakuãla turkesa, sardonika la jaspe. Tua ñualiwa lovivela viulu oku pandekiwa lawo. 14Ovawe a lisoka lolonduko viomãla va Isareli, ekui liovawe kovawe avali, ca soka lolonduko viavo; ndoku sokotola osinete, eli londuko yalio, eli londuko yalio, kapata aco ekuĩ la avali. 15Va tongela konjeke yaco yoponete alienge ndovikolo a vindiwa lulu wa fina. 16Va tunga ovivela vivali viulu lovinunga vivali viulu, va kapa ovinunga viaco vivali kolonẽle vivali vionjeke yoponete. 17Alienge avali a vindiwa lulu va kapa vovinunga vivali kolonẽle vionjeke yoponete. 18Olosungu vivali vikuavo vialinge avali a vindiwa va kapa kovivela viaco vivali, va vi kapa kapatahãlo efonde, konẽle yokovaso. 19Va tunga ovinunga vivali viulu, va vi tongela kolonẽle vivali vionjeke yoponete, konele vi lisungue lonẽle yefonde yovokati. 20Va tunga ovinunga vivali viulu, va vi kapa kapatahãlo avali efonde, vemẽhi, konẽle yokovaso ocipepi lokutuihinya kuaco, kilu liuvia wefonde wa vindiwa luloño. 21Va pandeka lukolo wonoloti onjeke yoponete lovinunga viaco kovinunga viefonde, ha yi litokeka luvia wefonde wa vindiwa luloño, okuti onjeke yoponete ka yi tundi kefonde; ndeci Yehova a handeleka Mose.
22Wa tunga esanya liefonde, lia tutiwa onoloti lika, 23lepangu liesanya pokati kalio ndepangu liocinjena cutale, lombandeke ya ñualãpo epangu okuti ka li toka. 24Kowoyelo va tunga alumau lalinya onoloti la a vumbula la a kusuka, oku posila. 25Va tungavo olongenjo viulu wa fina, va kapa olongenjo pokati kalumau oku ñualisa owoyelo wesanya, pokati kalumau; 26ongenjo kolumau, ongenjo kolumau, oku ñualisa owoyelo wesanya, oku wala poku linga upange; ndeci Yehova a handeleka Mose.
27Va tongela Arone lomãla vaye ovikutu viovalatanya via tutiwa ca fina, 28lekofue liovalatanya, lovifuto via posoka viovalatanya, lovikasau viovalatanya, 29luvia wovalatanya lalinya onoloti la a vumbula la a kusuka, upange womesele yoku posuisa; ndeci Yehova a handeleka Mose.
30Va tela ulame wulu wa fina ho lingi ekolowa li kola, va tayako ocisonẽhua ndeci va sokotola osinete okuti OKU KOLA KU YEHOVA. 31Va kutako ukolo wonoloti, oku pandekela kilu liekofue; ndeci Yehova a handeleka Mose.
32Oco upange wosi wotavernakulu yombalaka yoku ñualẽhẽla la Yehova wa pua. Va Isareli va linga viosi Yehova a sapuila Mose; ovio muẽle va linga.
33Va nena otavernakulu ku Mose, ombalaka lovikuata viaco viosi; lakuatelo, avaya, olombala, olongunji, lalukuki; 34locisikĩlilo covipa violonupi va vi teka leci ci kusuka, locisikĩlĩlo covipa violonjundu, longumbo yoku vindikiya; 35ocikasia cuvangi lolomuangaluwa, lomangu yohenda; 36omesa lovikuata viaco viosi, lombolo yoku taliwa; 37ondiyelo yulu wa fina lolovela viayo, ovio olovela vioku aleka, lovikuata viaco viosi, lulela wolovela; 38utala wulu lulela woku waveka, linsensu vi pepa, lombindikiyo yokuvelo wombalaka; 39utala wosipi, owanda waco wosipi, olomuangaluwa, lovikuata viaco viosi, etasu lomangu yaco; 40olongumbo viocitali, olongunji, lalukuki, ombindikiyo yombundi yocitali, ovikolo lolombambo viaco lovikuata viosi viupange wotavernakulu, viombalaka yoku ñualẽhẽla la Yehova; 41uwalo wa tungiwa ca fina woku vumbila omu mu kola, luwalo u kola wocitunda Arone, luwalo womãla vaye woku vumbila komangu yutunda. 42Ndeci Yehova a handeleka Mose haico va Isareli va linga upange wosi. 43Mose yu wa mõla upange wosi kuenje tala, va ci linga; ndeci Yehova a lombolola haico va ci linga kuenje Mose yu wa va sivaya.
Currently Selected:
ETUNDILO 39: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
