ETUNDILO 2
2
1Ulume umue ukuepata lia Lewi wa kuela umue omõla a Lewi. 2Ukãi we mina, wa cita omõla ulume. Eci o mõla okuti wa posoka wo salamisa olosãi vitatu. 3Eci ka tẽlele vali oku u salamisa wa nyañula uhamba wolonẽva, wa konga lonata yekokoto, wa kapamo omõla kuenje wo soleka voloñeva konẽle yolui. 4Mukãi waye wa talama okacinala oku kũlĩhisa nda cimue cu sanga. 5Omõla a Fareo ukãi wa lokila kolui oku yua, afeko vaye va pita kekulo liolui. Eye wa mõla uhamba voloñeva kuenje wa tuma ufeko oku wupamo. 6Eci o tuvula wa mõla oñaña, kuenje oñaña ya kala loku lila. Co linga calua ohenda kuenje hati, Omõla u omõla a va Heveru. 7Mukãi waye wa pula omõla a Fareo, hati, Ngenda ha ku kovongela uleli kovakãi va va Heveru ha ku nyamisilako omõla ale? 8Omõla a Fareo wa kumbulula hati, Kuenda. Okofeko ka enda, ka kovonga ina yokamõla. 9Omõla a Fareo wo sapuila hati, Ambata omõla u, ko nyamisile oco hu fete. Oco ukãi wa tambula omõla wo nyamisa. 10Eci omõlaco a kula, ukãi wo nena komõla a Fareo kuenje wa linga omõlaye, wo luka Mose ca lomboloka, Upiwa, hati Ndo wupa vovava.
11Eteke limue eci Mose a kula wa ka pasuile vangandiaye, kuenje wa mõla ovilemo viavo, wa mõlavo u Egito o tipula umue ngandiaye u Heveru. 12Yu wa vanja oku loku. Eci a mõla okuti ka kuli omunu oco wa pupola u Egito kuenje wo vembika veseke. 13Omele yaco eci a endako vali wa mõla alume vavali va Heveru va liyaka. Wa pula u wa valula ukuavo hati, O tipuila nye ukuẽle? 14Eye wa linga hati, Wa ku kapa ndosoma yetu pamue onganji yetu helie? Wa soka oku njipala ndeci wa ipa u Egito? Oco Mose wa kuata usumba, wa sokolola hati, Eci puãi ca yevala ocili. 15Eci Fareo a ci yeva wa sanda oku ipa Mose.
Puãi Mose wa tila Fareo, wa enda kofeka ya Midiane, kuenje wa tumãla konele yocisimo. 16Ocitunda ca Midiane ca kala lomãla vakãi epanduvali. Veya kocisimo oku tapa ovava, va yukisa ovikulungu oku nyuisa ocunda ca isiavo 17Ovangombo veya kuenje va va hanga, puãi Mose wa votoka kuenje wa va kuatisa, wa nyuisa ocunda cavo. 18Eci veya ku isiavo, Rauele, eye wa va pula hati, Ci kasi ndati okuti etaili weyi lombili? 19Va kumbulula vati, Umue u Egito wa tu popela peka liovangombo, wa tu tapela ovava kuenje wa nyuisa ocunda. 20Eye wa pula omãla vaye hati, O kasi pi? Ulume waco wo sili nye? U kovongi, eye, a lie ombolo. 21Kuenje Mose wa tava oku tunga lulume waco. Eye wa eca ku Mose omõlaye ukãi Cipora. 22Eye wa cita omõla ulume, wo luka Gerisiome, ca lomboloka ocingendeleyi, momo hati, Nda kala ocingendeleyi vofeka yamale. 23Eci pa pita oloneke via lua oco Soma ye Egito wa fa. Va Isareli va lisiõsuĩla upika wavo, va liyuila upika wavo kuenje okuliyula kuavo kua yevala ku Suku. 24Suku wa yeva okulisiõsiõla kuavo, kuenje Suku wa ivaluka ocisila caye cina a lisila la Avirahama la Isake kuenda Yakoba. 25Suku wa mõla va Isareli, kuenje Suku wa limbuka ndomo va kala.
Currently Selected:
ETUNDILO 2: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
