Isaya 54
54
Ngandji ka Pundju ka Latuyalaka le Isariyele
1We ekumba, laki kumbuta ona,
laki kuntsho diemi,
Uhangohango lʼongenongeno,
Ne dia osekami ayuleka one
lutshukami mbuta ana efula.#54:1 Ngal. 4:27.
2Okokole luudu laye la dipema.
Unanule apema wa mvudu yaye,
tuhekoki.
Utaluli ekodi ndu ushikike dikoho
dia luudu laye,
3Ne dia ayudiangana lu lunya la pami
Ndu lu lunya la lomoso.
Tukanula taye tayulela wedja
Ndu wayululanela lu esumba wa hwe.
4Tukaki woma, ne dia we huvo sonyi.
Tukananaki, ne dia we hutshama sonyi.
Keli we ayuhela sonyi ya lu nshi yaye
yʼusekaseka.
We huho lotengo lakawakotengaka
lamʼakiye wadi aki udu.
5Utungi aye keli umeye.
Lukumbu landi eli Latuyalaka
Kanga lulimbilimbi.
LʼEkila la Isariyele keli Utshungudi aye.
Ndi ambetama ati: Unyashungu a
kete tshe.
6Latuyalaka, Unyashungu aye, kata ati:
Dimi lambuketa ntu uku umuntu
lakasekama,
Leli la lunyangu lʼutema,
Uku wadi lakawasukula eki
usekaseka.
7Etenyi ka tshitshe kakamakoseke,
Keli layukukaluya la ketshi ka
mamba.
8Lʼetena ka tshitshe kakimi la kele,
Dimi lakakushe elundji kami.
Keli uma lu ngandji kami ka pundju,
mbayumukul a ketshi,
Mbata Latuyalaka, Utshungudi aye.
9Dikambu ne diambufana la nshi ya
Noa le mi.
Uku akamatshibi lu nshi ya Noa nti:
Ashi hawukukanelaki ntu ladiku dia
kete.#54:9 Etat. 9:8-17.
Osoku mbatshibami nti:
Dimi hakukaki kele, hakuhangwelaki
ntu.
10Kuyanga ekungu kumoka kana akuna
kosekoka,
Ngandji kami ka shikaa hamoki uma
le ye.
La daka diami dia ki hasekoki,
Mbata Latuyalaka, latukukaka
ketshi.
11Isariyele li, we usuyami,
lakahenyahenyamaka
Ndu laki kunsambema,
Ulungi, dimi layudja ave aye lu
alangi wʼamena!
Layuhika atshina aye la ave wʼedima
wʼushinga a wulu.
12Dimi layutsha ete aye lʼave wa tilili,
kuki yaye lʼave wa ngaingai,
Ndu eheli kaye ka lukumbu lʼave
wʼushinga a wulu.#54:12 Eny. 21:18-21.
13Ana aye tshe wayetshama le
Latuyalaka,#54:13 Joa. 6:45.
Ku vo wayuyala la ki kʼutamanya.
14We ayushikikala lu sambu kʼololo,
Asui wayuyala etali uma le ye,
Ne dia we hahumbi mbuka woma.
Elanyelu kayuyala etali uma le ye,
To husukana le ye ntu.
15Naka vo wayukudjela tuseki,
dikambu so hadiuya uma le mi.
Untu tshe layulanga ndo la ye,
ayolembiama le ye.
16Enda, dimi kakatungi utshudi a
mbulu latufufaka dja,
Latutshulaka ehumo ka ta, dia ntsha
ulimu ato.
Dimi kakatungi ndu ulanyishi
latulanyaka.
17Ehumo tshe kambutshulama dia ndo
la ye huluwana.
Lulimi tshe layukutungeia dikambu
lʼelumbwelu,
We ayuludja mananu.
Oso eli sangu diʼekambi wa
Latuyalaka.
Oso eli eyindjamelu kawo ima le mi,
mbata Latuyalaka.
Currently Selected:
Isaya 54: TLL
Highlight
Copy
Compare
Share
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
