Jeremiya 46
46
Aui wʼAkambu Wahatayi lu Dikambu DiʼEdjibitu
1Diui dia Latuyalaka diakayi le umvutshi Jeremiya lu dikambu dia wudja.
2Lu dikambu dia Edjibitu.#46:2 Is. 19:1-25; Ezek. 29:1—32:32. Lu dikambu diʼului wʼalimbi wa Farayo Neko, khumʼekanga ka Edjibitu, waki la Karakemishe, lʼumamu wa ndjali ka Eyufarate. Nebukadineza, khumʼekanga ka Babilona, akalembia alimbi ako lu eleku ka nei ka diulelu dia Joyakima, onʼa Josiya, khumʼekanga ka Juda:
3Nyolongosole dingawu dia tshitshe
ndu dia waki,
Nyutshu utsha lu ta!
4Nyu ambahemi wa falasa,
Nyukeleki die lu ekongo wa falasa,
nyahami!
Nyemali, nyahe alembo anyu wa ta!
Nyoketemole akonga anyu; nyolote
eloto wa ta.
5Kakona kenami?
Vo wambuka woma, wambukalula
ekongokongo.
Ahuka awo wambolembiama,
wambulawo aha mbewo lʼokongo.
Woma wa mamba weko lu beke tshe,
mbata Latuyalaka.
6Kanga luwangu heya ndawo.
Ndu ondoshi wa ta heya mpanda.
Vo wamboselo, wamboko lu leke la
ngelʼa kushi la ndjali ka Eyufarate.
7Akona one atetaka esadi uku Nile,
Lukanga ashi ato watusutshasutshamaka
uku tokoko?
8Edjibitu atetaka uku ashi wa Nile.
Ashi watusutshasutshamaka uku tokoko.
Vo watutaka vati: Dimi layumbela,
layukumba kete.
Dimi layulanya esumba la antu awo.
9Falasa li, nyuneli! Pusupusu li,
nyungito!
Andoshi wa ta watshu:
Apami wʼuma lʼEtiyopiya ndu wʼuma
la Puta, watukimelaka dingawu;
Ndu wane wʼuma la Luda, watolemaka eta,
10Ne dia lushi loso, leli lushi la
Khumadiondjo, Latuyalaka Kanga
lulimbilimbi.
Lushi loso, layuyala lushi la nsomboya,
Layundosomboya atunyi andi.
Yombo yayole antu, yayuluta, yayudjo
la dikila diawo,
Ne dia Khumadiondjo, Latuyalaka
Kanga lulimbilimbi
Ambulambula ulambu lu eke la ngelʼa
kushi la ndjali ka Eyufarate.
11We Edjibitu usekaseka wʼemuma,
Utshu utsha la Ngiliyade, utose lodia.
We atomotshaka ekanga womotshamotsha,
we hokono.
12Wedja wambuka lukumu la sonyi
kaye,
La kete yambulula lʼalelu aye,
Ne dia dembi diambukhumela dembi,
Ku vo ahendi wamboko dingoma.
13Diui ne mbakatela Latuyalaka umvutshi Jeremiya lu dikambu dia etshwelu ka Nebukadineza, khumʼekanga ka Babilona, dia ntolembia kete ya Edjibitu:#46:13 Jer. 43:10-13.
14Uti lukumu lu Edjibitu, utulusanya la
Mingidole,
Utulusanya lu Memifi ndu la Tapanehese!
Nyemali, nyuyalongosole,
Ne dia yombo yayudiaka antu lu
etshimba anyu!
15Ukundi akatolama ditemolatemola
dianyu?
Dio kunshikikala ne dia Latuyalaka
akaditshanya.
16Ndi ambutakanya ului a wuki wʼantu.
Vo wamboko, wakamanela; wambutanela
vati:
Nyeso tukaluli le asikasu lu kete
yakatuto,
Etali uma le yombo yadiakana!
17Vo wambuhangohango leko vati:
Farayo, khumʼekanga ka Edjibitu, eko
paka lundju lutu.
Ndi aketsha etena kandi wetshetsha.
18Uku wemi la lumu! mbata Khumʼekanga,
Lukanga lukumbu lone: Latuyalaka
Kanga lulimbilimbi ati: Nyuki,
Uku eli Tabora lʼatei wʼekungu,
Ndu uku eli Karamele lʼumamu wʼashi
a waki, mbayuya motshi.
19We onʼa umuntu ludjashi lʼEdjibitu.
Olongosole diango diaye dia ntsho
utsha lu lohombo,
Ne dia Memifi ayutshumbama,
ayuyala tongo diaha la antu.
20Edjibitu eli ngombe ka wadi ka
dimena diahangone.
Keli unanyishi lu ndjayi uma la ngelʼa
kushi.
21Asi ulimu awo wa difutu weli lʼatei
awo,
Weko uku ana wa ngombe wununyi lu
ekutu awo.
Vo wakakadimo, wakalawo vo tshe kame,
aha nshikikala,
Ne dia lushi lawo lʼelanyelu lambukuka
le wo,
Etena kʼasui awo.
22Lundju lʼEdjibitu leli uku luhelu
lʼului,
Ne dia atunyi awo wuyayi lʼalimbi dia
ndjolosha,
Wayakimedi tokenge uku akotshi
wʼetamba.
23Vo wayunyukula ukunda awo
kuyanga vo weko pika.
Vo wambuleka endjo efula,
Efula kaheyama mbala, mbata Latuyalaka.
24Edjibitu onʼa umuntu ayutshama
sonyi.
Ndi ayukimwama lu anya wʼantu uma
lu leke la ngelʼa kushi.
25Latuyalaka Kanga lulimbilimbi, Unyashungu wa Isariyele, kata ati: Nyendi, dimi lutsha nsuya Amona wa lu Tebese, Farayo, Edjibitu, kame la ditemolatemola diawo la khumi ya dikanga yawo, Farayo la waku tshe watuwekamaka. 26Dimi layakimo lu anya a waku watuyangaka mbadiaka, lu anya wa Nebukadineza, khumʼekanga ka Babilona, ndu lʼanya wa ekambi andi. Ku lʼokongo diku, antu wayutudjase loko uku nshi ya ntundu, mbata Latuyalaka.
27Keli we ukambi ami Jakoba, tukaki
woma.
We Isariyele, tateki asulu!
Ne dia dimi layukushimbela uma lu
kete yʼetali,
Ndu tukanula taye uma lu kete yewo
lu lohombo.
Jakoba ayukalula, ayudjase ki la lutui
tshitshi;
Nduku layuwutsha woma.
28Latuyalaka kata ati: We ukambi ami
Jakoba, tukaki woma,
Ne dia dimi leko laye.
Dimi layushila wedja tshe lene
akamakutshanya ushiki.
Keli we, dimi halukushila ushiki.
Dimi layukuhangwela la sambu
kʼololo.
Dimi halukutshika aha nkusuya.#46:28 Jer. 30:10-11.
Currently Selected:
Jeremiya 46: TLL
Highlight
Copy
Compare
Share
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
