Zacarías 8

Kuyanqan runankunata yapay alli kawakuyänanpaq Dios Yaya äninqan

1Llapanta mandaq Dios Yayam nimarqan: 2<<Noqa llapanta mandaq Dios Yaya karmi nï: Siónchö täkuqkunatam alläpa kuyä. Tsaymi chikiqninkunataqa rikaytapis munätsu.

3<<Noqa Dios Yayam nï: Sión lömaman kutimurmi Jerusalénchö täkushaq. Tsay markapaqmi cäsukuq marka niyanqa. Llapanta mandaq Dios Yaya akranqan sagrädu löma kanqantam niyanqa.#Isa. 1.26.

4<<Noqa llapanta mandaq Dios Yaya karmi nï: Jerusalén markapa pläzankunachömi awkinkuna y chakwankunapis yapay jamayanqa. Paykuna alläpa chakwanna karmi tukrunkunallawanna puriyanqa. 5Wamrakunapis maytsikaq karmi cällikunachö pukllayanqa.

6<<Noqa llapanta mandaq Dios Yaya karmi nï: Tsaynö kananpaq kanqanta mana creyiyaptikipis noqapaqqa manam ajatsu.

7<<Noqa llapanta mandaq Dios Yaya karmi nï: Noqam kuyanqä runakunata maytsay nacionman prësu apayanqanpita qorimushaq. 8Paykunatam Jerusalénchö täkuyänanpaq maytsaypitapis qorimushaq. Paykunam kuyanqä runakuna kayanqa. Noqanam paykunapa Diosninkuna kashaq.#Jer. 31.33; 32.38; Eze. 37.23, 27. Llapan äninqäta cumplirmi alli rikäshaq.

9<<Noqa llapanta mandaq Dios Yaya karmi nï: Templüpa cimientunta qallayanqayki junaqpitam profëtakuna willayäshurqayki shäritsir ushayänaykipaq kanqanta. Tsaynö kaykaptinqa kushi kushilla aruyay. 10Templuta shäritsiyta manaraq qallayaptikiqa manam yuraq qellay kashqatsu aruqkunata pägayänaykipaq ni wätapa flëtinta pägayänaykipaqpis. Juknin jukninwan chikinakuyänaykipaq dëjaskiyaptiqmi nänipa purirpis mantsaq mantsaqlla puriyarqayki. 11Peru kananpitaqa manam tsaynönatsu kawayanki. Noqa llapanta mandaq Dios Yayam tsaynö nï. 12Tsaypa rantinmi llapayki tranquïluna kawakuyanki. Üvasnikikunapis allinam wayunqa. Chakraykikunachö mikuynikikunapis allim wayunqa. Tamyapis tiempullanchömi tamyamunqa. Bendicionnïta churamuptïmi alli kawakuyanki. 13Judá runakuna y Israel runakuna, mas unaynam maytsay nación runakuna niyarqan maldicionädu kayanqaykita. Tsaynö niyaptinpis noqam salvacionnïta qamkunaman churamushaq. ¡Mantsakäyanqaykipa rantin mas valorayay!

14<<Noqa llapanta mandaq Dios Yaya karmi nï: Unay castaykikuna rabyatsiyämaptin castiganäpaq ninqänöllam paykunata castigarqä. 15Peru qamkunamanmi sïqa bendicionnïta churamushaq Jerusalénchö täkuyaptiki o Judáchö wakin markakunachö täkuyaptikipis. Tsaynö yanapayänaq kaykaptinqa ama mantsakäyaytsu. 16Ama llullatsinakuyaytsu. Runakuna alli kawayänanpaq alli justiciata rurayay. Pïmaywanpis alli kawakuyay. 17Juknin jukninwanpis mana allikunata rurayänaykipaq ama yarpäyaytsu. Tsaynölla ama llullakuyaytsu.#Efe. 4.25. Tsaynö kawarqa alläpam rabyatsiyämanki. Noqa Dios Yayam nï>>.

18Mastam llapanta mandaq Dios Yaya nimarqan: 19<<Chusku kaq killachö, pitsqa kaq killachö, qanchis kaq killachö, chunka kaq killachö llakikur ayunayanqanpa#8.19 Chunka kaq killachö ayunayarqan tsay killa Babilonia soldädukuna Jerusalénta atacar qallayanqanta yarparmi (2Rey. 25.1). Chusku kaq killachö ayunayarqan tsay killa Jerusalénta kunchawaskir murällata Babilonia soldädukuna uchkuyanqanta yarparmi (2Rey. 25.3-4). Pitsqa kaq killachö ayunayarqan tsay killa Babilonia soldädukuna Jerusalénta y templuta rupatsir ushayanqanta yarparmi (2Rey. 25.8-9). Qanchis kaq killachö ayunayarqan tsay killa Judáchö kaykaq gobernador Gedalíasta wañutsiyanqanta yarparmi (2Rey. 25.25). rantinmi Judá runakuna kushikurnin fiestata rurar alabayämanqa. Tsaynö kananpaq kaykaptinqa mana llullakuypa allillata rurar kawakuyätsun>>.

20Noqa llapanta mandaq Dios Yaya karmi nï: Juklä nacionkunapita y juklä markakunapitam runakuna Jerusalénman shayämunqa. 21Shayämunanpaqmi juk markapita markan markan aywar niyanqa: <<¡Aywashun Dios Yayata rugakunapaq! ¡Llapanta mandaq Dios Yayata ashishun!>>

Tsaymi wakin runakunapis niyanqa: <<¡Noqakunapis aywayäshaq!>>

22Tsaynö willanakurmi markankunapita y nacionninkunapita llapanta mandaq Dios Yayata ashir mañakuyänanpaq Jerusalénman shayämunqa.

23Noqa llapanta mandaq Dios Yaya karmi nï: Tsay witsaymi maytsay nacionpita karpis y ima idiömata parlaq karpis chunka runakuna Judá nación runata llatapanpita achkuskir rugakur niyanqa: <<Qamwan aywaytam munayä. Dios Yaya qamkunawan kaykanqantam wiyayashkä>>.

Currently Selected:

Zacarías 8: qxn

Highlight

Copy

Compare