ETUNDILO 1
1
1Omãla va Isareli va iñila ve Egito, vana veya la Yakoba, omunu lonjo yaye, omunu lonjo yaye, olonduko viavo vievi, 2Ruvene, Simeone, Lewi la Yuda, 3Isakare, Sevulono la Benjamini, 4Dani la Nafitali, Gadi la Asiere. 5Epata liosi lia Yakoba lia tẽla akui epanduvali komanu. Yosefe wa kala ale ve Egito. 6Noke Yosefe wa fa la vahuvaye vosi locitumbulukila caco cosi. 7Omãla va Isareli va licita calua, va siata muẽle, va lua, va pama enene, ve yuka vofeka.
8Ke Egito kua viala osoma yokaliye ka ya kulĩhĩle Yosefe. 9Wa popia lomanu vaye, hati, Omanu vaco va Isareli valua enene, haivo va pama, etu tu sule. 10Oco tu lunguki lavo sanga va laika oku lua enene kuenje nda ovita viya va livandeka kovanyãli vetu oku liyaka letu loku tunda vofeka. 11Oco va va kapela asongui oku va yambula lupange. Kuenje va tungila Ramesese. 12Puãi ndaño va va yambula ca lua haimo va licita vali enene, kuenje va sambukila vali kolonẽle. Oco va Egito va kuatela va Isareli ohele, 13kuenje va Egito va fũkĩlisa va Isareli lupange. 14Va sakalaisa omuenyo wavo lupange wa tĩla woku kosa onata loku tunga olondopi lupange wosi wokovapia. Okuvumba kuavo kuosi va va vumbaisa lefũki.
15Soma ye Egito wa pañinya akãi va Heveru vakuakuovolola, ukuavo onduko yaye Sifira, ukuavo onduko yaye Puwa. 16Wa popia lavo hati, Nda wendi oku kuatisa omisi ukãi u Heveru, eci vu-u mola komangu yoku cita, omolaco nda ulume, wipayi, puai nda ukãi, a kale lomuenyo. 17Puãi vakuakuovolola vaco va sumbila Suku, ka va lingile ndomo mua va handeleka osoma ye Egito, va popela omuenyo womãla vaco valume. 18Oco Soma ye Egito wa kovonga vakuakuovolola vaco, wa va pula hati, Wa ci lingili nye okuti wa popeli omuenyo womãla valume? 19Vakuakuovolola va kumbulula Fareo vati, Momo akãi va Heveru ka va lisokele lakãi va Egito. Va nyanga enene, vakuakucita lika wavo osimbu ukuakuovolola ka pitilile handi kokuavo. 20Oco Suku wa sumũluisa vakuakuovolola. Omanu va licita calua haivo va pama enene. 21Kuenje omo vakuakuovolola va sumbila Suku oco Suku wa va muĩsa apata. 22Fareo yu wa handeleka omanu vaye vosi hati, Omõla wosi ulume o citiwa ku va Isareli wimbi volui, puãi omõla wosi ukãi a kale lomuenyo.
Currently Selected:
ETUNDILO 1: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
