Hangai 1

Ambutshutshiya Wudja Dia Mpika Etemwelo

1Lʼeleku ka hendi ka khumʼekanga Dariyo, lu lushi la ntundu la ngondo ka samalu, diui dia Latuyalaka diakayi le Zerubabele, onʼa Sheyalatiyele, umbuledi wa Juda, la le Jashua, onʼa Jehozadaka, olombedi a ladiku, uma lʼunyo wa umvutshi Hangai,#1:1 Ez. 4:24—5:2; 6:14. ati: 2Latuyalaka Kanga lulimbilimbi kata ati: Wudja one mvutaka vati: Etena katakuki ka mpika luudu la Latuyalaka ntu. 3Diako mbakayi diui dia Latuyalaka le wo uma lʼunyo wʼumvutshi Hangai ati: 4Undi, onʼeli etena ka nyu mbidjase lu mvudu yanyu ya ladiku, lamʼambulana luudu lone? 5Kakiane, Latuyalaka Kanga lulimbilimbi kata ati: Nyukani yimba dia etsha anyu. 6Nyu nyakune efula, keli nyakani tshitshe. Nyu nyatolekaka, keli nyu hanyuluti; nyu nyatonokaka, keli hanyutunduyaka pusa. Nyu nyatolotaka, keli nduku untu lambulumbialumbiama. La one latulungulaka difutu, atulungulaka difutu dia didja lu tapa dieli la weshu.

7Latuyalaka Kanga lulimbilimbi kata ati: Nyukani yimba dia etsha anyu. 8Nyumbeli ladiku diʼukungu, nyutokote etamba, nyuyuhiki luudu. Ku dimi layongenangena loko, layutumbwama, mbata Latuyalaka. 9Nyu nyakayangi efula, keli nyakatani yema tshitshe. Ku lamʼakanyayela la ngelu, dimi lakayifufi lumu, lakayifumbula. Okoko wana? mbambula Latuyalaka Kanga lulimbilimbi. Ne dia nyu nyatulawoka untu lʼuntu utsha lu luudu landi lamʼambulana luudu lami. 10Uma lu dikambu dianyu mbambukimela ulungu dihohe, mbambukimela kete tumbatumba diayo. 11Dimi laketi owo ladiku dia kete, ladiku diʼekungu, ladiku dia wehu, ladiku dia ashi wʼelua, ladiku dia iso, ladiku dia kene tshe katutumbaka lu kete; ladiku dia antu, ladiku dia dungalunga, ndu ladiku diʼelimu tshe wʼanya.

12Zerubabele, onʼa Sheyalatiyele, Jashua, onʼa Jehozadaka, olombedi a ladiku, la atshikadi tshe wa wudja, wakakitanyia diui dia Latuyalaka, Unyashungu awo, ndu aui wa umvutshi Hangai, uku akutumi Latuyalaka, Unyashungu awo. Wudja wakuki woma la ntundu ka Latuyalaka. 13Ku Hangai, dikendji dia Latuyalaka, akatela wudja diui diakawutela Latuyalaka ati: Dimi leko la nyu, mbata Latuyalaka. 14Latuyalaka akahashahasha nyuma ka Zerubabele, onʼa Sheyalatiyele, umbuledi wa Juda, la nyuma ka Jashua, onʼa Jehozadaka, olombedi a ladiku, ndu nyuma ya atshikadi tshe wa wudja. Ku vo wakayi, wakayukamba ulimu wa luudu la Latuyalaka, Unyashungu awo, Kanga lulimbilimbi, 15lu lushi la akumi ahendi lʼanei la ngondo ka samalu.

Currently Selected:

Hangai 1: TLL

Highlight

Copy

Compare