I. Korint 11
11
1Uri kĭmi sugkū numpi enyaū, sugkū ya um nūri Krĭsto. 2Im yaum navos ugi kĭmi popōwo kĭmi kūm nenteme yaū ra ōvun siame sū, ĭm popōwo kĭmi kūmelekavi ugi noravsivsi netevarū omwisū, sugkū yo otĭnepe irora pugkūm. 3Kō yakum nakiugi ma kĭmi kwagkili memagkū, Krĭstō oti numpun ōveteme omwisū; ĭm nateman numpūn nasiven; ĭm Nōbū numpūn Kristo. 4Nagkū neteme sī kū sī umnufwaki kū umentorenūwi nam, memevīugi numpūn iyi umnumpi narumprum ra numpūn. 5Kō nagkū nasiven sī kū sī umnufwaki kū umentorenūwi nam metū seni pe numpūn iyi umnumpi narumprum ra numpūn: popōwo imo sugkū nagkū iyi otavelĭmpū numpūn. 6Pot nagkū nasiven otū seni numpūn, aremī ontavlimpū numpūn: kō nagkū narumprum iran nasiven wortavlimpū numpūn, aremī iyi oseni numpūn. 7Kō tawi aremī nagkū nateman oseni numpūn popōwo iyi safi ĭm nilasilaswi eni Nōbū kō nasiven oti nilasilaswi eni nateman. 8Popōwo nateman yetūmne marugi nasiven; kō nasiven yemne marugi nateman; 9ĭm sugkū dūtū umpi nateman nisekon nasiven; kō nasiven nisekon nateman: 10popōwo pe sugkū ĭt oti aremī ma nasiven onevīugi numpūn safi horog isen, popōwo uri ōvun nagelo. 11Kō ĭtnesog nasiven yetūspen nete kō irora ūndū nateman, ĭm sugkū nateman, yetūspen nete kō ūndū nasiven, ra Novsūromon. 12Im popōwo nasiven yemne ra nateman sugkū nateman yeti popōwo ugi nasiven; kō siame sū omwisū yemne ra Nōbū. 13Utarūgi kĭmi dal kĭmi: aremī kū memagkū nasiven umnufwaki pugi Nōbū metū meseni numpūn omwisū ugi nemas? 14Netevarū ra nemap omentaysogkam, ma nagkū tantop novlin numpun nateman imo narumprum nisekon? 15Kō nagkū tantop novlĭn numpun nasiven, imo nilasilaswi nisekon; popōwo yetin avugi novlin numpūn nimsin worevūgi iyi. 16Kō nagkū sī kū sī neteme osendoekeye ugi, owi sugkū, tawi sī netevani enugkam sugkū, ĭm tawi sī sugkū enirora ōvun nilpon sī lō tumpora eni Nōbū.
17Im ra imo nimpasewugi enyaū pugkūm, ya otū anūwi narigi netevarū soremwi ĭt kĭmi pol sugkū kū-mūsemsemugkūm kūmūtūteli ugi netevarū mōmū aremī ugi kō kūmūteli ugi netevarū mōmū ūr kĭmi. 18Popōwo pol sugkū kĭmi kūmūsemsimugūm worufwaki, ya umandegi memagkū umante nesesau enugkimi dal kĭmi; ĭm ya magkū nigoi ĭtnesog siame, enugkimi. 19Kō ĭtnesog wanti nugkon sendūkaye dal kĭmi memagkū wanturatumpeni irora mori ōveteme ūmnumpūvsok aremī ugi irora dal kĭmi 20Im nagkū pol sugkū kĭmi kūmūsemsimugkūm, tawi sugkū narĭgari eni Novsūromon: 21popōwo pol sugkū kĭmi kūmneni nevag kūmneni mampūm sī eniwe nevag isen ĭm sī sugkū ĭm omwisū sugkū; ĭm nugkon umentemas ĭm nugkon umnemoneki menaūterĭmlū. 22Sie imo? tawi ōvun nimo enugkĭmi woreni nevag ĭm woromoneki? kū kūmagkū nindiwavū semsimak eni Nōbū, mo mumpi narumprum iranda ōvun norumkora? Sie ya anwi pugkūm? Ya, anūwi narigi enugkĭmi popōwo ugi imo? Ya otū anūwi narigi enugkĭmi. 23Popōwo ya okevi marugi Novsūromon imo mori ya mempasewugkūm ugi, memagkū Iesū Novsūromon rapūmrok mori dūmempirigi yivi yōūp; 24memumpalugi memorūsevi, memenūwi memokū, Imo oti nokolisirag, yetin sateri nisekomi: wumpi imo worentemeyaū. 25Im pol sugkū yemen iyivĭ kup sugkū, memenwi memokū, Imo kup oti nam ūnam ĭtevaū ra de enyaū: wumpi imo kĭmi, pol sugkū kĭmi kwamoneki ugi, worenteme yaū. 26Popōwo pol sugkū kĭmi kwoneni imo yōūp mamoneki marugi imo kup, kĭmi kūoseei nemas eni Novsūromon afeli nimpugon iyi omĭn torileki. 27Im popōwo pe sugkū iyi sī mori umneni imo yōūp mamoneki marugi imo kup, ĭm tawi aremī iyi ante nowarepatevi ugi nokolisiran ĭm de eni Novsuromon. 28Kō aremī neteme onesorugi nowan isen nokowo iyi, penūri aremī iyi oneni imo yoūp mamoneki marugi imo kup. 29Popōwo pe iyi mori umneni mamoneki iyi umneni mamoneki nurian iran iyi, nagkū yetū tarūves ugi nokolisiran Novsūromon. 30Im popōwo ugi imo ūmandromora ōveteme sikat irami moĭm namarat, ĭm sikat ūmnalēepo. 31Pot nagkū kos kelenesorugi aremī nowant, petū ūrian irant. 32Kō pol sugkū ūmnūrian irant, ūmenūwali numpūrak ūr enugkos Novsūromon, ma sugkū kos keletū lampī naraki dal ōveteme ra nemap. 33Popōwo pe sugkū pol sugkū kĭmi kūmūsemsimugkūm woreni nevag, ah ravugsieme, ūratevetūkūm kĭmi. 34Im nagkū sī umentemas, aremī iyi oneni ran temne eni; ma kĭmi ūtū semsimugkūm mūvī nurian ugi. Im pol sugkū ya ampelum ya onumpi aremī ra nator siame sū nugkon omwisū.
Currently Selected:
I. Korint 11: ERGNT79
Highlight
Copy
Compare
Share
Want to have your highlights saved across all your devices? Sign up or sign in
Erromangan New Testament © British and Foreign Bible Society, 1909,1979.
