Zacarías 7

Cada wata ayunar sïguiyänanpaq o mana sïguiyänanpaqpis tapuyanqan

1Rey Darío chusku watana mandakuq kaykaptinmi profëta Zacaríasta Dios Yaya yapay parlaparqan. Tsayqa isqun kaq killachö chusku kaq junaqchömi karqan#7.1 Calendariuntsikchöqa tsay junaq karqan 7 de diciembri, wata 517 a. C.. Isqun kaq killapa shutinmi Quisleu karqan. 2Tsay witsaymi Bet-el runakuna Sarezerta, Regem-melecta y wakin runakunata Dios Yayata rugakuyänanpaq kachayarqan. 3Tsaymi llapanta mandaq Dios Yayapa templunman chaykur sacerdötikunata y profëtakunata tapuyarqan: <<Pitsqa kaq killachö atska watanam waqar ayunayä.#7.3 Pitsqa kaq killachöqa Babilonia soldädukuna Jerusalénta y templuta rupatsir ushakätsiyanqanta yarparmi ayunayarqan. Tsaypaq masta musyanaykipaq liyinki 2Rey. 25.8-9. ¿Yapayllaku ayunar sïguiyäshaq?>>

4Tsaynö tapuyaptin willakunäpaqmi llapanta mandaq Dios Yaya nimarqan: 5<<Judáchö täkuq llapan runakunata y sacerdötikunata willanki: <Qamkuna qanchis chunka (70) watantin#Jer. 25.11; 29.10; Zac. 1.12. pitsqa kaq y qanchis kaq killachö#7.5 Qanchis kaq killachö Judáchö gobernador Gedalíasta wañutsiyanqanta yarparmi tsay killa ayunayarqan. Tsaypaq masta musyanaykipaq liyinki 2Rey. 25.25. ayunar waqarnin ¿munanqänötsuraq ayunayashkanki? 6Qamkunaqa adorayämanqayki fiestachöpis pachaykikuna juntänallanpaqmi mikur upyar kaykäyanki. 7Unay castaykikunapis qamkunanö kayanqantam profëtäkunawan willakatsirqä. Tsay witsaymi Jerusalénta manaraq ushakätsiyaptin alli kawakuyarqan. Lädunchö kaq markakunachöpis maytsikaq runakunam täkuyarqan. Tsaynöllam Neguevchö y Sefelachö täkuq runakunapis atskaq täkuyarqan> >>.

8Mastam profëta Zacaríasta Dios Yaya nirqan: 9<<Llapanta mandaq Dios Yaya karmi nï: <Runa majikikunata juzgarqa pitapis mana jananpar juzgayay. Juknin jukninwanpis llakipänakuyay. 10Viüdakunata, mamannaq y taytannaqkunata, juklä nación runakunata y waktsakunata ama sufritsiyaytsu. Runa majikikunapa contran imatapis ama yarpäyaytsu.#Amós 5.24; Miq. 6.8.

11<< <Profëtäkunawan willakatsiptïpis unay castaykikunaqa manam cäsuyämarqantsu. Masbienmi mana wiyayämänanpaq rinrinkunata tsaparkur jukläpa tumaräyarqan. 12Imayka diamantinö#7.12 Diamantiqa llapan rumipita y ima metalpitapis mas chukrum. chukru kananpaqmi shonqunkunatapis chukruyätsiyarqan. Tsaynömi kayarqan unay profëtakuna willakuyanqan leynïkunata y yachatsinqäkunata cäsuyta mana munar. Profëtakuna willakuyänanpaqmi Espïritü tantiyatsirqan. Tsaynö willakatsiptïpis mana cäsukuyaptinmi alläpa rabyarqä. 13Tsaymi paykuna mana cäsuyämanqannölla noqapis paykunata cäsushkätsu. Llapanta mandaq Dios Yaya karmi nï. 14Tsaypitanam shukukuy wayra wakpa kaypa imatapis apanqannö paykunata mana reqiyanqan nacionkunaman witsikätsishkä. Punta täkuyanqan nacionpis desiertuman tikrashqa kaptinmi tsaypaqa runakuna päsayarqannatsu. Tsaymi kuyakuypaq nacionninchö ni pipis täkuyarqannatsu> >>.

Currently Selected:

Zacarías 7: qxn

Highlight

Copy

Compare