ETUNDILO 20
20
1Suku wa popia olondaka evi viosi, hati,
2Ame ndi Yehova Suku yove, nda ku upa vofeka ye Egito, vonjo yupika.
3Ku ka kale lolosuku viñi, te ame.
4Ku ka lisongele ociñumañuma pamue esetahãlo lieci ci kasi kilu, pamue lieci ci kasi posi, pamue lieci ci kasi vovava vemẽhi liongongo; 5ku ka vi fendela pamue oku vi vumba, omo ame Yehova, Suku yove, ndi Suku yesepa, oku fetuluinya komãla vavo toke kocitumbulukila catatu leci cakuãla cava va suvuka ame; 6puãi sola locisola ka ci pongoloka olohulukãi viava va sole haivo va linga ovihandeleko viange.
7Ku ka tukule onduko ya Yehova Suku yove lesanda, omo Yehova ka yowisa u o tukula onduko yaye lesanda.
8Ivaluka eteke liesambata oku li kolisa. 9Oloneke epandu o talavaya oku linga upange wove wosi; 10puãi eteke liepanduvali olio esambata lia Yehova Suku yove. Veteke liaco ku ka lingemo upange, ove muẽle, pamue omõlove ulume, pamue omõlove ukãi, pamue upika wove ulume, pamue upika wove ukãi, pamue ongombe yove, pamue ukombe o kasi vonjo yove. 11Omo oloneke epandu Yehova wa tunga ilu losi lokalunga lovina viosi vi kasimo kuenje wa puyuka eteke liepanduvali; oco Yehova wa sumũluisa eteke liesambata ha li kolisa.
12Sumba so la nyõho oco oloneke viove vi lue vofeka yina yi ku iha Yehova Suku yove.
13Ku ka ipaye.
14Ku ka pekelise.
15Ku ka ive.
16Ku ka imbile ukuẽle uvangi wuhembi.
17Ku ka livele onjo yokuẽle, ku ka livele ukãi wokuẽle, pamue upika waye ulume, pamue upika waye ukãi, pamue ongombe yaye, pamue ocimbulu caye. Cosi cokuẽle ku ka ci livele.
18Eci omanu vosi va yeva ovilemĩlo loviliakulo londaka yolumbeta lomunda ya tukuta, oco omanu va yokoka loku luluma, kuenje vamela kupãla. 19Va popia la Mose vati, Popia letu ove, tu ku yeva, puãi Suku ku ka popie letu sanga tu fa. 20Mose yu wa popia lomanu hati, Ko ka yokoki, omo Suku weyilila oku vu nyika, okuti vu u sumbila kuenje ka vu lingi akandu.
21Omanu va talama kupãla osimbu Mose a kokela kelende omu Suku a kala. 22Oco Yehova wa popia la Mose hati, Eci o sapuila va Isareli ceci, huti, Ene wa mõli muẽle ndomo nda popia lene ndaño ñasi kilu. 23Ko ka tungi olosuku viopalata oku vi kongela lame. Ko ka litungili ene muẽle oviteka viulu. 24Vu nungila utala wene vu lumba lumbako ovilumba viene vioku pia elisi levi viombembua, lolomeme viene lolongombe viene. Kuosi njonguila okuti onduko yange yivalukiwa oko njiya oku kala lene loku vu sumũluisa. 25Nda vu nungila utala wovawe ko ka u tungi lovawe a songiwa, omo nda vu u yuluila ocivela cene vu u vĩhĩsa. 26Ko ka lamanẽli kutala wange kosikata sanga epõlõla liene li molẽha.
Currently Selected:
ETUNDILO 20: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
