Sofonías 2
2
1Mana penqakuq Judá runakuna, jutsa rurayta dëjayänaykipaq llapayki qorikaykur yarpachakuyay.
2Dios Yaya rabyanqan junaq manaraq chämunqanyaq jutsa rurayta dëjayay.
Mana dëjayaptikiqa imayka päjata wayra apar ushakätsinqannömi ushakätsiyäshunki.#Sal. 1.4; Jer. 13.24; Ose. 13.3.
3Kay patsachö qollmi shonqu runakuna, Dios Yayata llapayki ashiyay.
Mandamientunkunata cäsukuqkuna, mana allish tukurlla pay munanqannö kawakuyay.
Tsaynö kawakuyaptikiqa talvezchi Dios Yaya rabyanqan junaq salvayäshunkiman.#Isa. 55.6-7; Joel 2.12-14.
Filisteo runakunata castigananpaq ninqan
4Gaza markapis mana imakaq tsunyam tikranqa.
Ascalón markapis jankatmi ushakanqa.
Asdod markachö täkuqkunatam junaqpa suwapuyanqa.
Ecrón markachö täkuqkunatam chapapita jachata tronqueaqnö jitariyanqa.
5¡Allaw! ¡Lamar kuchunchö täkuq filisteo runakuna, llakipaypaqmi kayanki!
Castigayäshunaykipaqmi Dios Yaya nin:
<<¡Canaánchö täkuq filisteo runakuna, chipyatmi ushakätsiyäshayki!#Isa. 14.29-31; Jer. 47.1-7; Eze. 25.15-17; Joel 3.4-8; Amós 1.6-8; Zac. 9.5-7.
6Lamar cercan chakrakunam wätakunata mitsikuyänan pastu tikranqa.
Tsaychö üsha majädakunallanam kanqa>>.
7Kawaykar quëdaq Judá runakunatam sïqa librina kawakuyänanpaq Dios Yaya yanapanqa.
Paykunapaqna tsay chakrakuna kaptinmi wätankunata tsaychö mitsikuyanqa.
Ascalónchö kaykaq wajikunachömi puñuyanqa.
Moabita y amonita runakunata castigananpaq ninqan
8Dios Yayam nin:
<<Noqam wiyashkä Moab nación runakuna#Isa. 15—16; 25.10-12; Jer. 48; Eze. 25.8-11; Amós 1.13-15. y Amón nación runakuna#Jer. 49.1-6; Eze. 21.28-32; 25.1-7; Amós 1.13-15. kuyanqä runakunata asharnin qayapäyanqanta.
Tsaynöllam wiyashkä kuyanqä runakunata allqutsakuyanqanta.
Paykunaqa Judá runakunapa chakrankunata qechuskirmi rïcuyäyashqa>>.
9Israel runakunata kuyaq y llapanta mandaq Dios Yayam jurar nin:
<<Sodoma markanömi Moab nacionpis ushakanqa.
Gomorra markanömi Amón nacionpis ushakanqa.#Gén. 19.1-29.
Chakrankunachöpis kashallanam juntanqa.
Wakin kaq chakrankunapis jankatmi qachpayanqa.
Desiertunömi imaypis kanqa.
Kawaykar quëdaq kuyanqä Israel runakunam paykunapa imaykankunatapis apayanqa.
Allin kaq chakrankunatapis qechuskirmi tsaychö täkuyanqa.
Tsay ninqäqa rasunpam kanqa>>.
10Tsaynömi paykunata päsanqa alläpa allish tukuyanqanpita.
Paykunam llapanta mandaq Dios Yaya kuyanqan Israel runankunata allqutsäkuyashqa.
11Kay patsachö adorayanqan dioskunata Dios Yaya ushakätsirmi Moab nación runakunata y Amón nación runakunata alläpa castiganqa.
Tsaymi karu islakunachö täkuq runakunapis markankunachö Dios Yayatana adorayanqa.
Etiopía runakunata castigananpaq ninqan
12<<Etiopía runakuna,#Isa. 18.1-7. qamkunatapis espädäwanmi wañutsiyäshayki>>.
Asiria runakunata castigananpaq ninqan
13Tsaynöllam Dios Yaya norti kaqlächö Asiria nación runakunatapis ushakätsinqa.#Isa. 10.5-34; 14.24-27; Nah. 1—3.
Nínive markachö täkuq runakunata ushakätsiptinmi tsunya quëdanqa.
14Tsay partim wätakunata mitsikuyänanllapaqna kanqa.
Tukuyläya chucaru wätakunam tsaychö pärayanqa.
Tukuwan akakallanam terantikunachö puñuyanqa.
Tsaykuna waqanqanpis ventänapam wiyakämunqa.
Punkukuna ushakaptinmi cedru tablawan entablayanqanpis rikakanqa.
15Tsay markachö täkuq runakuna ima desgracia päsananpaq kanqanta manam ni ichikllatapis yarpäyantsu.
Tsaymi shonqullankunachö niyan:
<<Noqantsikpita masqa ¿piraq kanman?>>
Tsaynö nikäyaptinpis markankunata ushakätsiptinmi chucaru wätakuna pärayänan raqällana kanqa.
Tsayta rikarmi marka cercankunapa päsaqkunapis makinkunata taqllarraq kushipäyanqa.
Currently Selected:
Sofonías 2: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
