ETUNDILO 34
34
1Yehova wa popia la Mose hati, Pasa ovitale vivali viovawe via lisoka levi viatete, lame sonẽha kovitale viaco olondaka via kaile kovitale viatete vina wa sasõla. 2Omẽle mãlẽha. Omẽle lamanela komunda Sinai. Litukuluila kokuange kilu liomunda. 3Lomunu ka ka lamane love. Vomunda yosi ka mu ka muiwe umue. Oviunda violomeme levi violongombe ka vi ka lile ocipepi lomunda yaco. 4Oco Mose wa pasa ovitale vivali viovawe via lisoka levi viatete. Wa pasuka omẽle ociteketeke, wa lamanẽla komunda Sinai ndomo Yehova o sapuila. Wa ambata peka ovitale vivali viovawe. 5Yehova yu wa lokila velende, wa talama kumue laye, wa tukula onduko ya Yehova. 6Yehova wa vinjuka kovaso yaye, wa imba ondaka hati, Yehova, Yehova Suku yohenda, ukuacali, ukuakulivala konyeño, ukuacisola calua haeye ukuacili, 7ukuakumuisa kolohulukãi viomanu ocisola ka ci pui. Ukuakuecela olongole levĩho kuenda akandu, kuenje ka yovuisa ukueko. O fetuluinya ongole yavaisia komãla vavo, lokomãla vomãla vavo, kocitumbulukila catatu leci cakuãla. 8Mose wa yayulako, wa petamẽla posi kuenje wa fendela. 9Wa linga hati, Kaliye, a Ñala, nda ñasi ciwa love, enda letu, ndaño omanu ava va huka. Tu ecele ongole yetu lekandu lietu. Tu tambule ndocipiñalo cove.
10Oco Yehova wa linga hati, Tala! Ndi lisila ocisila. Ndinga ovikomo komanu vove vosi, okuti via lisoka lavio ka via la lingiwila kilu lieve liosi, ndaño kofeka yimue. Omanu vosi o kasi lavo va mõla ovilinga via Yehova. Momo eci ndinga love ci lingisa cimue usumba.
11A Isareli! Patekela eci hu sapuila etaili. Tala, ndi hangisa kovaso yove va Amori la va Kanana la va Hiti, kuenda va Perisi la va Hiwi la va Yevusi. 12Lunguka sanga o lisila ocisila lolonungi viofeka oko wenda, kuenje ci ku lingila ndonjanjo. 13Wu nyõla ovotala avo loku teya olongunji viavo viovawe. Wu timbulavo oviti viavo vi kola, 14momo ka ci tava oku fendela osuku yimue yiñi, omo Yehova, onduko yaye ukuesepa, eye Suku o kasi lesepa, 15sanga o lisila ocisila lolonungi viofeka, kuenje eci va linga ukahonga lolosuku viavo, loku lumba ovilumba kolosuku viavo, kuenje va ku laleka, ove wenda, o lia kocilumba cavo, 16kuenje o kuelisa omãla vove valume lomãla vavo vakãi, lomãla vavo vakãi poku linga ukahonga lolosuku viavo, va tiamisa omãla vove valume koku linga ukahonga lolosuku viavo.
17Ka ci tava oku litungila olosuku viutale wa yenguluiwa.
18O lialia ofesta yolombolo ka vi kuete etumbisa. Oloneke epanduvali vina via tukuiwa vosãi ya Aviva o lia olombolo ka vi kuete etumbisa ndeci nda ku sapuila. Omo vosãi ya Aviva wa tunda ve Egito. 19Cosi ci penda onjila okuti oco tete vimo, nda culume, ci linga cange, ci kale olonuñulu violongombe, ci kale olonuñulu violomeme. 20Onuñulu yocimbulu o yi yovola lomeme. Nda kua pangele oku yi yovola o yi teya osingo. Olonuñulu viosi viomãla vove alume o vi yovola. Ka ci tava oku iya kokuange upolokoso.
21Oloneke epandu o linga upange puãi eteke liepanduvali o puyuka, ci kale otembo yoku senda, ci kale otembo yoku ungula, cosi ño o puyuka. 22O lia ofesta yolosemana, yokuti yotiliku yunguiwa tete. O liavo ofesta yoku lombola kefulilo liulima. 23Kunyamo alume vosi veya lutatu ku Ñala Yehova, Suku ya Isareli. 24Momo ndi hangisa olofeka kovaso yove, loku amisa olongave viove, Kuenda vali lomue omunu o kuatela usenge wove ocipululu nda ove o lamayana hu tukulukila ku Yehova Suku yove, kunyamo lutatu.
25Ku lumbi osonde yocilumba cange pamosi lombolo yi kuete etumbisa. Ka ci tava oku sia ocilumba cofesta yo Pascoa toke komẽle. 26Ovaima atete a tunda kovapia ove o a nena konjo ya Yehova suku yove. Ka ci tava oku teleka okahombo vasenjele a inako. 27Yehova wa popia la Mose hati, Sonẽha olondaka evi. Olondaka evi ovio nda lisila love la va Isareli. 28Wa kalako la Yehova akui akuãla kovotanya lakui akuãla kovoteke. Ka lile ombolo, ka nyuila ovava. Kuenje wa sonẽha kovitale olondaka viovisila haivio ovihandeleko ekui.
29Eci Mose a loka komunda Sinai lovitale vivali viuvangi peka, ka kũlĩhile okuti osimbu a kala loku loka ocipala caye ca nina omo a kala loku vangula la Suku. 30Eci Arone la va Isareli vosi va mõla Mose, ocipala caye ca kala loku nina. Va kala lusumba oku iya ocipepi laye. 31Puãi Mose wa va kovonga. Oco Arone lakulu vosi va va Isareli veya kokuaye, kuenje Mose wa vangula lavo. 32Noke va Isareli vosi veya ocipepi, kuenje eye wa va sapuila ovihandeleko viosi Yehova o sapuila vomunda Sinai. 33Eci Mose a mãla oku vangula lavo, wa vuvika ocipala. 34Puãi Mose, nda iñila oku vangula la yehova, o sikulũla ocipala toke wa tundamo. Eci a tundamo loku sapuila va Isareli eci a handelekua, 35va Isareli va mõla ocipala ca Mose okuti ca nina. Mose yu wa vuvika vali ocipala caye toke a iñila vali oku vangula laye.
Currently Selected:
ETUNDILO 34: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
