ETUNDILO 15
15
1Mose la va Isareli va imbila Yehova ocisungo eci, vati,
Njimbila Yehova, eye wa tulamẽla ca piãla.
2Yehova eye ongusu yange haeye ocisungo cange.
Wa ndingila eyovo liange.
Eye Suku yange, ndu sivaya.
Eye Suku ya tate, ndu kemainya.
3Yehova eye ukuavita.
Yehova oyo onduko yaye.
4Akãlu ovita a Fareo lolohoka viaye wa vimba vokalunga,
Vakesongo vaye va velapo va vomba vo Kalunga Kakusuka.
5Alondo a va tuvika.
Va lokila valondo ovava ndewe.
6Ondio yove, a Yehova, yi kemãlẽla ongusu.
Ondio yove, a Yehova, yi sãsõla unyali.
7O yula ava va ku katukila lunene wulamba wove wa piãla.
O va votuila onyeño yove, yi va lia,
huti ño asĩla owangu.
8Ovava a lundika lofela yanyũlu ove.
Ovava a lua a talama ndi.
Alondo a likuata vokati kokalunga.
9Unyali wa linga hati,
Ndandula, Ha sanga.
Ha lianjela olohute.
Oñeyi yange yi puila kokuavo.
Ndi pola osipata yange.
Eka liange li va nyõla.
10Ove wa sikisa ofela yove, okalunga ka va tuvika.
Va vomba ndosumbu vovava a tanda.
11A Yehova, wa lisoka love pokati kolosuku hẽ elie?
Wa lisoka love hẽ elie?
Ulamba wove oku kola.
Ovilinga viove vi lingisa usumba,
o lingainga ovikomo.
12Wolõla ondio yove.
Ongongo ya va ina.
13Wa songuila locisola ka ci pongoloka omanu wa yovola.
Wa va endisa longusu yove toke kocitungilo cove ci kola.
14Vakualofeka va ci yeva va luluma.
Olongembia via kuata olonungi via Filisiti.
15Oco olosoma via Edome via yokoka.
Akulu va Moavi va luluma.
Olonungi viosi via Kanana via yenguluka.
16Ocinjoko lusondi vi va wila.
Omo unene wokuokuo kuove wa lua
oco vohã ño, va soka ndewe, ka va lisengi,
toke omanu vove va pita, a Yehova,
toke omanu wa yovola va pita.
17A Yehova, ove o va iñisa, o va tuika vomunda yove.
O va tumalisa vocitumãlo
cina wa ci litungila ove muẽle oku tumalamo.
Onumbuko yaco yi kola, a Yehova,
ovaka ove a yangiliya.
18Yehova o viala olotembo ka vi pui.
19Momo eci cosi Fareo eya laco ca iñila vokalunga, cokuti otuvalu tuaye lakãlu aye ovita, la vakuakuendela kotuvalu tuaye, oco Yehova wa nena vali ovava okalunga kuenje cosi ca tuvikiwa lao. Va Isareli puãi va endela posi ya kukuta vokalunga. 20Oco Miriama, mukãi wa Arone, eye uprofeto, wa nyañula opandelu, kuenje akãi vosi vo kuama konyima va sika olopandelu loku cĩla. 21Miriama wa va imbila, hati,
Imbili Yehova, omo wa tulamẽla ca piãla.
Okavalu lu wa endelako wa va imba vokalunga.
22Mose wa songuila va Isareli. Va tunda ko Kalunga Kakusuka kuenje va iñila vekalasoko lia Siuri. Va enda oloneke vitatu vekalasoko kuenje ka va sangele ovava. 23Leci veya ko Mara ka va tẽlele oku nyua ovava a Mara, omo a lula. Oco va tukuila onduko yaco vati, Mara. 24Omanu va lisiõsuĩla Mose vati, Tu nyua nye? 25Eye wa vilikiya ku Yehova, kuenje Yehova wo lekisa uti, Eye wa wimba vovava kuenje ovava aco a pongoloka, a pepa.
Oko Yehova a va sowila ocisila lociholo haiko a va nyikila. 26Wa linga hati, Nda vu yevelela ocili kondaka ya yehova, Suku yene, loku linga eci co sunguluka, loku yevelela kovihandeleko viaye, loku lava ovisila viaye viosi, ovoveyi ana nda vetisa lao va Egito siu vetisi lao ene, momo ame ndi Yehova ndusakuli wene.
27Kuenje veya ke Elimi oko kua kala ekui liolono kolono vivali viovava, kuenda akui epanduvali koviti vieva. Va tungila ocilombo ocipepi lovava aco.
Currently Selected:
ETUNDILO 15: EMB63
Highlight
Copy
Compare
Share
Want to have your highlights saved across all your devices? Sign up or sign in
Umbundu Bible © United Bible Societies, 1963.
