Jeremiya 30
30
Daka DiʼEkaluyelu ka Wane Weli lu Lohombo
1Diui dia Latuyalaka diakayi le Jeremiya ati: 2Latuyalaka, Unya-shungu wa Isariyele, kata ati: Ufundi aui tshe wakamakutela lu mukanda. 3Uki, nshi yayuyala, yayumukaluya antu ami wʼasi Isariyele ndu wʼasi Juda wakatshu lu lohombo. Dimi layakaluya lu kete yakamasha washewo. Ku vo wayuyikita, mbata Latuyalaka.
4Lanʼeli aui wakati Latuyalaka lu dikambu dia Isariyele, ndu lu dikambu dia Juda.
5Latuyalaka kata ati:
Shu takuki alelu wa woma, wa woma
wa mamba, aha wa ki.
6Nyumbwani, nyendi naka pami
mbutaka ona!
Ku okoko wana wenami pami tshe
ahe anya
Lu lukindi landi uku umuntu latata
lono?
Dikambu kuna diambukaso elundji
kʼuntu lʼuntu?
7Yee, ndi lushi lone wuki li!
Nduku lukina leli uku lo.
Lo leli etena ka pa le Jakoba,
Keli ndi ayushimbamela uma loko.
8Lushi lone, dimi layokola lokoho landi uma lu kingu kaye, layata luweti laye, lʼasi wedja hawukete fumbi ntu, mbata Latuyalaka. 9Keli nyu nyayundjela dimi Latuyalaka, Unyashungu anyu, la Davidi, khumʼekanga kanyu, kayumunyiya dia nyulela.
10Okone tukaki woma we ukambi ami
Jakoba,
Tateki asulu, we Isariyele,
Ne dia dimi layukushimbela uma lu
kete yʼetali,
La tukanula taye uma lu kete yewo
lu lohombo.
Jakoba ayukalula,
Ayuyala la mumuya ndu la ki,
Ku nduku untu layohenyahenya,
mbata Latuyalaka.
11Ne dia dimi leli laye dia nkushimbela,
Dimi layushila wedja tshe, lene
akamakutshanya ushiki,
Keli dimi halukushila ushiki,
Dimi layukuhangwela la sambu
kʼololo.
Dimi halukukimo aha nkusuya.#30:11 Jer. 46:27-28.
12Latuyalaka kata ati: Puta kaye heyi
nkono,
Ehumwelu kaye keli wulu efula.
13Nduku layukoteketela, dia momba
puta kaye.
We kema la ekanga wukuki nkokonoya.
14Wane wakakukaka ngandji,
wambukuhela, nduku lakukanela,
Ne dia dimi lakakuhumuya puta uku
utunyi.
Dimi lakakusuya la ngala, ne dia
efula kʼehedia aye,
Ndu ne dia wuki wa kolo yaye.
15Ukundi alelaye ne dia puta kaye?
Sui diaye hadieyi nshila, ne dia efula
kʼehedia aye,
Ne dia wuki wa kolo yaye,
mbamumukutshela akambu ane.
16Waku tshe watukolekaka, wayolema.
Atunyi aye tshe otoi lʼotoi ayotolama
lu fumbi.
Waku watukumbaka la diango,
wayumbama.
Waku tshe watukundaka lu fumbi,
Dimi layakimo lu fumbi.
17Latuyalaka kata ati:
Dimi layukokonoya, layomba puta
yaye,
Ne dia vo watuketaka engo ka
mbikadja vati:
Siona uku, nduku latuyikanelaka.
18Latuyalaka kata ati:
Nyuki, dimi layukaluya wane
wakatolama
Lu fumbi uya lu mvudu yʼapema ya
Jakoba.
Dimi mbukaka adjaselu andi ketshi.
Usumba ayuhikama lu dikuna diawo,
Ndu luudu la khumʼekanga lu dihuli
diakilo.
19Esambu wa diandu wayutumbaka
uma lʼatei awo,
La waelu wʼongenongeno uma le antu
wangenangena.
Dimi layafudia, vo hawukitakita.
Dimi layuwandula, vo hawukitshakitshama.
20Anʼawo wayuyala uku nshi ya ntundu,
Ului awo wa lusanganya wayushikikala
la ntundu kami.
Dimi layusuya waku tshe wayuwaengiya.
21Uwandji awo ayuyala usikawo hita.
Umbuledi awo ayutumba kʼatei awo.
Dimi layusukanya, ku ndi ayuya le mi,
Ne dia akona eya ndjasukanya le mi
ndame? mbata Latuyalaka.
22Nyu nyayuyala wudja ami, la dimi
layuyala Unyashungu anyu.
23Nyuki, ngimbi ka Latuyalaka!
Kele kandi kambutumba, ngimbi ka
wulu.
To kayusunguto lu ete wʼantu wa
kolo.
24Kele ka wulu ka Latuyalaka
hukitakita,
Edja ndu ndi ambutsha,
Ambushidiya sangweyu diʼutema andi.
Nyu nyayulimbitela dikambu ne lu
nshi yayayi.
Currently Selected:
Jeremiya 30: TLL
Highlight
Copy
Compare
Share
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
