Zefaniya 3
3
Kolo la Eshimbamelu ka Jerusalema
1Mananu kayayi le usumba wʼuhedia,
ndu wambusana!
Le usumba uku watusuyanyaka!
2Vo kunkitanyia diui, kumbetawo
wetshelu,
Kombekama le Latuyalaka,
kunsukana le Unyashungu awo.
3Ewandji weli lʼatei awo weko tambwe
yadikita.
Embadi awo weli ndjaundu ya dikoio,
Yahatutshikaka nduku engo edja ndu
la pindju.
4Amvutshi awo weli antu watusadisadi
ndu antu wa lukesu.
Elombedi awo wakasuwula etemwelo,
wakalanya elembe.
5Latuyalaka eko ololo lʼatei awo,
ndi hutsha kolo.
Pindju tshe, ndi atelaka sambu kandi
kʼololo,
Ndi hatuhekoka la kesekese.
Keli untu a kolo hateyaka sonyi.
6Dimi lakashili wedja ushiki, tangelu
diawo diakalanyema.
Dimi lakalanya esese awo, wuhu
waheyi untu mbeta leko.
Esumba awo wakalanyema, wuhu
waheyi untu ndjala leko,
Wuhu waheyi untu mbidjase leko.
7Dimi lakati nti: Dikambu otoi,
Ndi ayumbuka woma, ayetawo
luhangu.
Ndi hunya ashu lu akambu tshe
wakamawetsha.
Keli vo waki la pusa efula dia mbete
etsha awo tshe kolo.
8Okone mbata Latuyalaka ati:
Nyunkungeli edja ndu lushi layumunela
uku omenyi.
Esangweyu kami eli dia motsha wedja,
dia dimi motsha waulelu,
La mbatshulwela kele kami, ududu
ami tshe,
Ne dia kete tshe yayulungula la dja
ya kandjema kami.
9Ku dimi layukadimula eteketa wʼantu
Dia vo ndjala pudipudi,
Dia vo tshe mbeya mbeta lukumbu la
Latuyalaka,
La mbotemola lʼutema otoi.
10Atemodi ami uma la wedi wʼekedi wa
Etiyopiya,
Ona umuntu a wudja ami, wakadiangana,
Wayumbela elambu ami.
11Lushi lako, we, Jerusalema, huyala
lu sonyi
Dia etsha aye wakayantshelaka kolo,
Ne dia dimi layunya akanga wʼutaku
weli lʼatei aye,
La we huyala la lahi ntu lʼukungu ami
wʼekila.
12Keli dimi layutshika wudja
Weli la lunyangu la wula lʼatei aye.
Ku vo wayuyanga eshamelu lu
lukumbu la Latuyalaka.
13Atshikadi wa Isariyele hawutsha kolo.
Vo hawuta kashi,
Kuyanga aui wa lukesu ntanema
lʼenyo awo.#3:13 Eny. 14:5.
Vo wayolekaka, wayetamaka, ku
nduku lawautsha woma
14We ona umuntu a Siona, imbi esambu!
Isariyele, uhangohango!
We onʼa umuntu a Jerusalema, uyali
la ongenongeno!
Utamanya ngenangena lʼutema aye
tshe.
15Latuyalaka akanya dumbwelu diaye.
Ndi akatshanya utunyi aye.
Khumʼekanga ka Isariyele, Latuyalaka,
eko lʼatei aye.
We huka elanyelu woma ntu.
16Lushi lako, wayutela Jerusalema vati:
Tukaki woma!
La Siona vati: Anya aye tawokomoki!
17Latuyalaka, Unyashungu aye, eko
lʼatei aye,
Ondoshi wʼata, latushanaka elembielo.
Ndi ayongenangena utamanya lu
dikambu dianye.
Ndi ayukulula la ngandji kandi,
Ayukongenangena utamanya imba
esambu la diui dia wulu,
18Uku lu lushi la wuki.
Dimi layunya lukulu lʼengeno uma le
nyu,
Ne dia nyu nyutukuyala la tshumu lu
dikambu diako.
19Nyulungi, lʼetena kako dimi layendana
la waku watunyusuyaka.
Dimi layushimbela akanga wa tshumbi,
Layusanganya wane wakatshanyema.
Dimi layukadimula sonyi kawo lutumbu
la lukumu lu kete tshe.
20Lʼetena kako, dimi layunyela leko,
Ndu lʼetena kako, kayumunyusanganya.
Ee, dimi layunyete lukumbu,
La lutumbu lʼatei a wedja tshe wa la kete,
Lamʼayumunyukaluya engonyi anyu
La ntundu kʼashu anyu, mbata
Latuyalaka.
Currently Selected:
Zefaniya 3: TLL
Highlight
Copy
Compare
Share
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
