Ezekiyele 21

Yombo ya Diesa ya Latuyalaka

1Diui dia Latuyalaka diakayi le mi ati: 2Onʼa untu, ediya elundji kaye utsha la Jerusalema, edia diui utsha lu mvudu yʼetemwelo, uti akambu wahatayi lu dikambu dia kete ya Isariyele. 3Uteli wudja wa Isariyele wati: Latuyalaka kata ali: Nyendi, dimi lutsha ndo la nyu. Dimi layosomola yombo yami, layudiaka antu anyu wʼololo ndu wa kolo. 4Dimi layudiaka antu anyu wʼololo ndu wa kolo, dimi layosomola yombo yami uma lu dihusu dia ndo lʼantu tshe, uma la diku dia kushi pulu ndu la ngelʼa kushi. 5Antu tshe wayeya vati: Dimi Latuyalaka kambosomola yombo yami uma lu dihusu; yo hayukalula loko ntu. 6Okone we onʼa untu ukhumi akhumu; uyali la okei, ukhumi akhumi la lunyangu la wulu la ntundu kawo. 7Lamʼayuwukumbula vati: Ukundi akhumaye akhumu? Kuwakaluya diui wati: Ne dia lukumu la mamba luyayi, etema wʼantu tshe wayuyala ashi atu, anya tshe wayuyala wodu, nyumu yʼantu yayuheko, la adui wʼantu wayolelo, wayuyala uku ashi. Nyulungi, lo loso layayi, lo layutshama, mbata Khumadiondjo Latuyalaka.

8Diui dia Latuyalaka diakayi le mi ati: 9Onʼa untu, uti akambu wahatayi wati: Latuyalaka kata ati:

Yombo! yombo! yo yaya diesa ndu

ngaingai.

10Wambuyiketemola dia yo mbeya

ndjaka antu.

Yo ngadimoka uku dingadimu dia

ndjadi!

Ukundi weyasu ngenangena? We ntunaka ohehela, onʼami, ndu engo tshe kambutshama lʼutamba. 11Vo wambedia yombo dia yo ntsha ulimu; wambuyiketemola, wambuyedia dia mbisha undjakanyi. 12We onʼa untu, uleli, udi tu kuku, ne dia yombo yambukuma le wudja ami ndu le ewandji wa Isariyele tshe. Vo wambukimwama utsha le yombo, vo la wudja ami, okone nyuyakomole lu pelohelo la okei. 13Edikelu huyala — ku ukundi ayuyala dikambu ne, naka we atutunaka ohehela? mbata Khumadiondjo Latuyalaka. 14We onʼa untu, uti akambu wahatayi, uhumi myuki. Uhuluya yombo tena pendi, tena satu, yombo ya ndjaka waku wahumba ndjakema. Yo yeli yombo yʼediakelu ka wuki, yamboto lu mvudu yawo tshe. 15Dimi lakakitsha yombo ya ngaingai dia ndo la asuku awo tshe, dia etema awo ndjala ashi atu, la dia vo ntakana efula. Yombo sho yeli uku ndjadi; yo yeko la diesa dia ndjaka antu. 16Usikiso utsha lu lunya la pami, uyalonge lu ta; ukadimo utsha lu lunya la lomoso, utsha lu ahuli tshe welela sodi kaye. 17Dimi layuhuma myuki, layunduya ududu ami; dimi Latuyalaka kambuta. 18Ku diui dia Latuyalaka diakayi le mi ntu ati: 19We onʼa untu, osonole mbuka hyendi ya yombo ya khumʼekanga ka Babilona ndja. Mbuka yako hyendi yayutumba uma lu wudja otoi. Utshi djimbitelu, uyikitsha lʼote a mbuka lʼusumba. 20Osonole mbuka ka yombo mbeta la Raba kʼasi Amona uya la Juda la Jerusalema, usumba wudingami lukumbu. 21Khumʼekanga ka Babilona akemala lu sanga dia mbuka hyendi dia mendja diwulu. Akasutshasutsha pitu, akendja lu nyembo, akendi uvo. 22Lu lunya landi la pami kaki endelu ka Jerusalema, dia nshikike etamba a waki wa nyukula lukumbu, dia mbufula unyo dia ndela, dia mbedia diui dia luhangu, dia nshikike etamba a waki wanyukula lukumbu, dia ntshima ngeli ndu dia ntsha kumbu ya wulu. 23Dikambu so diayuyala endelu ka kashi lu ashu awo. Vo wakatshibi tshibelu diawo. Keli ndi atuhoka kolo kawo, dia vo mundama lu fumbi.

24Uma lu dikambu diako, mbata Khumadiondjo Latuyalaka ati: Ne dia nyu nyambumbuhula kolo kanyu lamʼambunyushula uhedia anyu, dia kolo yanyu menama lu etsha anyu tshe, ne dia nyu nyambumbuhulawo, mbayunyundama loko. 25We uwandji wa Isariyele, we untu a kolo lambuhumo wulu, lushi lambukuka la etena ka kolo kaye nkume. 26Khumadiondjo Latuyalaka kata ati: Unya dihondo dia lʼote aye, unya dembo dia kusu; dio hadiuyala osoku ntu. Olemia kene kaha la nemo, ukitshakitsha kene keli la nemo. 27Elanyelu! elanyelu! dimi layulanya tshe! Keli dikambu diako hadiuyala edja ndu kanga diulelu ambuya, ku dimi layuwushadio.

Elumbwelu le Asi Amona

28We onʼa untu, uti akambu wahatayi wati: Khumadiondjo latuyalaka kata okone lu dikambu diʼasi Amona#21:28 Jer. 49:1-6; Ezek. 25:1-7; Am. 1:13-15; Zef. 2:8-11. ndu dia sonyi kawo ati: Yombo! yombo yambosomwama dia ndjaka antu. Wambuyiketemola dia yo ngadimo uku dingadimu dia ndjadi, dia yo nshila antu. 29Vo wakanyutela waenelo wa kashi, wakanyusakwela waenelo wa kashi, wa-kanyendjiya awulu wʼanyanya, dia nyu nsuya antu wa kolo wambuhumo wulu ndu wambukuma lʼetena kawo kʼelumbwelu. 30Ukaluya yombo lu dihusu. Dimi layunyulumbuya lu dihuli diakanyatongo, lu kete yakanyuto. 31Dimi layunyutshulwela ududu ami, layunyufufa dja ya kele kami. Dimi layunyukimo lʼanya wʼakanga a ngala, weya nshila antu ushiki. 32Nyu nyayuyala uku kunyi lu dja; dikila dianyu diayokela lu kete. Antu hawunyuho ntu, ne dia dimi Latuyalaka lambuta.

Currently Selected:

Ezekiyele 21: TLL

Highlight

Copy

Compare