Ezekiyele 25

Etelu kʼAkambu Wahatayi lu Dikambu Dia Asi Amona

1Diui dia Latuyalaka di kayi le mi ati: 2Onʼa untu, edia elundji kaye utsha le asi Amona,#25:2 Jer. 49:1-6; Ezek. 21:28-32; Am. 1:13-15; Zef. 2:8-11. uti akambu wahatayi lu dikambu diawo. 3Uteli asi Amona wati: Nyulungi diui dia Khumadiondjo Latuyalaka. Khumadiondjo Latuyalaka kata ati: Ne dia nyu nyakati nyati: Nʼhi! lamʼakasana etemwelo kami, lamʼakalana wudja wa Isariyele, ndu lamʼakatolama khumbu ka Juda lu fumbi. 4Diako mbayumunyukimo le antu wa lu leke lʼehutwelu dia vo nyahamela. Vo wayuhika kumbu yawo lu kete yanyu, wayudjase lʼatei anyu. Vo wayole elua anyu, ndu wayono awele anyu. 5Dimi layete Raba ukutu wa kamelo, la esumba wʼasi Amona, ahuli wʼekoko mbetama, ku nyu nyayeya nyati: Dimi keli Latuyalaka. 6Khumadiondjo Latuyalaka kata ati: Nyu nyakashana tusambi, nyakakindjikiya ekulu, nyakangenangena lʼutema lu akambu wakayala lu Isariyele. 7Diako mbamumusimbula lunya lami ladiku dianyu, dia nyukimo uku engo ka dimbu le wedja. Dimi layunyushila ushiki, layunyushisha uma lʼatei a waulelu, layunyulanya. Ku nyu nyayeya nyati: Dimi keli Latuyalaka.

Etelu kʼAkambu Wahatayi lu Dikambu Dia Moaba

8Khumadiondjo Latuyalaka kata ati: Ne dia Moaba#25:8 Is. 15:1—16:14; 25:10-12; Jer. 48:1-47; Am. 2:1-3; Zef. 2:8-11. la Seire watutaka vati: Nyendi khumbu ka Juda keli uku wedja tshe. 9Diako mbayumudihula esumba wa Moaba weli lʼumamu, esumba awo wa lutumbu, Bete-Djeshimote, Bala-Meona, Kiriyatayima. 10Dimi lutsha nkimo Moaba kame la kete yʼasi Amona le antu wa lu leke lʼEhutwelu dia vo mbahamela, diaha vo mbalema ntu lʼatei a wedja. 11Dimi layulumbuya Moaba. Ku vo wayeya vati: Dimi keli Latuyalaka.

Etelu kʼAkambu Wahatayi lu Dikambu dia Edome

12Khumadiondjo Latuyalaka kata ati: Edome#25:12 Is. 34:5-17; 63:1-6; Jer. 49:7-22; Ezek. 35:1-15; Am. 1:11-12; Ob. 1-14; Mai. 1:2-5 akayakimo dia numbuya khumbu ka Juda, wakayaete lʼunungu, ne dia vo wakasomboya wulu. 13Diako mbata Khumadiondjo Latuyalaka ati: Dimi lutsha nsimbula lunya lami ladiku dia Edome: layudiaka ndu antu ndu nyama. Dimi layete kete tongo tu, uma la Temana edja ndu la Dedana. Vo wayudiakema la tombo. 14Dimi ayosomboya Edome lʼanya wa wudja ami wa Isariyele. Vo wayutshela Edome uku kele la ududu ami. Ku vo wayulimbitela esombweyo kami, mbata Khumadiondjo Latuyalaka.

Etelu kʼAkambu Wahatayi lu Dikambu Dia Asi Filistiya

15Khumadiondjo Latuyalaka kata ati: Asi Filistiya#25:15 Is. 14:29-31; Jer. 47:1-7; Joe. 3:4-8; Am. 1:6-8; Zef. 2:4-7; Zek. 9:5-7. wakayakimo dia nsomboya Isariyele la luhetshu, la dia mbashila ushiki la lutunu lahashilaki pundju. 16Diako mbata Khumadiondjo Latuyalaka ati: Nyendi, dimi lutsha nsimbula lunya lami ladiku dia asi Filistiya. Dimi layudiaka asi Kerete; layushila atshikadi wa lʼumamu wʼashi a waki ushiki. 17Dimi layasomboya la esombweyo ka wuki, layasuya la ududu. Ku vo wayeya vati: Dimi keli Latuyalaka, lamʼayumasomboya.

Currently Selected:

Ezekiyele 25: TLL

Highlight

Copy

Compare