Jeremiya 31
31
1Latuyalaka kata ati: Lu etena keso,
Dimi layuyala Unyashungu wa
khumbu tshe ka Isariyele,
La vo wayuyala wudja ami.
2Wudja wakahandi yombo, wakukama
ketshi lʼusui wa shenga.
Lamʼakayangi Isariyele mumuya,
3Latuyalaka akene le ndi uma lʼetali.
Dimi nkukaka ngandji, ngandji ka
pundju!
Diako mbatumokolamelaka nkuka
ketshi.
4Dimi layukuhika ntu.
We ayuhikama, we umuntu lʼemuma
Isariyele!
We ayolota dengalenga diaye ntu,
Ayutsho la ntono wenye a waku
wateyaka mpuma.
5We ayune ekodi wa vinyo ntu lu
ekungu wa Samariya.
Amunyi wayune diango, wayongenangena
la diango dia dinela.
6Lushi layuyala, layuhangohango alami
Lu ekungu wa Efarayima vati:
Nyeso, tutshu la Siona utsha le
Latuyalaka, Unyashungu asu.
7Latuyalaka kata ati:
Nyudji waelu wʼongenongeno
dikambu dia Jakoba.
Nyuhangohango lʼongenongeno a
wuki
Dikambu dia one leli ote a wedja.
Nyudianganya lukumu, nyimbi
esambu wa diandu,
Nyutaki nyati. Lamyalaka ambutshungula
wudja andi,
Atshikadi wa Isariyele.
8Enda, dimi layuwaela uma lu kete
ya la ngelʼa kushi,
Layasanganya uma lu kuma ya kete.
Lʼatei awo Keli kanga tshungu, kanga
etshumbi,
Umuntu kanga diemi, la one latata
lono.
Vo wayukalula ului a wuki lindu.
9Vo wayuya wayaleli, ku dimi
layakaluya la esambelu.
Dimi layalombola lʼemamu wʼekedi
wʼashi,
Lu mbuka kʼusimbwi kahaweyi
ntakana,
Ne dia dimi leli umbutshi wa Isariyele.
Efarayima keli onʼami lʼenundu.
10Nyu wedja, nyuki diui dia Latuyalaka,
Nyutudisanya lu asenga tshe weli etali,
Nyututi nyati: One lakahandjula
Isariyele, ayasanganya ntu,
Ayalama uku atulamaka ulami ekoko
andi,
11Ne dia Latuyalaka akatshungula
Jakoba.
Ndi akushimbela uma lʼanya wa one
lakuleki wulu.
12Vo wayuya, wayuyimba esambu
lʼukungu wa Siona,
Wuludi too la diandu ne dia ololo wa
Latuyalaka,
Ne dia epunga, ashi wʼelua, la iso;
Ne dia ana wʼekoko la wa ngombe.
Etema awo wayuyala uku ekambo
kamboloyama lʼashi.
Vo hawuyuyala la lunyangu ntu nduku
yema.
13Ku esekaseka wʼamantu wayono
wenye lʼongenongeno,
Ndu elongo wʼapami la esumbi
wayongenangena kame.
Dimi layukadimula delu diawo
ongenongeno, layasamba.
Dimi layangenyangenya uma lu
lunyangu lawo.
14Dimi layulutsha etema wʼelombedi la
diango diʼololo,
La wudja ami wayulutshama lʼololo
ami, mbata Latuyalaka.
15Tukuku tambukema lu Rama, delu
la utanda a wuki.
Ratshele lu ndela anʼandi;#31:15 Etat. 35:16-19. amboseka
dia mbusamba lu dikambu dia anʼandi,
Ne dia vo kema.#31:15 Mat. 2:18.
16Latuyalaka kata ati:
Uyakimeli, tulelaki, ashu aye
tawokediaki asoi.
We ayufutama ne dia ulimu aye.
Vo wayukalula ntu uma lu kete
yʼutunyi.
17Elungamelu keko dikambu dia nshi
yayayi.
Anʼaye wayukalula ntu uya lu kete
yawo, mbata Latuyalaka.
18Dimi lakuki Efarayima akiyana okone
ati:
We akansuya, ku dimi lakasuyama
Uku yana ya ngombe yahatekela
lokoho.
Unkaluya, ku dimi layukalula,
Ne dia we keli Latuyalaka, Unyashungu
ami.
19Mete, lamʼakamakadimo, dimi
lakaleli kolo yami.
Lamʼakamalimbitela munga yami,
Dimi lakayakomola lu ehelohelo kami.
Dimi lakuki sonyi, lakalombo,
Ne dia lakembe wutshu wa dionyo wa
nshi yʼolongo a pami.
20Undi, Efarayima kema onʼami a pami
la ngandji?
Ndi kema onʼami lulekimi nanga uka?
Tena tshe diatumuhangwelaka, dimi
latuwuhoka.
Diako mbatulungulaka utema ami lu
dikambu diandi.
Dimi layuwukaka ketshi, mbata
Latuyalaka.
21We umuntu lʼemuma, Isariyele, eme
tulimbitelu,
Uhiki abaya wa menya antu mbuka,
Ekamia utema aye utsha lʼosese,
lu mbuka kakayatshu.
Ukaluli, ukaluli, utsha lʼesumba aye ene.
22Edja ndu kaandi ayuyukimo mbekeko,
We usekaseka a umuntu wakanganela
mbuka?
Latuyalaka ambutunga engo kʼuyuyu
la kete:
Umuntu ayulamaka pami.
23Latuyalaka Kanga lulimbilimbi, Unyashungu wa Isariyele, kata ati: Wayutaka aui ane ntu lu kete ya Juda ndu lʼesumba ayo, lamʼayumukaluya wane wakatolama lu fumbi vati:
Latuyalaka akotshokole, we edjaselu
kʼakambu wʼololo,
We ukungu wʼekila!
24Juda la esumba ayo tshe wayudjase loko kame, ekambi wa dikambo la alami wa dungalunga. 25Dimi layete utema wambokomo uyuyu, layangasanya utema tshe weli la lunyangu.
26Dimi lakemo, lakendi. Djo yaki dimena le mi.
Sheki yʼUyuyu
27Latuyalaka kata ati: Nyulungi, nshi yayuyala, yayumune wuhu wʼantu ndu wuhu wa nyama lu Isariyele ndu lu Juda. 28Uku akamawaendaka dia mbakula, mbahandjula, mbalembia, mbalanya, la dia mbasuya, wuhu ako mbayumuwaendaka dia mpika la dia mune, mbata Latuyalaka. 29Lu nshi sho, vo hawuta ntu vati:
Washi wakali elua wʼepudi,
Mbambuyala wanyu wa anʼawo okeke.#31:29 Ezek. 18:2.
30Keli untu ndame ayuvo ne dia kolo kandi hita. Untu tshe layole elua wʼepudi, wanyu andi ndame wayuyala okeke.
31Latuyalaka kata ati: Nshi yayuyala, yayumudja la khumbu ka Isariyele ndu la khumbu ka Juda sheki yʼuyuyu.#31:31 Mat. 26:28; Mak. 14:24; Luk. 22:20; 1 Kor. 11:25; 2 Kor. 3:6. 32Aha uku sheki yakamadji la washewo lu lushi lakamakimela lʼanya dia mbatundja uma lu kete ya Edjibitu. Vo wakalanya sheki yami ku, kuyanga dimi laki uku umewo, mbata Latuyalaka. 33Keli onʼeli sheki yayumudja la khumbu ka Isariyele, lʼokongo wa nshi yako. Dimi lavudja elembe ami lu nyumu yawo, layefunda lu etema awo.#31:33 Heb. 10:16. Dimi layuyala Unyashungu awo, ku vo, wayuyala wudja ami, mbata Latuyalaka. 34Vo tshe hawulakanyanya untu la unyandi, untu lʼonangu vati: Nyulimbiteli Latuyalaka. Vo tshe wayunimbitela ndu wa waki ndu wa tshitshe, ne dia dimi layadimanyia uhedia awo, handjuho kolo kawo ntu,#31:34 Heb. 10:17. #31:34 Heb. 8:8-12. mbata Latuyalaka.
35Latuyalaka, latukimoka unya dia
ndjala usasi la yanyi,
Lakashikike ngondo la toto dia vo
ndjala usasi lʼutshu,
Latuhashahashaka ashi a waki
diʼasukhu awo ndjikita,
Ndu lukanga lukumbu lone:
Latuyalaka Kanga lulimbilimbi, kata
ati:
36Naka elembe ene wayushila la ntundu
kami,
Ku tukanula ta Isariyele tayushila,
Diaha vo ndjala wudja ntu la ntundu
kami pundju.
37Naka wayeya mbedika ulungu ladiku,
Naka wayeya mbishula atshina wa
kete lʼesi,
Ku dimi layukadja tukanula ta Isariyele,
Ne dia akambu tshe wakawatshi,
mbata Latuyalaka.
38Nyuki, nshi yayuyala, yayuwuhikela Latuyalaka usumba, uma lʼetangelu ka Hananele pulu ndu la Suku dia Tshuku. 39Ushinga wʼedikelu wayusimbo too pulu ndu lu dikuna dia Ngareba, ku vo ndju-kadimo utsha lu leke la Ngoa. 40Ukidi tshe wa edu ndu wʼetuku, la esui tshe pulu ndu lu okedi wa Kidirona, edja ndu la tshuku dia Suku dia Falasa utsha lʼehutwelu ka unya wayukidiama le Latuyalaka. Vo hawunyukwama kuyanga nanyema ntu pundju.
Currently Selected:
Jeremiya 31: TLL
Highlight
Copy
Compare
Share
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
