Delu dia Jeremiya 1
1
Nyangu ya Fumbi Siona
1Ndi wuhu wambutshikala Jerusalema
hwe,
Wambutshikala usumba one waki too
lʼantu li!
Ndi wuhu wambuwuyala uku wadi
aki udu,
Wambuyala usumba one waki wuki
lʼatei a wedja li!
Usumba waki uwandji lʼatei
wʼesumba,
Wambuyala lʼokongo wʼekina!
2Usumba watulelaka wulu lʼutshu;
Atama awo watukumbamaka lʼasoi.
Lʼatei wʼelangimi awo, nduku
lusamba.
Engenyi awo tshe wakukesi;
Vo wambuyala atunyi awo.
3Juda ambotolama lu fumbi,
Lʼatei wʼasui ndu wa shoko ya wulu.
Vo wambudjase lʼatei a wedja,
Keli vo kema la mumuya nduku
yema.
Wane watusuyaka, wambuwunda
lamʼewo la sasi.
4Mbuka yʼutsha la Siona yeko lʼutanda,
Ne dia antu hawuyeteta loko utsha
lu alambu.
Asuku ayo hawuyoto antu;
Elombedi ayo wusekhuma lʼalelu;
Esekaseka ayo wambusuyama;
yo yambulula la okei.
5Wane watuyengiyaka, wambuyahamela,
Atunyi ayo wambuhumo lukulu lʼolo,
Ne dia Latuyalaka akayisuya
Dikambu dia efula kʼehedia ayo.
Utunyi ayo ambediya anʼuyo utsha
lu fumbi.
6Ona umuntu Siona ambushisha
lutumbu landi tshe!
Ewandji ayo wambuyala uku peli
yahatani adiyu wa nde.
Vo wambulawo aha la wulu la ntundu
ka one latawatshanya.
7Jerusalema ambuho diango tshe
diʼushinga a wulu,
Diaki la yo lu nshi yakiyo la asui ndu
okei,
Ee, diango diaki la yo lu nshi yʼedjedja.
Lamʼakoto antu ayo lu anya wʼutunyi,
Nduku lakiko dia mbukimanyia.
Atunyi ayo wakayenyi, wakayisoke,
Ne dia elanyelu kayo.
8Jerusalema akatshi kolo heyama,
Diako mbambuyuyala engo ka mindu.
Wane tshe wakayilemiaka,
wambuyonya,
Ne dia wambena utakataka ayo.
Yo yatukhumaka aikhumu,
yatukadimulaka elundji.
9Mindu kayo kaki lu ehimbu wʼekutu
ayo;
Yo kunkana dia akambu wayuyala
lʼekumelu kayo.
Diako mbeli ekwelo kayo mamba,
Ku nduku la one layisamba.
We Latuyalaka, endi sui diami,
Ne dia utunyi ambolembia!
10Utunyi ambusimbula anya andi
Ladiku dia diango diayo tshe
diʼushinga a wulu.
Ee, yo yakenyi wedja wamba
Diango dia lu etemwelo kayo,
Waku wakaseke dia mboto lʼului
wʼantu aye!
11Antu ayo tshe watukhuma akhumu
Lamʼatuwuyanga mbu ya nde wulu.
Vo watutshaka la waumbelu awo
ukanda dia ntana ma,
Dia nkikitsha wulu wʼalimba awo.
Endi we Latuyalaka, ndu enyi!
Ne dia dimi lambonywama.
12Undi, uku kema dikambu le nyu,
Nyu wane watetaka laawo?
Nyendi, nyenyi naka lunyangu
lomotshi leko
Uku lunyangu lami, lambuya le mi,
Lako lakansuya Latuyalaka lushi la
kele kandi ka wulu.
13Uma ladiku mbakandatumi dja;
Lu weka ami kakandayikosha.
Ndi akambi ekulu ami ati;
Akankaluya ekongokongo.
Ndi akatshiki lukalemi wodu yanyi
tshe.
14Ndi akakeleka ehedia ami lu lokoho
Ndi akadingitanya la lunya landi kame;
Akambahewo lu kingu kami, akashili
wulu ami.
Khumadiondjo akankimo lu anya
A waku wahamakuki ndo la wo.
15Khumadiondjo akahumanya ahuka
ami tshe lʼatei ami.
Ndi akasanganya ului wʼalimbi dia
ndo la mi,
Dia ndjaka elongo ami wʼapami.
Khumadiondjo akamula usekaseka
wʼemuma wa Juda
Uku atuwamulaka vinyu lu yundja.
16Lu akambu aso mbalelami; mbakela
ashu ami asoi,
Ne dia usambi wukuki nkikitshami
Ambuyala etali uma le mi.
Anʼami weko lʼatei wʼelanyelu,
Ne dia utunyi ambalembia.
17Siona ambusimbula anya ayo,
Ku nduku leko diambusamba.
Latuyalaka akati lu dikambu dia
Jakoba,
Dia asukanyi awo ndjala atunyi awo.
Jerusalema ambuyala engo ka mindu
lʼatei awo.
18Latuyalaka kayinga,
Ne dia dimi lakahindula elembe andi.
Keli nyulungi, nyu antu tshe,
Dimi lambunyolomba dia nyu menda
lunyangu lami.
Esekaseka ami wa dimuma la elongo
ami wʼapami
Wakatolama lu fumbi.
19Dimi laketi elangimi ami, keli vo
wakankesi.
Elombedi ami la dihangamendi diami
wakavu lʼusumba
Lamʼakawayayangaka ma, dia
nkikitsha alimba awo.
20Latuyalaka li, umendi, ne dia lu pa
kemi,
Utema ami ambulungula.
Sulu diami diambate, ne dia dimi laki
la uhedia efula:
Lʼandja yombo, lu luudu elandu.
21Uki akhumu ami, nduku untu
lansamba.
Atunyi ami tshe wakuki lukumu la
pa kami,
Vo wakangenangena lu dikambu
diakayatshi.
Usukanya lushi lakayataka; vo wayali
uku dimi.
22Kolo yawo tshe yenami la ntundu
kaye.
Atsheli uku akayantshela ne dia
ehedia ami tshe,
Ne dia akhumu ami waya efula la
utema ami ambokomo.
Currently Selected:
Delu dia Jeremiya 1: TLL
Highlight
Copy
Compare
Share
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
