ETUNDILO 33
33
1Yehova wa popia la Mose hati, Kulo tundako, ove lomanu wopa vofeka ye Egito. Lamani kofeka nda likuminya la Avirahama la Isake kuenda Yakoba, siti, Ndi yeca kombuto yove. 2Numa ungelo o ku pitila kovaso. Nundisa va Kanana, la va Amori, la va Hiti la va Perisi, la va Hiwi kuenda va Yevusi. 3Lamani kofeka yi tumõha asenjele lowiki. Ame puãi si endi lene sanga ndu kunduili vonjila omo ene vumanu va huka.
4Eci omanu va yeva olondaka evi vi vala va litetela. Lomue omunu wa wala aposuiso aye evi va liyangola lavio. 5Momo yehova wa popia la Mose hati, Popia la va Isareli huti, Wumanu va huka. Nda nda enda lene okasimbu kaño nda ndo kunduli, oco luli aposuiso ene okuti sokolola eci ndinga lene. 6Oco va Isareli va lula aposuiso avo. Tunde komunda Horeve ka va vi walele vali.
7Mose oku yelula ombalaka wa yi tamoluaila kofeka, kupãla locilombo. Wa yi tukula hati, Ombalaka yoku ñualẽhẽla la Yehova. Wosi o sanda Yehova o tunda, enda kombalaka yoku ñualẽhẽla la Yehova ya kala kofeka. 8Oco Mose nda enda kombalaka omanu vosi va votoka vilu, va talama, omunu kuvelo wombalaka yaye, omunu kuvelo wombalaka yaye. Va vanja Mose toke a iñila vombalaka. 9Eci Mose a iñila vombalaka, ongunji yelende ya loka, ya talama kuvelo wombalaka, kuenje Yehova wa popia la Mose. 10Eci omanu vosi va mõla ongunji yelende yi tãi kuvelo wombalaka oco omanu vosi va votoka, kuenje va fendela, omunu puvelo wombalaka yaye, omunu puvelo wombalaka yaye. 11Oco Yehova a vangola la Mose, omẽla lomẽla, ndeci omunu a vangula lekamba liaye. Eci Mose a tiukila kocilombo, ukuenje waye Yehosua, omõla a Nune, wo sia vombalaka yoku ñualẽhẽla la Yehova.
12Mose wa popia la Yehova hati, Ove muẽle wa mañinya huti, Lamanisa omanu ava. Puãi kua ndekisile u o tuma lame. Haimo lumue wa popia huti, Nda kulĩha onduko yove haivo o kasi ciwa lame. 13Oco nda ñasi ciwa love, ndongise ovituwa viove okuti hu kulĩha si kala ciwa love. Sokololavo okuti omanu ava omanu vove. 14Yehova wa linga hati, Ngenda lene ame muẽle. Ame muẽle ndu muisi owusa. 15Mose wa popia laye hati, Nda ove muẽle kuendi letu, ku ka tupe kulo. 16Momo ci limbukiwa ndati okuti ñasi ciwa love, ame lomanu vove? Siti te nda wenda letu, okuti ame lomanu vove tu tepisua lomanu vakuavo vosi va kasi kilu lieve.
17Yehova wa sapuila Mose hati, Eci wa popia ndi ci linga omo o kasi ciwa lame, kuenje nda kũlĩha onduko yove. 18Mose wa linga hati, Ndekise ulamba wove. 19Yehova wa kumbulula hati, Hu lekisa uwa wange wosi. Hu tukuila onduko yange okuti Yehova, kuenje ndinga ocali lu nda panga oku linga ocali, ndinga ohenda lu nda panga oku linga ohenda. 20Puãi hati, Ka ci tava oku mõla ocipala cange. Momo lomue omunu o mõla kuenje o kala vali lomuenyo. 21Yehova yu wa linga hati, Ocipepi lame pali apa o tẽla oku talama. O talama kesenje. 22Osimbu ulamba wange u kasi loku vinjuka hu kapa vewula liesenje. Hu sitika leka liange toke nda pita. 23Noke njupako eka liange kuenje o mõla onyima yange, ocipala cange puãi ka ci muiwa.
Currently Selected:
ETUNDILO 33: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
